تصنيفات

اخر ما كتبت

مدونات

مواقع ومنتديات

منوعات

ارشيفي القديم

وش ذا البرود اللي فينا !!!

 

صورة المصاعد متوقفة عن العمل

صورة المصاعد متوقفة عن العمل


 

يقول اينشتاين : لكل فعل ردة فعل مشابهة له في القوة في عكس الاتجاة  .. مدري هو اللي قايلها ولا لا !! 

اليوم بمعهد الادارة .. حصلت كارثة !!

وانا راجع من مصلى المعهد بالدور الارضي للقاعة بالدور الثاني .. 

دقت فجأة انذارات الحريق !!

وش تتوقعون لو صارت هذي السالفة في جامعة ولا معهد كبير في الصومال ولا اي مكان بالعالم ..

حسب الافلام اللي شفت ان العالم يتركون اي شي قاعدين يسونة ويروحون لأقرب نقطة تجمع خلال ثواني ..

بس اللي شفتة اليوم غير !!

شفت ولاشي <<< كيف الوصف بس ..! اغطي علي شارلوك هولمز ؟ 

اي والله شفت ولا شي ،، ولا كأن فية حالة طوارئ ..! ما اشوف الا العمال الفلبينين نازلين بسرعة من الدرج وهم الوحيدين اللي يتحركون بسرعة وكل واحد منهم مطلع جوالة <<< الظاهر يودعون اهاليهم على بالهم انة Another terrorist attack  هع هع ..

والطلاب ،، والله ولا كأنة الا صوت العجوز فيروز .. قاعدين ومستانسين ،، على الرغم من انة المصاعد اشوفها توقف عند الدور الارضي وتطفى انوارها واحد واحد ..( ٤ مصاعد ) يعني ع الاقل فية احساس امر جاد .. والطلاب برضوا ولا اي شي ،، حتى اني اشوفهم طالعين رايحين القاعات ،، 

طبعاً انا مابصير اهبل مثلهم واطلع القاعة ويمكن فية فلم صدقي صاير underground في المواقف اسفل المعهد رحت وطالعت مع القزاز فية دخان فية شي ولا جرس الانذار يستهبل ؟

المهم في الاخير لقيت ٢ من اخوياي رايحين القاعة ورحت معهم ،، اقول لهم ياعيال فرصة نسحب ع المحاضرة ونبرر ذلك بالانذار وان السلامة اهم ،، يقولون يارجال جرسهم نصاب ..!!! واقول في نفسي جرس نصاب والمصاعد معطلة !! وحنا القاعة بالطلوع بالدرج .. الا ازيدكم من الشعر بيت ،، واحد من الطلاب على الرغم من الانذار شغال والمصعد وقف وطفى النور عندة ،، قاعد يضغط على ازرتة يبية يشتغل ويطلع فية !! << الحين عرفت وش معنى خبعة << وين اللي علمني هالكلمة .. 

طيب الحين صدق .. اذا صار حريق ولا اي موضوع – لا قدر الله – الشعب السعودي وخاصة المولودين بعد تاريخ ١٩٨٦ يعني لحقوا على تحرير الكويت وهم بزران وينصبون علينا يقول شفنا صواريخ وسمعنا وشفنا <<< ما حطيتو الا الكيسة السودا على القزاز وتخب ، حتى الكمامة اللي تقول ما كانت كبر وجهك !

طيب عندي الحين سؤال في الطب !! اذا صار شي – لا قدر الله – وش بنسوي ؟ وش ردة فعلنا دامنا بهالبرود !! انذار حريق والمصاعد تعطلت ولا تحرك فينا ساكن ،، طيب .. هزة ارضية !! نيزك طايح من السما !! انفجار اسطوانة غاز ..!! حريق صدقي وانحجر ٢٠٠ طالب في الدور الثالث ..!! واحد مسلح مختل اقتحم مجمع ما ولا المعهد ..!! وش بنسوي ؟؟؟!!!

اذكر مرة ايام الثانوي .. بالتحديد ثاني ثانوي يقال لهم بيسون تجربة اخلاء سريع حالة نشوب حرب – لا قدر الله- !! لحظة انا قلت حرب ؟؟ قصدي حريق .. والله قصدي حريق .. الله يديم الامن والامان .. المهم .. جانا الاستاذ عبد الرحيم الزهراني يعلمنا يقول : اطلعوا صفين بهدوء بس بعجلة شوي ولا تسوون ضجة << عشان نسمع النار وينها فية خخخخ ولا تشيلون معكم لا دروسكم ولا اي شي <<< لانها تسبب عرقلة عن الجمرات !!!  والوعد لما يدق الجرس ..

المهم دق الجرس .. الشي الوحيد اللي طبقة الطلاب .. انهم طلعوا من الفصل صفين ،،، بس .. والاستاذ عبد الرحيم والوكيل عيدان يقولون بسرعة استعجلو ،،، استعجلو مين يا بطيخ انت وياة ،، قاعدين نسحب رجلينا ونسولف !! 


خلاصة الموضوع ،، 

– ماعندنا اي ثقافة في مواجهة الكوارث ،،

– فالحين ندرس وطنية ماتزيد الا تبلد في الاحساس ،، طيب ع الاقل استبدلوها بمادة اخرى تفيد في الحياة مادة تعلمنا كيف نتعامل مع مختلف المواقف … حب الوطن في القلب وما يحتاج مادة عشان ندرسة !

– كانت هذة مجرد امثلة بسيطة .. لسة ما جبت احتمال ان القادة العرب المجتمعين (على ما اظن) في سلطنة عمان انهم بيطلعون بقرار مصيري وهو ارسال الجيوش واعداد العدة لتحرير فلسطين بدال الطيارات حقت امس اللي فيها كم طن دواء واللي تعودوا يرسلونها كل ماصارت مجزرة ومذبحة في فلسطين ،،  هالمرة بيرسلون جيش ،، واكيد اليهود لعنهم الله بيقاومون ٣ ايام وخلالها اتوقع بتكون كل الدول في حالة حرب والقصف على العرب بيجي من اسرائيل وحدها ( خوفي يصير من العرب انفسهم ضد انفسهم ) فقط ٣ ايام وبعدها تنتهي اسرائيل واليهود من الوجود .. طيب سؤال في الطب ثاني : هل بنستوعب انة حنا في حالة حرب ولا لا ؟؟ 

هل اذا اضطررنا للدفاع عن الوطن بجوار جيشنا العظيم ،،، هل سنستطيع ام لا ؟؟ 

هل سنستطيع حمل السلاح والتعامل معة ام لا .. ولا بس فالحين في الطراطيع والصواريخ وقنبلة الطعمية من سوق الحمام ؟؟


خلاصة الخلاصة .. 

* اخشوشنوا فأن النعم لا تدوم .

* النعيم لا يدرك بالنعيم .

* بالشكر تدوم النعم .

 

Be Sociable, Share!

التعليقات


اسم المعلق: عبقرينو
31 ديسمبر 2008, 9:45 م

لا تحاول تفهم الشعب السعودي لأنهم منجد أغبيه ماإفهمو
إدخل الكلام منجهة وإخرج من جهة


اسم المعلق: ACCORD i-VTEC – ابو داحم
1 يناير 2009, 12:55 ص

يا رجال حدث ولا حرج

مصدق ان الشعب بتتحرك فيهم شعره

اذا شافو النار والدخان واختنق واحد وطاح مسروع

ذيك الساعه يفكرون انهم يتحركون


اسم المعلق: like.no.other
1 يناير 2009, 12:55 ص

هههههه
صدقني انه الشعوب العربيه كلها بدها جمع بحفره وتصب فوقهم جالون بنزيين لك حتى جالون كتير كاسة بنزيين وكبريته !!
ياخي هذول بده صااروخ عشان يخافو !! اماا غير هيك مو ممنك !!


اسم المعلق: just accord
1 يناير 2009, 11:22 ص

يعطيك العافيه يا مصعب على المووضوع

بس بغيت ارد على الشبااب الي فوق الي يقول نصب عليه غاز ونحرق ومدري ايش

ياخي مره في حياتك شفت مسوين في مدرستك او كليتك او مكان عملك

تجربه عن الحريق يعني يوريك المخارج وطفايات الحريق وكذا

يعني نقدر نقول ماهو من الشعب اللكلام او من المواطنين

لان لا قدر الله وصار شي ماراح تقدر تنقذ حياتك لانك ما علموك طريقه الهروب

يجيك واحد وشو طريقه الهروب دور على الباب !!

اذا صار حريق وربي تنسى الدنيا تبي تطلع تلف يمين تفكر انه يسار

والدخان اذا جاك غطى المكان ما تقدر تطالع شي

انا اقول يا ريت الدفاع المدني يسوي على طووول عند كل بدايه سنه

دوره تدريبيه على المجتمع كله خصوصا البنات طريقه الهروب من الحريق

تحياتي لك


اسم المعلق: المباشر
1 يناير 2009, 11:38 ص

هلا بمصعب

والله ذكرتني ايام ازمة الكويت والكمامات الخضراء الفله مع الخرطوم وعلبه الأكسجين قدييييييييييييييم

والله ياذاك الوقت ناس توهقت ياشيخ تروح للدفاع المدني يقولك عندنا نقص بالكمامات تعال بكره يمكن تجينا كمية

شدعوه والله لو يصير الجد انك تروح فيها والكمامات ماجات للدفاع المدني

الله لايعود ذيك الأيام


اسم المعلق: بـنــدر
1 يناير 2009, 1:44 م

والله من جد مدرسكم هع يبي يسمع صوت الناااااااااااار .. على فكرهـ كأني أعرف مدرستكم .. هي صدق مدرسة الإمام الشوكاني بالعريجاء – الرياض


اسم المعلق: ReSHo Eilvs
3 يناير 2009, 1:38 ص

اهلين يا مرحبمبو بمصعب
.
.

لو ان شركة آرامكوا متحكمه بالتعليم السعودي

والله للأصبحت السعودية من الدول المتقدمه عـالميا (شعبا)

لكن نسبة السعودين اللذين يتحكمون لمثل هذي الكوارث تقريبا 30%
و 99% من الـ 30 % من موظفي آرامكوا <— ابصم لك على العشرة

بصراحة شركة تهتم بالسلامة اكثر من اي شي كان
نجي و نقول ايام الحرب عـلى الكويت كانت حزتها عمري تقريبا سنتين المهم الوالد حكى القصه و كيف كانت آرامكوا و نصائحها للموظفين
تزويد جميع أفراد عـائلة الموظف بـ كمامات + اكياس بلاستيكية لاصقة لتغطية البيت كاملا <— مدري ايش الفائدة من تغطية البيت بالأكياس البلاستيكية الى الآن
و مع الشغل في هذيك الظروف<— (آرامكوا ما عندها اجازات ولو كنت على فراش الموت خخ)
الا انها لازالت تنشر النشرات السلامية لتلك الظروف تحت مسمى
منع الخسائر في آرامكوا .

دراستي في aramco itc

يوميا يوجد حصتين للسلامة الأولى Material safety
و الثانية The application of safety
و المادتين هذول يعتبروا من أهم المواد
وفي حالة عمل تيست سيفتي و شخص ما تقيد بالجرس الإنذار او اي شي يتعلق بهذا التيست
يعاااقب و ربما مهدد بالطرد من الدراسة

ومن ناحية النقطه الأخيره في الموضوع

فـي أيام زمان كــنت اتشائم إنـي عـربي
أقول ليش انا عـربي ؟؟؟!!!! العـرب متخلفين جهلاء و ما عندهم ضمير لـيسوا يد واحده مثل الغرب
و لـيش العرب دمية في أيدي الغرب؟؟؟!!!!!

لكـن اللحظة الـي حـسيت فيها انـي عـربي و مرفووع الرأس
هـي لحظة عـام 2006 عندما أتى النصر من سيد النصر
قائد لبنان السيد نصرالله
رجل بقول و فعل وعد الكل بأنه سيخرج من هذي المعركة منصور
(رغم شدة الإنتقادات المخيبه التي وجهت له من قائدي العرب)

و بإذن الله راح يتكرر هذا الإنتصار على اليهود و لكن هذه المره من أبطال حركة حمااس

كأني خرجت عن الموضوع حبتين …. لكن معليش حصل خير

و تقبل اخوي مصعب خالص تحياتي


اسم المعلق: ابو فيصل
6 يناير 2009, 10:16 ص

هذا يدل على شجاعة الشعب السعودي يامصعب


اسم المعلق: Onaizah Boy
9 يناير 2009, 10:23 ص

اهلين مصعب كيفك ؟؟؟

تدري وش المشكله عندنا ؟؟؟؟

لو يشتغل جرس الانذار بسوق مثلا .. تحصل فيه ناس تدخل السوق مو تطلع عارف ليش !! علشان يشوفون الحريق ع الطبيعه .. علشان كذا واعتمادا على ثقافة شعبي الحبيب حاليا ارجو ازالة اجراس الانذار :)

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: