تصنيفات

اخر ما كتبت

مدونات

مواقع ومنتديات

منوعات

ارشيفي القديم

تجربتي مع amazon.com

the best web site to buy from

the best web site to buy from

بدايته وشهرته كانت من تخصصه في بيع الكتب ودعم الكتاب ودور النشر وبعدها توسع حتى صار اكبر متجر الكتروني متنوع على الانترنت

الموقع هذا غير نظرة العالم للتجارة الالكترونية لانه دخل المجال في وقت كان التسوق عن طريق الانترنت ماهو مضمون وغير مرغوب عند الكثيرين . وعشان يحل هالمشكلة فتح له فروع في اكثر من ولاية بأمريكا وصار يخير زبائنه وقت الشراء بين استلام طلباتهم عن طريق التوصيل للمنازل او استلامها شخصياً من اقرب الفروع لهم . بالطريقة هذي كان يحسس الزبائن بمصداقية التعامل على الانترنت وفي نفس الوقت يريحهم من زيارة المحل في كل مرة يبون يشترون اي سلعة . بعد كذا صار يوجه الناس للشراء عن طريق الانترنت بطريقة ذكية وهي رفع الاسعار في المحل وزيادة العروض والخصومات على الانترنت . ومن الطرق اللي اعجبتني وزادت ثقة الناس بالموقع انه نزل عرض الدفع عند التسليم . بالطريقة هذي صاروا الناس يفضلون التعامل مع الموقع مباشرة حتى تم الغاء خيار الاستلام من المحل وبدا عصر التجارة الالكترونية يزدهر

من اهم العوامل اللي ساعدتهم على التوسع والانتشار هي خدمة العملاء الاكثر من راقية وخوفهم على سمعتهم .وما ادري اذا قد قلت لك اني قبل 5 سنوات تقريباً كنت اطلب منهم افلام دي في دي بإستمرار وكانت توصلني عن طريق البريد العادي . مرة من المرات وصلني الطلب ناقص مع ان الفاتورة اللي جات معه كانت كاملة . فقلت واحد من اثنين يا ان عيال الكلب اللي في البريد زرفوني او ان الامريكان نسوا يكملون الطلب قبل ما يرسلونه . بعدها رجعت للبريد وسألتهم عن الدي في دي المفقود فقالوا بكل برود (ما ندري بس اكيد انه ممنوع وتصادر) . تجننت ولا اقتنعت بكلامهم وجلست احاول اطلعه منهم حتى عجزت . فقلت مالي الا الامريكان !! وابشرك من رسالتين بس اعتذروا لي وقالوا الصراحة ما ندري الخطأ كان من مين بالضبط لكننا ارسلنا لك دي في دي ثاني مجاني وبيوصلك خلال 3 ايام مع البريد المستعجل . وصارت معي مرة ثانية وعوضوني عن قيمة الدي في دي المفقود رغم ان كنت متأكد مليون بالمية ان اللي سرقوني هم عيال الكلب اللي في البريد . بعدها حبيتهم وحولت على ارامكس وصرت ما اشتري الا من عندهم حتى ولو كانوا اغلى من غيرهم

التعامل مع الموقع كل فترة يزيد سهولة بسبب كثرة الخدمات والادوات المتوفرة قدامك لدرجة انك حتى لو واجهت مشكلة ما بتحتاج تراسل خدمة العملاء لان الحل بيكون موجود تحت قائمة المساعدة . التطوير المستمر عندهم شي مو طبيعي وكل سنة تزور الموقع لا بد تحصلهم ضايفين خدمات ومزايا جديدة تسهل عليك التسوق . حتى اذا حبيت تضيف اي اقتراح او فكرة وكانت فعلاً مفيدة كلها فترة بسيطة وتلقاهم منفذينها مع رسالة شكر لك . والكلام هذا ما اقوله من عبث لاني قد اقترحت عليهم كم اقتراح مثل اضافة الاصدارات المتوفرة من الدي في دي في نفس صفحة العرض لان الشغلة كانت متعبه شوي وكل ما بغيت اصدار الشاشة العريضة او اصدار النسخة المطوّلة كان لازم انسخ اسم الفيلم وابحث عنها من جديد . وفعلاً بعد شهر او شهرين لقيتهم منفذين اقتراحي ومرسلين لي رسالة شكر وهدية 25 دولار

العيوب اللي عندهم تعتبر بسيطة لان مميزاتهم بلا مبالغة غطت عليها . بس اول عيب بديت اواجهه عندهم هو عدم توفر مستشارين خاصين بكل نوع من السلع وهذي من اكبر عيوب التنويع وعدم التخصص في مجال معين . ثانياً ، صاروا يسمحون للشركات والافراد بعرض السلع عندهم وهذي تعتبر ميزة لانها اعطت الموقع تنويع اكبر في البضائع المعروضة بس في نفس الوقت صار الشي هذا يتسبب في تأخير الشحنات لدرجة ان التأخير ممكن يوصل لاسابيع وخصوصاً اذا كنت طالب انهم يغلفونها او يجمعونها لي في شحنة وحدة . واخيراً ، الجودة الرديئة لورق تغليف الهدايا رغم سعره المرتفع نسبياً

ادري اني طولتها عليك واعطيتك اكثر من المطلوب بس والله مو مني ولو تعطيني وجه صدقني ما بيكفيني فيهم 5 صفحات لاني من جد اقدر هالموقع وادارته المنتازة جداً حتى قد طرت علي فكرة اني اسوي زيهم على المستوى العربي بس مثلها مثل اي فكرة تمر على راس واحد سوداني

تحياتي لكـ .. في المرة الجاية خبرني من بدري حتى اخدمكـ بشكل افضل ..
محمد البيشي
www.bunique.me

Be Sociable, Share!

التعليقات


اسم المعلق: B Unique
6 نوفمبر 2009, 8:39 م

شكرررن مصعبش

ممكن نسخة من البرزنتيشن ؟!

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: