تصنيفات

اخر ما كتبت

مدونات

مواقع ومنتديات

منوعات

ارشيفي القديم

انتهى العام ولم اكتب شيئاً بعد !!

هاهو ذا عام آخر يمضي من حياتنا ..

هاهي ذكريات اخرى استحق وقت تسجيلها ..

هاهي الايام تمضي وتمضي وتمضي وتخلص وتخلص وتخلص <<< ماعندي مقدمة ،، ابكتب اللي في بالي من الاخير للأول ..

في نهاية العام الماضي ، كان المنفترض في آخر اسبوع ان اذهب برفقة والدتي الى جدة لزيارة خالتي التي تعبت تعباً شديداً واجريت لها عملية جراحية في الدماغ ، كانت والدتي تريد ان تراها وكنت انا المرافق ،، حجزت الرحلة بالطائرة لكن الساعة كم ؟؟ الرحلة كانت الساعة ونص ظهراً يوم الاربعاء في اعتقادي .. لكن الدلاخة الاليمة انها طلعت ١٢ ونص باليل من بداية يوم الاربعاء ..!يعني رحت بعد فوات الرحلة بـ ١٢ ساعة .. المشكلة اني قاص البوردنق ولا طرا في بالي اني اناظر فية واشوف وقت الرحلة الا في المطار !!! احسست بأحباط شديد .. فهذة دلاخة وغباء ما بعدة شي ..! المشكلة لو الرحلة لي عااادي فلتذهب الى الجحيم … لكن وش ذنب امي اللي كانت بتزور اختها ؟؟ والله وانا راجع من المطار ولمدة يومين بعدة حاس بضيق بصدري لا يعلمة الا الله لأني فعلا حسيت انت عقيت امي ذاك اليوم ..

الشيئ الجميل واللي خفف المصاب .. اني يوم رجعت البيت ونمت من التعب وصحيت .. لقيت رسالة بجوالي تفيد اني صرت ( عم :) ) وامي صارت جدة وابوي صار جد وخواتي صاروا عمات :)  اخوي الكبير جاة ولد ويتربى في عزكـ يا اخوي ..

من اهم احداث هذا العام ..  مدري .. احس مافية شي مهم ..!

قبل شوي صليت العشا في المسجد القديم في حي الشرفية بالرياض حيث بدأ كل شيئ هناكـ .. ذكريات قديمة .. كثيرة .. اسماء من الماضي ، نايف الدوسري ، سالم الشهري ، محمد عبد الرحمن ، بيت الزهراني ، بيت الشهري ، نورة ، ايمان ، عبد الله ، ابو عبد الله، عم عابد ، الله يذكرهم جميعاً بالخير ، اللهم من كان منهم حياً فاطل عمرة على طاعتك ووسع لة في رزقة ، ومن كان منهم ميتاً فأغفر لة وارحمة ..

نايف الدوسري ، هذا كان مشاغب الحارة رقم (١) .. مرة ماكنت ابي سيكلي وعطيتة واحد ضعيف في الحارة وقدام عيني جا نايف وقال : وش .. شايفني كرتون ،، تعطية سيكل وانا لا ..! واغتصب السيكل منة واخذة عنوة .. قدام عيني ،، المشكلة عندة سيكل .. الله يذكرة بالخير

سالم الشهري ، امام المسجد سابقاً .. لادري اين هو الان ، اذكرة هو واهلة جميعاً طيبي الذكر في حارتنا القديمة .. الله يذكرهم بالخير

محمد عبد الرحمن .. هذا لو القاة .. ان طلب مني اي شي ابعطية اياة .. ياما ظلمتة .. ياما ظلمناة .. كان يدرس معي واسمة بعد اسمي مباشرة بالكشف المدرسي .. كان لايستوعب الدروس جيداً فأثر ذلك على مستواة الدراسي فكان محل السخرية والاستهزاء ،، وكنت انا جارة المفروض اني ادافع عنة الا اني مع القوي .. كان دايم ينطق ويسامح ياما شاف من التهزيئ وصبر .. احس انة اذا ماسامحني في الدنيا فالله يعينني بالاخرة .. اذكرة مرة هبلت فية في المدرسة والحارة وفي العصر امة جاية بيتنا تشتكي ..! اسئل الله الكريم رب العرش العظيم ان يجمعني بة في الدنيا وان القاة واستسمح منة قبل فوات الاوان .

بيت الزهراني اللي على يسارنا ، بيت الشهري اللي على يميننا وفية واحد ثاني قدام بيتنا على اليمين اللي فية جارنا القديم ابو عبد الله وابنة عبدالله وبنتة ايمان وامهم ام عبدالله ونورة عاد مدري وش تقرب لهم وش عرفنا ذا الوقت !! اذا رحنا سوق الخضار مهما جبنا لهم منة نصيب نروح نعطيهم وفي الليل يجيبونة لنا مطبوخ !! الله يادنيا .. الحين جارنا اللي تحت ما اعرف وش اسمة !! الله يذكر ايامهم بالخير .. اللي اذكرة ان عبد الله تخرج وتزوج وايمان تزوجت من اكثر من ٥سنوات .

عم عابد .. صديق ابوي اللي ساكن بأول الشارع .. كنت اكرهة مدري لية ..! الظاهر كل ما اشوفة كان يعبس بوجهي يقال لة يخفوني او يفرحني … كان عندة حوش قريب من المسجد والبيت في حيوانات بط ودجاج ومن ذا الحيوانات الاليفة الظاهر اني كنت اكرهة لهالسبب هع هع .. كان ابوي اذا سافر هو اللي يهتم بشؤون البيت وكان يوصلنا المدارس بالمازدا مويل الف وتسع مئة وخشبة :) .. عم عابد توفي قبل اكثر من ٧ سنوات رحمة الله رحمة واسعة واسكنة فسيح جناتة .. من بعد مادريت انة توفى صرت كل ما امر جنب حارتنا القديمة اذكر دعاء زيارة المقابر ( السلام عليكم دار قوم مؤمنين ، السلام عليكم ورحمة الله وبركاتة .. انتم السابقون ونحن الاحقون .. اسئل الله لنا ولكم السلامة  والعافية ) .. كل ما امر حارتنا القديمة ،، اذكر الماضي الجميل وبراءة الطفولة ،، اذكر يوم كان جدي يزورنا بين فترة وفترة .. اذكر عماتي قد اجتمعوا في ذاك البيت ،، اذكر ايام صدام حسين – رحمة الله – وايام الاقنعة والشطرطون على النوافذ .. اذكر ايام رمضان وابوي يروح يصلي التراويح وانا ابي اروح معة ويقول بعدين ، صلاة طويلة .. اذكر حوشنا اللي كاااان كبير وبركة الموية والنخلة وشجرة التوت الكبيرة <<< مصعب وينة ، فوق الشجرة ،، لية فوق الشجرة ؟ <<< امة ماتلحق تطقة هع هع .. وقفص الحيوانات الكبيييييير اللي بركن البيت لو بقعد بكتب عن ذكريات هالبيت بأضطر ارفع مساحة موقعي ٣٠٠٪ !! مع الاسف في الزيارة قبل الاخيرة للحارة القديمة .. الحوش القديم الي كان كبير كان يهدم ، وانحطت مكانة اساسات عمارة جديدة ،، الحين فية عمارة مكان الحوش .. وتذكرت شجرة ورق العنب << مدري هي اسمها صح كذا خخخ كانت تنبت عند المسجد ، وكل فترة امي تقول رح اقطع من اورق الشجرة عشان نسوي ورق عنب :) آآآه يا ذيك الايام .. ايام ما كنا نطق باب الجيران ونقول لهم : امي تسلم عليكم وتقول عندكم صلصة :) .. فية شغلة حلوة قبل ما اطلع من الحارة .. سلمت على ثلاث شباب بعمري وانا طالع من المسجد .. ردوا السلام بشكل كامل ، اما الحين بحارتنا الجديدة .. مدري وش السالفة ما ودك تسلم اصلا ًًً!!!

يبدوا انني استرسلت كثيراً في ذكريات الماضي ، فلنعد الى ١٤٣٠ هـ

من الاحدات الرائعة هذا العام ، اني طلعت للأمارات مرتين ، والسنة اللي قبلة مرة وحدة .. يعني السنة الجاية لازم اطلع ٣ مرات :)

ايضاً من اهم الذكريات التي لاتنسى ، طلعة الـ ٦٠٠٠ ريال <<< قيمة الشالية لـ ٢٢ ساعة في البحرين مع قروب هوندا ارابيا مع اعز اصدقائي اللي عرفتهم عن طريق النت من قبل ٣ سنوات واكثر طلعة جيدة واللي يبي يشوف التقرير حقها متى ماقابلني اورية اياة ، موثق بالصور والفيديو وكتابياً بالاحرف :) هع هع من قصر شبرا المخيس الى شالية في جزر مرجان خخخخ

من اهم الاحداث هذي السنة اني عديت الترم الثاني ( الترم قبل التخرج)  في معهد الادارة بمستوى جيد حيث توقعت انني لن اتوفق مع الاستاذ / خالد الوهيبي – حفظة الله – هذا الاستاذ كان اسمة مرعباً قبل ما اعرفة او اشوفة ، كنت اسئل اخوياي عن الترم الجاي وكيف المواد كلهم قالو الا خالد الوهيبي لا يدرسك مافية امل تنجح جب معك مدرس راجع اول بأول ومنهم ٢ من اخوياي سقطوا عندة .. قلت بس ،، هذا ملك الموت بشكل مصغر ..! وبدأت الدراسة ومن سوء الحظ طلع يدرسنا خالد الوهيبي مادة المحاسبة .. اول اختبار مفاجئ جبت حفلة فية .. اول اختبار نصفي اللي كانوا مخوفيني منة الشباب طلع مرررررة سهل وتافة وحقدت على نفسي اني ماذاكرت زين والسبب اني متوقع ان الاختبار بيجي صعب وملعون والدين بسبة كلام اخوياي واستنتجت ان العيب في اخوياي موب في المدرس ابداً ابداً .. اثنين من اخوياي اللي كانوا معي ايام اللغة لازالو للحين ما ادري كيف ينجحون وانا ما ادري كيبف وثقت بكلامهم ، وكل اللي استشرتهم الباقين ما كانو يذاكرون .. من بعدها وانا مع المدرس اول بأول والواجبات تمام والمشاركة تمام ونجحت عندة بأكثر مما كنت اتوقع كثيراً بفضل الله ، ثم بفضل المذاكرة الجيدة والشرح المتميز من الاستاذ … يمكن عيب الاستاذ الوحيد وانا اعتبرة ميزة ،، انة يحتفل بالطالب خخخ : يا كمخة ، والله من الكماخة ، وامثلتة ظريفة ، وطريقة التريقة عندة رهيبة <<< استفدت منة كثير خخخخ … والضحية احمد عمر والبيض حسن عاشور خخخ

اليوم وقبل قليل نشرت التدوينة اللي بدأت كتابتها قبل اسبوع ..! اليوم ٨-١-١٤٣١هـ اصبح عمري ٢٤ عاماً .. وها نحن نفرح بالايام نقطعها وكل يوم يمضي يدني من القبر ..

قبل عشرة اشهر ( فبراير الماضي ) كتبت موضوعاً عن صديق لم اقابلة منذ ١٠ سنوات ..! افترقنا على خير ايام كنا لاعبي سباحة في نادي الهلال .. وكتبت في آخر الموضوع امنية برجوع صديقين آخرين ..

قبل امس ،، اتصلت على هاتف بيت صديقي ابراهيم بن سعيد العمري ، وكنت اتصل برقم جوالة فأجدة خارج الخدمة واحدي المرات اتصلت ورد شخص اتضح انة ليس ابراهيم فأضطررت للأتصال ببيتة فردت والدتة وعرفت بنفسي وسألت عنة المختصر المفيد ان رقم بيتهم ماتغير واسمعتني اخباراً طيبة ،، ابراهيم توظف في ارامكو بالمنطقة الشرقية واخية الاكبر عبد الهادي ملكتة يوم الاربعاء ، وعبد الرحمن توظف << اعرفهم وكذلك يعرفهم اخي الاكبر  وقالت لي اعد الاتصال يوم الاربعاء بيكون ابراهيم بالرياض وماكان يحضرها رقم جوالة … سالفتي مع ابراهيم انتا كنا اصدقاء ايام الثانوي نطلع مع بعض دايم واول مرة اخش المملكة << حقت الوليد :) كانت مع ابراهيم واول مرة اجد نفسي على ارتفاع ٣٠٠ متر مع ابراهيم ،، دارت الايام وحصل سوء تفاهم بسييط بالجوال وكنا منفعلين وقتها وافترقنا .. ومن ذاك اليوم .. مايمر وقت ولا اغنية الا واذكرة ، السالفة صارت قبل خمس سنوات تقريباً ..

جا يوم الاربعاء واتصلت على البيت ورد ابراهم صوتة ماتغير .. مثل ما اعرفة سلمت علية واخذت اخبارة وعلومة <<< هو كان مستعد انة فية شخص بيتصل فية لكن والدتة نسيت اسمي ، ذكرتة ان فية سوء تفاهم حصل بيني وبينة قبل سنين واعتذرت لة قال مسموح ومابيننا شي والله يسامحك دنيا وآخرة لكن ذكرني بأسمكـ ، قلت اهم شي ان العفو طلع منك وانت باقي ما تعرف اسمي ، معك مصعب الزيادي وكنت تسميني الكيماوي <<< كنت ادرس كيماء بالكلية التقنية .. هو بس عرف اسمي وانواع الترحيب ويقول اصلاً حنا وش اللي فرقنا ؟ اذكر كنا اخوياء قلت لة السالفة تافهة ولا تستحق الذكر اصلا بس الشيطان يكبر هالامور وياما ناس بينهم رقاب وتسامحوا وحنا على لا شيئ نفترق .. وخذتنا السوالف ربع ساعة وعطاني رقم جوالة .. وتوادعنا على خير .. الله يحفظك ويرعاك يا ابراهيم ..

باقي نواف بن مقبل الشنان الله يسمعني عنة اخبار طيبة ..

قبل سنتين تقريباً عرفت مجموعة من الاشخاص عن طريق النت .. لكن هالسنة استحقوا ان يكونوا اكثر من مجرد اصدقاء .. ما اجمل الجلسة وياهم ، وياحلاة سواليفهم ، القعدة وياهم ما تنمل لو تقعد تناظرهم بس !! موسى الربيعان وابراهيم البرجس نسيت شي بعد .. يازين طبخهم وما الذة … ابراهيم في نهاية شهر ذي الحجة سافر الى امريكا مع دوامة ويقطن الان بين العواصف الثلجية في منهاتن في نيويورك ، الله يرجعة لنا ولأهلة بالسلامة .. موسى خخخ قبل امس نايم بالاستراحة من الفجر ولا صحى الا لوحدة الساعة ١ الظهر خخخ موسى مدرس فيزياء كويس ، وماشاء الله لو تكلم تسمع الحكمة والتجربة منة ..

في هالسنة الماضية رجعت للماضي وحضرت المعسكر الكشفي ( جوتنا والجوتي ) ..! كنت بالكشافة قبل حول ١٣ سنة ، واذكر ابوي كان يودينا بالنيسان لوريل موديل ١٩٨٦ ، واذكر مخيماتهم الفلة وتعلم المرجلة بالكشافة وشغل البر وكيف تسوي وكيف تربط والاسعافات الاولية ، موب الحين تدرس مادة الوطنية وتطلع ما تعرف تدبر عمرك في حياتك !! <<< اقتراح اليم : يجب ادخال مادة الكشافة الى مدارسنا حتى نشوف جيل يعرف يدبر عمرة ويدبر نفسة بدال اشباة الرجال ولا رجال اللي قاعدين نشوفهم بالمدارس !!!

مع بداية عام ١٤٣١ هـ انتظمت بفرقة سواعد الكشافة في مدينة الرياض ،، :)

الموضوع يتحدث وفي طور التحديث …

 

Be Sociable, Share!

التعليقات


اسم المعلق: علي الصويلح
1 يناير 2010, 3:28 ص

المهم كل عام وانت بخير ياصديقي مع اني ماكملت القراءة بسبب طولها :-D


اسم المعلق: مهدي توفيق
3 يناير 2010, 1:22 م

ما شاء الله عليك أخ مصعب .. تدويناتك جمـيلة جداً ..
ويظهر اني سأكون متابع دائم لك ..

ما جاء بي إلى هـنا هو “الأستاذ خالد الوهيبي”

اليوم ونحن في مجاظرة المحاسبة نوهـ الأستاذ على ان ما يقال عنة تهويل وان علينا بالحكم بما نراهـ لا بما نسمعة ..
وذكر لنا _من باب الشئ بالشئ يذكر_ مدونتك ..

حيث قال لنا مثل ما كتبت هنـا انك من هول ما سمعت عن الأستاذ خالد الوهيبي انك تخيلتة ملك الموت المصغر ..

وأعاد المرجع الى مدونة مصعب ..

تحياتي .. مهدي القضيب


اسم المعلق: ابوجمانه
7 يناير 2010, 10:40 م

اول شي اهنيك على الاسلوب الاكثر من رائع

بصراحه قريتها اكثر من ثلاث مرات ولا مليت

وشكرآ على هذا الاطراء الجميل

وبأذن الله اذا رجعت طبخت لكم ذاك الحاشي الي يحبه قلبك

بس اهم شي شطه السومطره والمايونيز :lol:


اسم المعلق: عمر
15 يناير 2010, 7:09 م

مصعب كل عام وانت بخير على العام الهجري الجديد
وسجلني من متابعي توديناتك :lol:


اسم المعلق: خالد صالح الكويلي
2 نوفمبر 2010, 2:02 م

السلام عليكم ورحمة الله وبركاته اريد ايميل المشاركين فقط


اسم المعلق: مجهول
6 فبراير 2012, 3:13 م

يسعدني ان أقرألك..

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: