تصنيفات

اخر ما كتبت

مدونات

مواقع ومنتديات

منوعات

ارشيفي القديم

احشش اسبوع ..!

* العنوان لا يدل على اني احشش خخخخ :)

اما صراحة الاسبوع الماضي // افضل واحشش اسبوع دراسي مر على بالتاريخ .. احس اني في اجازة مع انة باقي على تخرجي اسبوعين فقط ..! باقي على الاختبارات النهائية اسبوعين فقط ..!

نبدا من يوم الجمعة الماضي ، المفروض كالعادة كل يوم بعد العشا اذاكر مع احمد وحسن ، يوم الجمعة وبما انني منتظم في جمعية الكشافة العربية السعودية جتني دعوتين ليوم السبت : الاولى على شرف الملكـ عبد الله بن عبد العزيز – يحفظة الله – في فندق الانتركونتنينتال ، والثاني على شرف قائد الكشافة في المملكة العربية السعودية الامير فيصل بن عبد الله بن محمد آل سعود وزير التربية والتعليم  في فندق الفور سيزون في برج المملكة ،،،، احترت وش اختار ؟ وين اروح .. بعد الحيرة اخترت اني اروح لفندق الفور سيزون :) لأنة اجدد واحدث وفي برج المملكة اللي طولة ٣٠٠ مثر :) بينما الانتركونتنينتال قديم ومسطح وما ابي اروحة وفية سبب :) ان الملك عبد اللهكان من المقرر انة يحضر  حفل في نفس المكان بمناسبة مرور ٥٠ عام على افتتاح معهد الادارة بس ما حضر ، فقلت في نفسي يمكن بعد ما يحضر هالمرة وصدق ظني ، اخوياي راحوا ومعاهم دعوات شخصية ولا حضر الملكـ :)

المهم اني حضرت حفل السبت في الفور سيزون واستمتعت حتى آخر قطرة وصورت مع الامير ، ومع يوسف الجراح << مثل على المسرح حق الفور سيزون .. وتعشيت ثاني اطلق عشا في حياتي بوفية مفتوح ..

طبعاً يوم الاحد كان عندي اختبار اصعب مادة // المراجعة والتدقيق ، الحمد لله اختبرت وفي رواية اخرى احتفلت خخخ .

يوم الاحد مساءاً اللي اذكرة اني سحت ولا ذاكرت مع القروب // (( وفي هذة الاثناء كنت اخطط لمشروع يوم الاثنين مع محمد الفريان ))

يوم الاثنين عندنا محاضرة وحدة // واحمد وحسن مستغربين من تصرفاتي الغريبة مافية الا قوة رسايل بالايفون <<< اعلمكم معي ايفون 3gs بعد ، لا و ٣٢ قيقا بعد  // قالو وش فيكـ // قلت ابد بس في جرية عظيمة بسويها اليوم // قالو وش؟ // قلت ابد اعلمكم بكرة ، لا تصيرون بثرين << خخخخ // تكفى علمنا // اجل خلاص بعلمكم اليوم لما اذاكر وياكم لأختبار بكرة الثلاثاء ( محاسبة ) <<< وفي النية تسمعون بالجية للمذاكرة ..

طيب باقي شوي وتنتهي المحاضرة وابي اطلع اتصل ، الا المدرس يعطينا بريكـ دقيقتين هو نفسة يبي يكلم جوال // واطلع وعلى طول اكلم صاحب الرسايل ، وتمت المهمة بنجاح والوعد عند سيارتي الواقفة برا المعهد الساعة ٢ بالضبط ..

الساعة ٠١:٥٥ ظهرا مصعب يرفع يدة يبي يستذن ويطلع ويطلع الشرح مهم والاستاذ ما عطاة وجة وارسل رسالة ( اللعنة ، ابتأخر دقايق ) ويجي الرد ( اوكي) وتنتهي المحاضرة واقرب طريق مختصر لسيارتي ،، واخذ الاغراض المهمة واركب مع ولد الفريان والرسايل اللي قبل كلها عشان من يجب الغدا ووضع الغدا كيف واتفقت معة انة يجية من اقرب ماكدونالدز عشان نكمل الخطة سريع سريع //

مصعب وينة ؟ مصعب وين رايح ؟؟    مصعب رايح البحرين :)    <<< طيب مصعب بكرة عندة اختبار محاسبة << بيروح البحرين <<< طيب مصعب باقي لة اسبوعين ويتخرج <<< الا بيروح البحرين ، طيب بكرة دوامة من الساعة ٨ <<< الا حالف يروح البحرين ..!

كيف هذا ؟؟ الفريان لة اسبوع ممسكة معة الا يطلع يشوف الفلمين الرائعين ٢٠١٢ واللذي يتحدث عن نهاية العالم << على قولة شعب المايا ، المهم كلة خزعبلات مبني على حقائق وحقائق مبنية على خزعبلات :) ، والفلم الثاني فلم آفاتار << بروضوا فلم خرافي فاتني منة ٥ دقايق  لكن المختصر منة انهم وجدوا حياة على كوكب آخر ومن هالسواليف ، الشي الرائع والمحمس ان الفلم 3D يعني ثلاثي الابعاد يعني يعطونك نظارة وتلبسها وتشوف الفلم ، بدون النظارة تشوف الفلم مشوش :) وفجأة تحس انهم تاكين معك ذا المخلوقات الفضائية ، وفجأة تلاقي نباتات جنبك ، وفجأة تلاقي الرصاص والصواريخ منطلقة عليكـ ،،، هيك الحياة والا فلا :)

المهم مسكنا الخط مع الغدا والتحشيش في بداية الخط اننا وقفنا في محطة خارج الرياض نعبي بنزين ، الا نلاقي قطو قاعد يحفر في الشارع في الازفلت !!! يبي – يقضي حاجتة – وانتو بكرامة ، وش فية هالقطو !! المكان كلة رمل وصحراء الا يحفر في الشارع !! واصورة صورتين الا محمد يقول صور فيديو ، واصورة فيديو بالتعليق بعد خخخخ

التحشيشة الثانية بعد ما صلينا العصر ومشينا من المحطة ، الا فية ذبانة معنا ، ويفتح محمد الدريشة قلت لة تراها باقي ما طلعت << ولا عرفنا مكانها .. وبعد شوي طلعت مرة ثانية :) المهم قاعدين نهشها ونشها اطلعي ونفتح الدريشة شويي وعيت تطلع ، الحل الاخير ( القتل ) هع هع المهم خذيت كيس وحجرت لها ومسكتها داخل الكيس وامسك جناحها بيدي وانواع الافكار الشريرة خخخ استقريت في الاخير على تصويرها فيديو وانواع التعليقات / تبين تروحين الشرقية ببلاش هاااة ، ، وانا ماسكها من جناحها وافتح الدريشة وعلى سرعة ١٥٠ كم/س اطلعها من الدريشة وعيا جناها ينقطع ومع التصوير والتعليق والضحك فلتها وذهبت الى الجحيم ..

على الساعة ٦ كنا واصلين الحدود ، ساعة الا ربع ساعة ونحن في مجمع الدانة ، على طول شفنا الاوقات وحجزنا مقاعد في الفلمين الاول يبدا تقريباً ٨ وربع ومدتة ساعتين ونص هو فلم ٢٠١٢ ثم على الساعة ١٢ الفلم الثاني Avatar ، بعد حجز الافلام طلعنا مع يوسف وعمر << ٢ نفر من الاحساء اخويانا ، طلعنا نتمشى في احد الاسواق الشعبية واكتشفت ان البحرين حلاتها في اسواقها الشعبية كبيرة واسعة ورخيصة نوعاً ما ،، // فجأة جوالي يدق ، المتصل حسن يتوقع اني ابجي اذاكر : وينكـ يا كلب ، وينك ياحقير ، سويتها والله اهنيييييك << طبعاً لأنة سمع النغمة الدولة قلت لة اني بالبحرين والسالفة وراجع بكرة // حان موعد الفلم الاول .. ٢٠١٢ قد شفتة قبل في دبي ، لكن هالفلم ما ينمل منة ابد ، انواع الدمار والمؤثرات الصوتية الجبارة ..

لو اقعد اكتب التفاصيل ماني مخلص الا بعد ٢٠ صفحة …

خلص الفلم الاول ، الجوع ياكنا ، تعشينا في نفس الطاولة لكن من مطعمين مختلفين :) صلينا المغرب والعشا ، حان موعد الفلم الثاني وحنا قاعدين نتمشى متوقعين كالعادة ان اول ربع ساعة دعايات ، خشيت الساعة ١٢:٠٥ راحت ٥ دقايق من الفلم لكن صراحة تجربة الـ 3D اكثر من رائعة ..خلصنا من الفلم الساعة 02:35 فجراً تقريباً ..

طلعنا من الفلم كننا محششين ،، كننا مسطلين !! انا قاعد احسب الوقت ومحمد يحسب الوقت .. اذا مشينا ١٨٠ متى نوصل ؟ اذا ١٥٠ متى نوصل ،، محمد مايبي يسرع عشان مخالفاتة وصلت مبلغ وقدرة وسددها قريب ، قلت ماعليك انا اسوق .. اللي استنتجناة ان وصول الرياض بكون حول الساعة ٧ او قبلها بشوي !! قاعد افكر متى اذاكر << ماخذ اوراق المادة معي يقال لي ابذاكر بالطريق ..!

محمد ع الجسر عند منطقة دفع الرسوم ٢٠ ريال وبعدة بشوي احسب اننا خلاص خلصنا الاجراءات اقول لة لا يردك الا محطة سحاب ، الا اشوف الجسر من بعيد المرتفع اللي تخش من تحتة السفن !! واقول هيييية حنا بااااقي ما وصلنا الجوازات !! ومحمد يفقع ضحك على يقول يالمسطل اصحااا باقي الجوازات والجمارك ، قلت ايييية تراني ابلحق ع المحاضرة ،،

خلصنا الجوازات والاجراءات ، وصلنا محطة سحاب ، وامسك الطارة ( وفي اليد الاخرى باور هورس << ولا كان الحين تلقوني في حياهـ اخرى ) ، وما تشوف الا المكينة تشتكي // وصلنا الرياض الساعة ٦:٢٠ صباحاً .. الساعة ٦:٣٠ دقيقة خاش مواقف المعهد الفااااضية واوقف في اطلق موقف طبعاً الثوب جاهز بالسيارة .. غيرت ملابسي في مواقف المعهد

طلعت المسجد توضيت وغيرت الشراب << وفي رواية الجورب وضبطت الاوضاع وصليت الفجر ورجعت للسيارة واحط المنبة على ٧:٤٤ دقيقة وخذلك نومة ..

داومت نص محشش !! عقل مافية ،، خلصت المحاضرة الاولى ، والمحاضرتين الثانية <<< تراي ما نمت فيها ابد ..! محاضرة الاستاذ خالد الوهيبي ، ثم بريك ساعة واربعين دقيقة اللي المفروض اذاكر فيهم للأختبار اللي بيكون الساعة بين الساعة ١٢ و الساعة ٢ … طبعاً افضل شي تسوية انك تنام في السيارة وتركز في النوم عشان تستعد للأختبار :)

قمت على وقت الظهر <<< المنبة طبعاً ، وعلى الاختبار شي طبيعي انك منت مستوعب شي بالاختبار على الرغم من انة كان عبارة عن قيد محاسبي واحد تكتبة وعلية ٥ درجات <<< بس مدرسنا الله يصلحة من يوم ما عرفتة يشرح كل شي وفي الاختبار يجيب عكسة تماماً ، دايم يشرح لنا حالات الربح ويجنا في الاختبار حالة الخسارة .. ٩٠٪ من الشعبة خذوا صفر من خمسة <<< انا واحد منهم :)

انتهى الدوام ، رجعت البيت .. العصر نمت احس راااااسي ثقيييييييييييل وما صحيت الا بعد صلاة المغرب … بعد العشا رحت الاستراحة واحس اني مكسر واحتاج للطاقة ، رجعت على ١٢ واحلى نومة الى ١١ من اليوم التالي .. يوم الاربعاء محاضرة وحدة ، وانتهى احلى واحشش اسبوع ..

الخلاصة //

١- لازم يصير عندك اخويا فلة ، لازم تستمتع في كل دقيقة من وقتك ،

٢- اذا كنت على وشك التخرج من معهد الادارة ( يوجد اسبوع اجازة بين نهاية الاختبارات وبداية فترة التطبيق ) هذا الاسبوع يجب ان تستغلة ابشع استغلال وتسوي كل اللي في راسك ، لأن اذا كتب لك التوفيق في التطبيق وتوظفت في نفس البنك او الشركة فأنة اقرب اجازة بتجيك بعد سنة !!!

 

للحديث بقية ، الجو رائع ، بطلع وادي حنيفة ///

Be Sociable, Share!

التعليقات


اسم المعلق: B Unique
22 يناير 2010, 8:38 م

هو صحيح “لازم تستمتع في كل دقيقة من وقتك”
بس لا تنسى ان الحياة وقت ، أولويات ، وفرص

وين فيديو الذبانة ؟ :mrgreen:


اسم المعلق: علي الصويلح
24 يناير 2010, 5:59 ص

هههههههههههه

خلك مع المسكه الغلط :-D

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: