تصنيفات

اخر ما كتبت

مدونات

مواقع ومنتديات

منوعات

ارشيفي القديم

الشعب الظريف والمطر والبرودكاست .. (1)

في البداية .. صدق من قال .. المطر ، المفتش العام ..! بعد واثناء المطر تطلع فضايح البلاد والمقاولين .. شكراً للمطر .. ولكن من سيحاسب المقاولين والمفسدين ؟؟

فجع الرياض يوم الاثنين ٣-٥-٢٠١٠ بعاصفة رعدية ممطرة .. سالت على اثرها حواري شمال الرياض الفارهة( نوعاً ما ) وكذلك الشوارع الرئيسة والاودية وفاضت مياة التصريف الارضي !تخيل تشوة الشارع مليان موية وفية نبع يطلع منة ! اي ؟ التصريف الارضي مضغوووط ع الاخر … كذلك تأثرت العديد من المباني ، منها مبنى الشركة التي اعمل فيها ، مبنى جديد في حي المروج في طريق الملك عبد العزيز قريب من نفق الامام سعود وتقاطعة مع الملك عبد العزيز اللي غرق هو الاخر وانهدم جزء منة حيث كان تحت الصيانة // المبنى حق الشركةة ٣ ادوار ، الدور الثالث فخم وفاخر بمعنى الكلمة .. كلة غرف اجتماعات وقاعاتتفتح النفس وصالة طعام لما بعد الاجتماعات وحدائق تفتح النفس !! المهم ان منسوب الماء فيها تجاوز الـ ٣ سم !يعني اي فيش كهرباء في الارض غرق موية <<< كويس انة في اللحظات الاخيرة تم فصل الكهرباء بالدور الثالث .. غرق كل شي فية .. من مكتب المدير اللي فية سمك وكرسي مساج الى كل ابو كل شي :) << وصف دقيق ومعبر .. في اللحظات الاخيرة قبل فصل الكهرباء تم ازالة اي جهاز كهربائي على الارض :)

مواقف سيارات المدراء .. وقدام الباب اجتمع كل الموظفين يشوفون بداية العاصفة .. يا جماعة .. فية نخل في المواقف لة ورق مدري سعف مدري وش يسمونة /// لونة اخضر .. صورت النخل اثاء العاصفة كنه ورق يلعب بة الهواء … بعد العاصفة كأن فية اكوام جراد مرت على النخل ! السعف مابقى منة الا ٤ لونها اصفر ! <<< ابي اعرف كيف تغير اللون اصلا !

المياة داهمت اغلب المكاتب ومنها مكتبي <<< لكني شي خفيف مرررة ولا يذكر << لاكن وخرنا اي شي قريب من المياة كالمكاتب او الملفات ،،،

صراحة اطلق شي بالموضوع انة قبل العاصفة .. والبرودكاست شغال

* انا بحي الصحافة البرٌد كسر مواترنا

* عاصفة شديدة ممطرة قادمة من الشمال

* غير الاتصاالات .. واحد يقول الدائري الشرقي طاح فية عمود ..

والثاني يقول النفق مليان ..

والله لو تشوفون منظر الموظفين والرعب يدب في قلوبهم عند الباب المطل على مواقف السيارات .. وجي اطلق موظف شفتة بالصندوق ملتحي وملتزم وأسلم على يدة بضع عمال نظافة ممن يعملون بالشركة  ، والله انة يدعي بصوت جهور يبعث الاطمئنان الى القلب ، اللهم اجعلها رياحاً ولا تجعلها ريحاً ، اللهم حوالينا ولا علينا ..

خف المطر بعد فترة .. العاصفة الممطرة ما طولت كثير .. ققررت الذهاب للبيت .. الساعة الان تشير الى الـــ٣ـــــالثة عصراً ..

طلعت جهة النفق تقاطع الامام سعود مع الملك عبد العزيز ولا القى سيارتين بسرعة يوقفون ويروحون يم النفق يناظرون !! بما ان هالحالة ما تصير الا مرة كل ١٥ سنة تقريباً <<< اخر كارثة مشابهة حصلت بالرياض كانت بعام ١٤١٦ ، وكانت لا تنسى ،،، وقفت سيارتي ونزلت الا اشوف المسبح في النفق !!الجيوب تمشي ، المهايط صاحب السوناتنا مشى ،، اللي يبي السلامة عكس ورجع //

الظررريف في الشعب ، انة كان في هندي بوسط المسبح واقف يمشي على رجلة بقطع المكان ، اوكي جوك بيض وبكيفك .. الا جت سيارة ورشت علية موية بهدوء خخخخ الا الهندي عصب وقام يرش موية على السيارة !!! يا بوي بلحاااااالك ،قاعد في موية في مسبح وما تبي احد يرشك وترش سيارة بيدك !! تدرون وش اطلق شي في الشعب السعودي ،،، يوم شاف المنظر كذا الا ويصفقون للهندي ويصفرون ويصايحون ويشجعون الهندي تقول والله كأنك في ديربي العاصمة في استاد الملك فهد ، شعب يعجبك، شعب فلللللللة رغب الكارثة ورغم المصيبة ..

الحين بدأ الابتلاء وبدأت المحنة بالنسبة لي ، يبغالي اطلع من الغرق اللي انا فية بسيارتي لبيتنا على بعد ٢٦ كيلو !! ( استغرقت الرحلة مايقارب ساعتين ، بنما في الظروف العادية جداً ٢٠ دقيقة )

خلوكم معي بالصورة // مخرج ٩ كلة على بعضة غرقان بكل انفاقة .. طريق الملك عبد العزيز بآتجاة الدائري صارت فية بركة ولك ان تتخيل شعورك اذا شفت جيب عاكس وراجع ، يعني ايش بتسوي بالاكورد حقت ، لا ومهبطها بعد ! انشب وابلش يا مصعب ..

مافية الا حل الحواري … اقسم بالله ان حواريهم حالتها صعبة !! كلها السيول تمشي فيها موب تمشي ،، الا تجري وماشية مليون تقول شعيب موب حارة ! .. مالك تمشي مع الناس والموت مع الجماعة رحمة ، مع الضعوف امثالك اللي معهم كابرس وسوناتا ، المشاعر وحدة ،، تفتحون الداريش تاخذون العلم عااادي …انحجرت جوا حارة لفيت الا وراي ٣  سيارات المنظر اللي شفتة مالة حل الا ترجع ريوس ،،، مستوى الماء اللي شفتة يكاد يوصل الى نص متر !! ويجري ..انا انحجرت ووراي ذا السيارات والمكان ضيف مايمديني ارجع لأن بجنبي حفرية .. قلت مالك الا رجلك بالمكينة وتشق الموية بأتجاة غير معروف اوكي ابطلع يسار مع ذا الموية اللي توقعت انها نص متر ثم شارع عام ما ادري وين اروح وبرضوا نص متر .. اقسم بالله ان الموية واصلة لين المرايات الجانبية ومغطية كمبوت السيارة .. يعني بالعربي قاعد اسبح مني قاعد اسوق لأكثر من ٣٠ مثر والحمد لله وبفضل الله وحدة السيارة ماجاها شي ورجعت على اقرب حارة مستوى الماء فيها قليل واحط القير بـ n  وادعس بنزين لا تطفى السيارة والماء اللي في اماكن بايخة يطلع ، والله قلبي رايح فيها وانا اذكر الله واسبح الله مستحيل هاللي صار ومشت السيارة … لآني قبل شهر مشيت بماء عمقة نص متر تقريباً ( ولم اكن اعلم انة بهذا العمق لاني دايم امشي بنفس الشارع وما توقعتها اكثر من ١٠ سنتي متر ) مسافة ١٠ متر وفي آخر مترين السيارة كانت بتطفى وطلع لي صوت بالمكينة وخرب فيها شي ، لكن هالمرة عدت على خير بأمر الله سبحانة //

احياء شمال الرياض في تصميمها على شكل مربعات ^^ السالفة اعلاة كلها في مربع واحد ! لسى ماطلعت ولا شي ..! مافية الا حل انك تخنبق الين ما تلاقي مخرج ..في النهاية رجعت لنقطة البداية ،،، تقاطع الملك عبد العزيز مع الامام ، ولكن هالمرة بأتجاة الجنوب ..

تخيلو الموقف ،، زحمة .. اشارات متعطلة مافية مرور ، المواطنين هم من ينظمون السير ، صدفة لقيت شاحنتين للدفاع المدني ،، وبطلع بأتجاة الجنوب ،، هذا المطلوب وراااهم لين مالقيت طريقي للملك فهد ،، في هذة الاثناء البرودكاست شغال وتوصلني الاماكن المقفلة والاماكن الغرقانة واخوياي بالاستراحة  حول ٧ منهم راحوا للثمامة .. حسب البرودكاست فأني محاصر من كل الجهات ومالي حل الا الثماء ، قعدت بطريق الملك فهد من جهة الملك عبدالله تقريباً الى هايبر بندة حول ساعة ونص او ساعتين ،، لان في هذيك المنطقة بركة ، الشعب ماقصر اللي عندهم برنامج trapster شغالين الموقع هذا غرقان ، وهذا فية حادث وهذا مقفل وكل هالاخبار تجيك بالخريطة وكم باقي من مسافة وتوصلة ..

وصلت الثمامة .. الشباب تاكين .. قعدنا لين انتهى العصر ، والمغرب فوق الطعس نصلح شاهي ، ومع اذان العشاء بدأ قصف المطر :) اجبرما على النحشة .. الخطة كانت للأستراحة .. لكن اذكر اغلب البرودكاست الا كلة عن شرق الرياض ، فقلت ابي ارجع البيت لأني كنت موقن ان شرق الرياض كلة ازمات /// في طريق رجعتي ، سيارتي سفينتي غواصتي اثبتت جدارتها .. لا تسألوني كيف وصلت ، لان كل الطرق اللي جربتها بديلة واول مرة اجيها ، اشوف بس مكتوب ان الشارع بأتجاة الغرب امشي معة ، تقطعك ٦٠ الف بركة موية وتشوف العالم راجعين مالك الا ترجع معهم ..  الامور طيبة .. وصلت طريق الملك خالد وكان عندي احساس ان مخرج الجسر المعلق مقفل … طلعت مع طريق الوادي <<  وادي حنيفة .. طلعت آخر مدخل / مخرج اعرفة لة مع امتداد طيق الامير مشعل بن عبد العزيز واول ماوصلت لمدخل الوادي .. الا الدورية مقفلتة .. واناظر في الوادي الا هو مليااان .. استبشرت خير عسى ان السد يصير مليان << آخر مرة اذكرة كان مليان قبل اكثر من ١٠ سنوات ومن بعدها قحط ..

رجعت لطريقي وطلعت مع طريق عبدالله بن حذافة السهمي ( احد مداخل حي السفارات ) للمدخل الثاني للوادي اللي اعرفة .. الا هو مفتوح والموية تمشي في طريقها المخصص لأن السد على ما اعتقد حجز معظم الماء من المدخل الاول .. وانا بالوادي من المدخل الثاني للثالث .. اللي بيطلعني على طريق المدينة المنورة .. ما امداني اوصلة لأن الموية واصلة حد كويس واشوف الجيوب راجعة ،، رجعت لأحد المداخل الفرعية وطلعت على بيتنا ،، ودقيت على اخوياي اللي كنا مع بعض بالثمامة هاااة وصلتو الاستراحة ؟  :لا والله حنا محجورين في زحمة ولسة مطولين على الاستراحة .. قلت الحمد للة اني ما رحت معكم .. وش اسوي بسيارتي ومعكم جيب ؟ ..

وصلت البيت .. قعدت في البيت ع النت ، ريحت شوي ، ثم طلعت للأستراحة من الدائري الجنوي الى مخرج ١٦ ولا يوجد اي من آثار الماء .. هذي ميزة في الرياض ،، تغرق .. شوي وتنشف ..  وصلت الاستراحة … مالهم دقايق وهم واصلين ..

اكتشفت اني كتبت كلام كثير عن قصة حياتي لذاك اليوم .. لكن الهدف الرئيسي من العنوان توني ما وصلتة … فلذلك // يصير هذا الجزء الاول ،، الجزء الثاني سأتحدث فية عن العنوان :)

ان شاء الله في الجزء الثاني :

– مديري الفلة وماحصل معة اثناء المطر

– موظفين من صندوق المؤية بالصور .. كيف غرقت سيارتهم وبماذا كافأهم المدير العام للصندوق

– البرودكاستز الفللللللة اللي تثبت ان الشعب السعودي قلباً وقالباً معاً ومترابطين في كل الاوقات ..

نراكم على خير …//

Be Sociable, Share!

التعليقات


اسم المعلق: N E X T
12 مايو 2010, 10:13 م

الحمد لله على سلامتك ..

عز الله انك رحت فيها ..

انتظر الجزء الثاني على أحر من الجمر
لا تطول علينا :)

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: