تصنيفات

اخر ما كتبت

مدونات

مواقع ومنتديات

منوعات

ارشيفي القديم

وادي الذكريات (1)


من فترة طويلة .. منذ اكثر من ٤ اشهر وانا اريد ان اكتب هذا الموضوع عن سد وادي حنفية ..

سد الذكريات منذ تأسيسة عام ١٣٧٨هـ في عهد جلالة الملكـ سعود – رحمة الله – هذي صورة لأشخاص مغبرين كانو يسبحون ويلعبون على ذيك الايام

سد وادي حنيفة .. ذكريات قديمة

اذكز قبل ١٥ سنة <<< وصرت مثل ابوي اذا رحت وياة مكان … دايم يسولف هذا قبل ٣٠ سنة كان.. هذا قبل ٢٠ سنة كان … هذي السيارة اللي كان يشتريها قبل ٢٥ سنة كان كااش … المهم .. قبل ١٥ سنة واكثر كنا نطلع بشكل منتظهم لهالسد .. كنا نطلع نتغدا في الاجواء المعتدلة بالذات .. مان فية بشر كثيرين .. ولا كان فية اي من مظاهر الحضارة الموجودة في نفس المكان الان ..اقرب شجرة يابطل .. كل شي جاهز من البيت .. الشاي << ماكانو يصبون لنا شاي ذيك الايام خخخ اذكر كان فية ترمس شاي دائري لونة ازرق حق جدي .. ماني متأكد .. بس عندي احساس كبير انة حق جدي وعطاة ابوي .. ياشيخ لو تخلي فية شاي وتجي بعد اسبوع تلقاة بنفس درجة الحرارة ..!

كان حول السد فية زي البحيرة .. كبيرة وعميقة .. ما ادري شلون تكونت ..؟ هل كان في هالمنطقة كسارة ؟؟ << هذا اقرب شي لأن شكلها حفرة من صنع البشر ومع الوقت والامطار امتلئت بالمياة ..

من اهم الانشطة اللى كنا نسويها مع اخوي الكبير ، نتحرش في الضفادع ،،! هع هع ، بركة الموية حقت السد فيها ضفادع .. اللي نقدر نصيدة ونتونس فية ونخوف امنا خخخ ثم قبل ما نمشي نتركهم ، واحيان ناخذهم البيت ونحطهم مع الزرع الكثير اللي عندنا ومضبطين لهم بيئة لحياة لا يحسدون عليها :)

ايضاً من الانشطة .. تعرفون ارضية السد طين ، ان غاصت رجلك مشكلتك .. واذا جف هالطين تشوفة جايك متكسر .. كنا نجمع هالطين الجاف والمتكسر نشوف الحجم المتوسط اللي نقدر نشيلة والنظيف من اي شوائب ( وعلى ذيك الايام كانت المنطقة انظف بكثير من الان ) وناخذها البيت ،، ونحتري نهاية الاسبوع ( ايام الدراسة كانت طوووويييلة ) اذا جا نهاية الاسبوع جب الطين .. فتتة .. لي الموية يا بطل .. نسوي طين .. واقعد ابني اي شي .. سوي اي شي يعجبك // طبعاً .. تعرفون وين نتروش .. في الحوش ياعزيزي يجي ابوكـ ياخذ اللي مع سقيا الزرع يرشك موية خخخ قبل اذان المغرب الا ترويشتك برا وخش داخل غير ملابسك //

إن حن شيخ للشباب فإنما
قلبي يحن إلى زمان طفولتي
أنا في شبابي بائس ما في يدي
إلا الدموع تحدرت من مقلتي
ذكرى الطفولة ما تمر بخاطري
إلا ذكرت بها الجنةِ

من اعذب الكلام لقيثارة الحزن ودنيا البائسين // حمد حجي

مع الاسف لعلي انقطعت اسبوعين منذ ان بدأت كتابة التدوينة ,, الان لعلي اكملها <<< اكيد قبل اسبوعين كان اللي ابي اكتبة اكثر من هالوقت ..

آخر مطر عظيم جا الرياض … اقصد مطر يسجل في التاريخ , كان يوم الاحد 1416 المطر اللي اغرق الشوارع والرياض وابحثوا في قوقل وارجعوا للصور القديمة .. امتلاء السد بالماء حتى آخرة الماء كان يصب من فوق السد من وفرتة وفاتحين بوابات التصريف اللي في السد .. كل الوادي من بعد السد انعدم هذا والسد موجود !! اجل لا صار السد موب موجود ذيك الايام كان الحاير الحين موب فية !! كان بيصير غرقان موية بحكم ان مجرى الوادي ممتد لهناك ..

مالكم بالطويلة ..

قبل تقريباً 6 اشهر اعدت اسكشاف المكان .. رحت للسد العتيق لذكريات الطفولة ..

المنطقة تغيرت … كل شي تغير .. صاروا مهتمين بالمكان النخيل في كل مكان .. الجلسات العائلية النظيفة .. دورات المياة – وانتو بكرامة- ساحات مزوعة .. منطقة اذا كنت طفشان روح هناك ومعك 3 ايس تي ليمون وعيش اروع لحظات عمرك ..

اترككم مع الصور .. لما كنت اصور .. اقول في نفسي .. صدق هالمكان يوم كنا صغار كان كلة موية ؟صدق ذيك الايام اللي كانت ولا لا ..!

ما صورت الاصحراء قاحلة .. كانت في يوم ما بحيرة السد ..

هنا .. وحتى النخيل في آخر الصورة كانت قبل 15 سنة كلها بحيرة زرقاء


تاريخ تأسيس السد .. وواحد ظريف كاتب عاشت اليمن والسعودية !


كل هالمنطة تقريباً بارتفاع 7-9 امتار كلها موية .. وتمتد على مد البصر ..! وفي الاعلى منتجع الوليد بن طلال


صورة اوضح ..

منظر جاني


صورة من اعلى وليت قوقل موجودة سنة 1416 لتصور الماء


من قبل السد .. المنطقة اللي يحميها السد من السيل

تلاحظون فية شي غريب شاق الجبل ..!

هذا درج من اسفل الوادي الى اعلاة ..! << باللهي !

كان حلم الطفولة اننا نطلعة .. لكن وش يطلعك مع الخوف .. تحتري ابوك وابوك موب فاضي لك .. ماصدق يجية الويك اند عشان يرتاح وتبية يطلع درج !!

المهم … هي مرة وحدة اللي طلعتة بحياتي ..

والمرة الثانية .. لما كنت اصور هالتقرير .. سويت اني بطل وما امداني اكمل 20 او 30 خطوة الى الاعلى الا والدنيا تلف وتدور ومافية اكسجين << عشتوا الجو صح خخخ وتعب وتحس انك دب ..

اكتفيت بكم صورة للدرج

الدرج .. من البطل اللي يسابقني فية *

الدرج من اعلى


للموضوع بقية .. الى الان لم اصل لما اريد الوصل الية من هذا الموضوع فقد انشغلت بمشاغل السفر ..

انتظروا الجزء الثاني ..

بدأت في  كتابة الموضوع من السعودية .. والان .. اعتمدة لكم من امريكا

Be Sociable, Share!

التعليقات


اسم المعلق: Lama
17 أغسطس 2010, 9:11 م

ذكريات جميلة : )


اسم المعلق: الْـعَنوّد ~
3 فبراير 2011, 9:24 م

إنَ أكثَر مـآ يصيبنــي بِ [ :?: + :!: ] عند قرآئتي لِ كلمة { ذكريـآت ..

كلمـه { تشتتنـي تـآرةً وتلملمني أخرى ـآ ؛ تشعرنـي بِ فقد أطرآفـي ؛ تجمع لي فصول السنه بِ أكلمهـآ ؛ تشعرنـي بِ الفرح وَ الحزن ؛ أذرف منها دموعَ السعاده و َالتعاسه ..

كلمه أصعب من أن || تُششـرح ..

فَ هنيئـاً لكِ أيتهــآ { الذكريـآت } ..

سسـواءً كُنتِ [ :-D ، :cry: ] .


بينغ اسم المعلق: mosab.me » » وادي الذكريات (2)
10 أبريل 2012, 8:43 ص

[…] ما يقارب السنتين من اعتماد موضوع الاول عن وادي الذكريات تفرغت الان لكتابة الجزء الثاني […]

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: