تصنيفات

اخر ما كتبت

مدونات

مواقع ومنتديات

منوعات

ارشيفي القديم

اسعد weakened مر عٌلي من زمان ،، ( سالفة طويلة )

 

اخيرا ،،، 

استمتعت بأجازة نهاية اسبوع حلوة ،، والله من زمااااان ما استمتعت مثل هالمتعة اللي صارت هالاسبوع ،،

يوم الاربعاء ،، خلصت من المعهد ورجعت البيت واحلى غدا ،، 

العادة يوم الاربعاء يوم اجتمع فية مع اخوياي القدامى سواءاً ايام الدراسة ولا المعهد ولا الحلقة ولا اخوياي عن طريق النت ،،

الحمد لله ،، هالاربعاء الماضي قابلت كل اللي اخوياي قلت :)

اول شي ،، دق علي سعود ،، شخص ما قابلتة الا مرتين واعرفة عن طريق النت  يسألني عن شغلة ،، ووصفت لة المحل ،،، وراح لم المحل ودق علي عن الشغلة ولا لقاها ،،، قلت لة خلاص انت ارجع بيتكم (كان مشغول) وانا بدورها لك في فرعهم الثاني ،، 

صراحة صراحة الصدق الصدق انا جاملتة ،، ماكان ودي اروح :)

لأن المكان مشوار تقريباً ٣٠ كيلو عن بيتنا ،، بس فاضي ويوم اربعاء والشخص يعتبر جديد في حياتي ،، خلن اكسبة ،،

الحين ادق على مين عشان يخاويني لهالمشوار ؟؟

دقيت على البثر (ياحبني لهالاسم ولصاحبة) وهو اللي صمم لي موقعي السابق ،،

من حسن حظي انة طلع طفشان وتوة طالع من البيت ولايدري وين يروح ،،

تواعدنا في شارع الرسالة ،، وطلع معي،، 

في الطريق كل سواليفة عن سيارة خاشة مزاجة بالعرض ،، الله يرزقة اياها ويتهنى فيها ،، اكيورا TL ,, وانواع المواصفات وعلمني كل شي فيها ،، ماشاء الله علية ،، 

المهم قبل ما نوصل للمكان المطلوب (ساكو) اللي بالدائري الشمالي ،، قال خلنا نمر وكالة هوندا نشوف Honda Jazz الجديدة ,,

(في هذة اللحظات – دق علي صديق قديم ايام الدراسة – محمد القرني – عشان نطلع سوا للأستراحة المعتادة كل اربعاء مع اصدقائي القدامى ايام الحلقة ) …

المهم خشينا معرض هوندا ،، هع هع قبل ما نخش انصك باب سيارتي على رجل البثر .. هع هع طيب وش ذنبي يوم تنتقم من الباب وتصكة بقوة !!

خشينا المعرض وشفنا الجاز الجديدة ،، سيارة صغيرونة عملية ١٠٠٪ بسقف بانوراما !! ياناس هذي اول مرة تصير من هوندا ،، سقف بانوراما من هوندا على سيارة صغيرة ،، 

لا وش فيها بعد ،، قير تبترونيك وتحكم من الدركسون في التعشق مثل السيارات السوبر سبورت،،، ابو الفلة والوناسة ياشيخ ،،

طبعاً محمد كل مايشوف شي من هالمواصفات يخق معها (راح طلب المفتاح وشغل السيارة ) واشوفة خاق معها خيييييخ صراحة يحق لة ،، لانها على قد حجمة ومواصفاتها عال العال على قدة ،، صدق يامحمد وجهك وجة جاز موب اكيورا خخخخ خيييييخ ،،

وخذينا لفة على بقية السيارات ،، انا وقفت وقفة صمت واحترام واجلال امام الاكورد كوبية ،، والوعد ان شاء الله قريباً ،، 

طلعنا من الوكالة ورحنا ساكو ،، على طول حصلت الغرض اللي ابية حق سعود ،، وقلت لمحمد وش رايك ناخد لفة ونشوف قسم العناية بالسيارة << لانة يغسل سيارتة بالبيت ،، خذينا كم منشفة ولقينا كم شاكوش (Hummer ) والبثر ياخذة ويطق راسة فية ! مدري صدق وش كنت تحس فية يامحمد ؟؟؟


المهم طلعنا ساكو بعد ماكليت خابور ودفعت انا الحساب كلة ،،

فداك يابثر ( ،،،،،….،،،،، ) 

رجعت من ساكو للشفا اسلم سعود اغراضة ،، 

ثم دق علي محمد بن عبد العزيز ( موب الامير ) واحدن سلنتوح معة رنج  خخخخ قال فية تجمع قروب هوندا عند الكلية التقنية المعتاد ،،

الحين انا محتار اروح التقنية ولا الاستراحة بالمزاحمية ؟؟ 

طبعاً ابو سياري معي ،  كلمتة قال بيروح التقنية ،، ونزلتة عند سيارتة ،، 

طبعاً محمد القرني كان كل نص ساعة يدق علي وينك وينك وينك فينك :) واطلع من شارع  الرسالة مباشرة للأستراحة في المزاحمية ،، وصلت على الساعة ١١ تقريبا ،، بدا موعد الكورة ،، سلمت على اللي ما يلعبون ،،، الشي المميز في هاليوم ،،  انهم اتفقوا بيسون عشا !! ( من اكثر من ٨ اشهر ماقد سوو عشا بالاستراحة ) العادة لقاء ونلعب كورة ونطلع ،، هالمرة لا ،،، دجاج حنيذ ،، ورز يحبة قلبك ،،، 

لحقت على الدجاج قبل ما يحطونة في المنفى مدري الميفا مدري وش يسمونة ،،

المهم انة برميل فية جمر وتحط اللحم فية وتحكم اغلاقة جيداً ،، 

ثم غسلنا الرز وحطينا وظبطناة ،، الرز والطبخ يبيلة (ملاس) – ملعقة كبيرة للتقليب – ،،، الشباب عجازين ،،  مافية ملاس ،،، تدرون وش استخدمنا بدالة ؟؟؟؟

والله ولا اكذب عليكم لانكم ماراح تصدقون ،، استخدمنا ( طنب ) مصدي !! ( الطنب هو مايستخدم لتثبيت الخيمة في الارض ،لا ومصدي بعد !! ) !!!

اصلا يوم جيت الاستراحة كنت ناوي اسلم واخذ محمد القرني ونرجع الرياض ثم اصرف محمد واطلع لأخوياي عند الكلية التقنية ،، بس يوم دريت انة فية عشا (لانها لحظات نادرة اللي يسوون فيه العشا ) قلت ،، خل نقعد ونتعشى ثم يحلها حلال ،،

حطينا العشا ،، والله ياهو جيد ،، جيد بكل ما تعنية الكلمة ،، مضبوط مشاء الله تبارك الله ،، 

ثم خلاص  قررت امشي ،، مابعد العشا شي ،، طلعت من الاستراحة ،، ابي الحق على الشباب بالكلية التقنية ،، طلعت من المزاحمية الين برج المملكة خلال ٢٠ دقيقة !! ماشي ١٨٠ :) << يذكرون الله بعض الناس ..

يعني خلال ٢٥ دقيقة وانا واصل عندهم مجمدين من البرد خخخخخ قعدت وتكينا شوي ،، وسواليف وقابلت واحدن قدييييييم لي سنة ماقابلتة وسواليف وفلة ويحكي عن سواليفة راح نيوزلندا وانواع الفلة وانة لقى سعوديين مستأجرين فان في نيوزلندا ومشغلين حفلة لرابح صقر وتنكس ،، 

رجعت البيت ونمت قبل الفجر بـ ٣٠ دقيقة !!

صدق الشيطان كلب ابن ٦٦ كلب وصليت الفجر مع الظهر ،،!


جا يوم الخميس ،، محمد بن عبد العزيز كان مواعدنا بطلعة بر هو والرنج حقة ،، وعبد المجيد بالشروكي ،، 

طبعاً انا ماني رايق من صباحية رب العالمين في البر ،، لا انترنت ولا شي زي الناس لانهم طالعين الثمامة وانا مخلوق اكرة الثمامة كرهاً شديداً وفي رواية اخرى كرهاً جماً ،،

طلعت بعد العصر ووصلت قبل مغيب الشمس بفترة كويسة ( مشوار ٨٥ كيلو من البيت ) ،، وقفت سيارتي واسقبلني محمد بالرنج حقة ودخلنا جوة الطعوس ( ابشركم سواقة محمد تحسنت كثير ) ،، قعدنا شوي ثم جا دور التطعيس بالشروكي حق عبد المجيد الا ذا الحقنة محمد قال ابي اسوق ،، برضوا ،، ماعلية يسوق ،، جا دور عبد المجيد واطربنا بالقيادة التطعيسية كما يطربنا عبد المجيد الحقيقي بأطلالتة الموسيقية ..

صلينا المغرب ،، عبد الرحمن جيعان وشبينا النار ،،

الحل الصعب واحلى شي بالبر ،، خبز مفرود وجبن سايل ،،، وي وي <<< يعني كلام كبيييير ،،

راح عبد المجيد وابو داحم يجيبونة ،، الظاهر جابوة من الشرقية ،، طولوا مرررة  !!!

قبل مايجون بدت الاختراعات ،، كان فية برنقلز لما تفك محا تصك ،، اخذت كم بطاطسة منة وعلى الملقاط وعلى الجمر ،، والله يا طعمها كاااايف ،،، طعم اوووكية بس اهم شي لا تحترق ،، ٧ ثواني تكفي ع الجمر ،،

وصل ابو داحم ومجود على صلاة العشا ،، طبعاً سحبنا ع الصلاة لسبب حضور التصبيرة اللي هي خبز مفرود وجبن ،،، واصلح للعيال سندويشات واللي يصلح بنفسة واللي يحط مربي ،، واللي يحط برنقلز معة << طعم خطييييير ٦٦٦٦ <<< ٦٦٦٦ يعني من جد خطير ،، وبعد كذا صلينا العشا ،،

كملنا السهرة والعشا (شواء- شوي – يعني دجاج ع الفحم :) ) من يد موسى مدرس الفيزياء هع هع وصك ام ام نا البرد والنار كلها دخاخين ،، وجا وقت العودة ،،

هالمرة ابشركم صليت الفجر ثم طقطقت ع النت ثم نمت ،،،


جا يوم الجمعة ٢١-١١-٢٠٠٨ م 


هذا اليوم اول مرة يجي يوم جمعة مافية كآبة !! العادة يوم الجمعة ملل والاخلاق صفر بمجرد انك تفكر بالدوام ،، 

الا هذي الجمعة ،، حصل لي موقف بعد العصر بساعة ،، وهو اللي مخليني اكتب الحين ،،، من العصر وانا متشقق من الفرحة ،، متشقق مرررررة ،،

اعطيكم السالفة ،، 

دق علي سعود ،، يبيني اركب له شغلة في سيارتة (انوار اللوحة الخلفية حقت الكزس ) طبعاً كان بيشتريها من الوكالة بس طلعت مقفلة يوم الخميس المساء والجمعة بيسافر ،،، فقلت لة تعال خذ اللي بسيارتي واركبهن لك ،، وكذا كانت الخطة وانة يدفع قيمتها كنة شراها من الوكالة وانا مالي كم يوم ركبتها ،، وفي نفس الوقت انا طفران يعني جت حجة لي وحاجة لة :)

 

جاني البيت وفكيتها من سيارتي وركبتها بسيارتة ،، 

خلاص انتهيت !! ابقفل شنطة سيارتة الا ياخذ كيس من الشنطة ويقول هذا لك !!

سلامات وش السالفة ؟ هذي هدية بسيطة لك ،،!

طيب لية وش سويت ،،

بس هدية  ،، والهدية ما ترفض ،،، ويحلف علي اخذها !!

وانا اقول وش سويت عطني مبرر ،، يقول هذي جمايلك علي ،، اي جمايل يا عزيزي وانا بحياتي ماقابلتك الا كم مرة ،، 

المهم وانتهى الوضع وعطاني اياها ..

ويقول .. كم قيمة الانوار ،، بالله يا سعود الحين معطيني هالهدية وتقول كم قيمة الانوار ،،، قلت اعتبرها هدية مثل ما عطيتي ،، 

سكت ،، وودعتة ،، وراح ،،

الحين انا فتحت الكيس وتوني ماخشيت البيت ،، اشوف مكتوب Sony Ericsson  وكني قريت C902 قلت اية عرفتة ابو ٥ ميقا بكسل النحيف،، 

وافتح الكرتون الا اشوف الجهاز C905 خلاص انا انهبلت !! << ٨.١ ميقا بكسل !! الجهاز قيمتة ٢٩٩٩ ريال !!

والله من الفرحة والشعور اللي مايوصف عن باب بيتنا فية دمعة بتنزل من عيني مدري لييييش !!!

من قوة الفرحة والوناسة الله يسعدك قلبك وايامك ياسعود ،،

يالله ياسعود !! انا وش سوييييييت عشان استحقة!! والله يا اني متشقق وفي رواية اخرى متمزق من الفرحة !!

العصر كلة متشقق من الفرحة ،، حتى امي خشيت البيت قلت لها السالفة ،، (سويت خدمة بسيطة لصديقي وعطاني هدية بـ ٣٠٠٠ ريال .. امي تحمست وخذت الكرتون وقاعدة تشوف الجوال ودعت لك ياسعود  ) …

رحت المجلس عند اخوي وعلمتة السالفة ،، خذا الجوال وركب شريحتي وقاعد يصور فية ٨.١ ميقا بكسل ،، وانا قاعد اسوي بحث في النت مع اني مشرف قسم سوني اريكسون الا اني ابي اعرف تفاصيل الجهاز ،،، طلع انواع الفلة فية GPS ووايرلس وكام ٨.١ ميقا وذاكرة خارجية ٨ قيقا وكيبل TV وغيرها كثير ،،

دقيت على اول واحد اعطية اخباري في حياتي  B Unique ومارد ،، لو رد بينهبل من الهبالة اللي جتني :)

جا المغرب قابلت واحد قديييم بالحارة ماشوفة الا مرة كل ٣ اشهر ،، وعلمتة السالفة وقام يدعيلك ياسعود :) 


العشا كلمت ماهر بشوف وينة قبل مايطلع الشرقية وتواعدنا في مقهى ،، وكلمت البثر والغريب انة وصل قبل ،، كلمتة بالخط !! وانا بالطريق ،، مدري كيف وصل قبلي !!


وصلت ،، وعلمتهم سالفة الهدية ،، جوزيف كان موجود .. وتشقق من الفرحة اكثر مني ،،

ماهر قال كالعادة هاااة تبيع ؟؟ قلت ابيع الطبيشي والله ،، ومسوي كاش قال ٢٠٠٠ كااااش الحين قلت اطلع من مخي ،،، وطلعها من محفظتة كااااش ،، وانا اقول اطلع من مخ مخي بعد ،،

البثر عارف السالفة ،، قاعد يناظر بنص عين ،، 


(( في هذة اللحظات الساعة ١٠.٣٦ PM )) اخوي خذا الجوال ،،، على فكرة ،، تراني بديت اكتب هاليومية السعيدة من يوم اني في المقهى بعد صلاة العشا  مع الشباب ،، والبثر هو وسبحتة اللي غثا فيها هع هع 

الشباب عجبتهم السالفة ودعولك يا سعود ،،


ورجعت البيت بعد ما غادر البثر اولاً لان عندة مدرسة خخخخخ  ثم ماهر ثانياً عشان يلحق الخط ويلحق الهجمات اللي جايتة بترافيان ،، طلعت من المقهى الساعة ٩.٢٠ دقيقة ،، 

وها انا اكتب لكم ،،  عن احلى ويك اند مر علي منذو مبطي ،، اية والله من زمااااان ما مرت علي نهاية اسبوع سعيدة زي كذا ،،

الله يبارك في ايامك واموالك ياسعود والله يعوضك خير والله يجعل السعادة والسرور والتوفيق دوم  في دربك ،، 

Be Sociable, Share!

التعليقات


اسم المعلق: فهووودي الجداوي
21 نوفمبر 2008, 11:07 م

صعووووبي …. تعال جده وجيب لي هديه مساعدات إي باخ وأنا أعطيك جوال أحسن ….

<<< مقهووور << م ن يوم وأنا صغير ماجاتني هديه :(


اسم المعلق: ACCORD i-VTEC
22 نوفمبر 2008, 1:34 ص

.. اللهم وفق سعود لما تحبه وترضاه ..

يلعن ام ام ام ام الفله يا معصوبي .. اللفه بكم ع السوني اريكسون .. هعهعهعهع

ما شاء الله تبارك الله .. يتربا في عزك وتكسره بالعافيه

وعدنا بكره للمعرض
جب الجوال معك

دوت بود ….


اسم المعلق: MOMO
22 نوفمبر 2008, 1:47 ص

واااااااااااااااااو ويك اند رووووعه

وكان ودي اني طالع معكم الخميس بس ما حد علمني

الف الف الف مبروك الجوال >>>>>.دقيقه يسجل رقمه علشان شي هههه

وتستاهل والله يامصعب اكثر

سعود ماقصرت والله

عقبال الويك اند الجاي افضل وافضل

الله يوفقك ان شاء الله


اسم المعلق: sinful eye’s
22 نوفمبر 2008, 1:52 ص

مبرووووووك عليك الجهاز

و الله يوفقه و يسعده هاللي خلاك سعيد ^_^

وي وي !!!

الظاهر هالويك اند غريبه من ناحيه الوناسه
سحبت روحي للمخيم على اساس اقعد ساعتين و ارجع
رحت يومين و ما رجعت الا علشان عندي امتحان و بدرس له
و يوم وصلت البيت ..اكتشفت ان كتبي كانو معاي بالسياره
و تحسفت اني ما قعدت ادرس بالمخيم

و محمد بن عبدالعزيز …. لسبب ما قطع اخباره عني مره وحده و صار ما يكلمني الا بكلمتين … ” يس ” و ” نو ” !
شكله زعلان مني و انا مو داري !!
و سالفة الرنج ما وصلت لي !!!


اسم المعلق: محمد بن عبدالعزيز
22 نوفمبر 2008, 3:21 م

ثانيا مبروك عليك الجوال .. علشان تعرف ربعنا اللي بعد الحوطه وانت جايي هم الاوكيه .. يكفي راعي الرنج معاكم .. >> نوبرينقلز

طيب طيب ياحبيبي .. اليوم وعدنا ان شاء الله بالمعرض ..

واولا >>يلعن ام الانتكاسه
sinful eye’s

والله ياحبيبي ماعرفتك للحين .. واما سالفة نوويس مادري كيف طلعت من عندي .. انا من زمان (واحتسي) زي الناس >>ليه هم مب ناس خخخ

المهم ز…… زرفنا سالفه الرجال .. وطلعنا برا الموضوع

اطلع لي ع الخط .. وابشر بعزكـ لو تبي على حسابي بس اركب مع بالرنج.. واذا خوي معنا الويكند الجاي .. ترا مقعدكـ محجوز …>>بس بالخلف يعني اريح لكـ هع هع

تيحاتي لكـ


اسم المعلق: Mahdi Hadi
22 نوفمبر 2008, 4:34 م

الله يجعل ايامك سعادة وكل زملائك ،،

على فكرة بكم تبيع الجهاز ،،،،،،،،،،،،،،،،،، لا تجرجني وتقول لي هدية ترى ازعل …


اسم المعلق: MoSaB
22 نوفمبر 2008, 10:52 م

فهووودي الجداااوي :
احترني عند كبري المربع عند بالم بيتش ،، جايك جايك ،، (كححححححح دووووف )

ACCORD i-VTEC :
هلا ابو داحم ،، انت ومعرضك ،، قصدي انت ومقلبك الفلة ،،

momo :
الله يجعل ايامنا كلها سعادة ،، والله انت شكلك لا بتجي تجمعات ولا بتركب شاشة ولا اي شي ولا بتسوي شي مفيد في حياتك هع هع هع

sinful eye’s :
الله يبارك فيك وعقبالك ،، اما اروح مخيم واذاكر ،، اطلع من مخي ياشيخ ،،، اطلع من مخي اني اذاكراو احل واجب في ويك اند ،،

محمد بن عبدالعزيز:
الله يعطيك العافية ،،
ربعكم الفلة بس انت موب فلة ،، اكلتني خابور العشا طلع على حسابي في طلعة البر وانا طفرااان وتقول بنسوي قطة هاااااة ،، طيب يا ابو كفرات بيننا الايام ،،
معرضكم الفلة من الحماس جاينة قبل ما يفتح بيومين هع هع ،،

Mahdi Hadi :
الله يبارك فية وفي ايامك ،،، اما ابيع الجهاز ،، الجهاز جاني هدية ولا راح ينباع ابد ،،،
ابد ما ابي ازعلك ،، ما راح اعطيك هدية ،، كل شي الا زعلك هع هع


اسم المعلق: King
23 نوفمبر 2008, 2:42 م

الله عليك يامصعب تستاهل أكثر انت إنسان كويس

والله يجزاه خير ( سعود ) ماقصر وبيض الله وجهه

——

ذكرتي بطلع البر ( الثمامة ) يوووه فله ياخي وعلى الشوي الدجاج واللحم والكتشب والمايو << مع أني ماأحبه :( بس كانت لحظات وربي لاتنسى
والبرد إلى جانا وضربنا إلين قمنا من قوة البرد هع هع

______________

أتمنى لك دوام السعادة والفرح في كل لحظه من حياتك


اسم المعلق: عبقرينو
28 نوفمبر 2008, 8:31 م

تستاهل أكتر من كده صدقني يا ميصو ماتلاقي واحد زي سعود الله يوفقوا ويخليه لك كداه الصحبة ولا بلاش———- مع تمنياتي لك بالتوفيق والسعاده يارب أشوفك كل يوم سعيد ،،،


اسم المعلق: ابو فيصل
30 نوفمبر 2008, 9:11 ص

بنحط عشاء على طول في الاستراحة مانقدر على بعدك يامصعب


اسم المعلق: تويتي
1 ديسمبر 2008, 1:00 م

تستاهل اكثر مصوبي وتكسره بالعافيه
وان شاء الله ايامك كلها ونااااااااااسه

والله يجزى خيررر صديقك سعوود ويوفقه ويبارك له في ماله ويسعده في حياته

<< متشقق من الفرحه عشاااان معصوووبي <<


اسم المعلق: ابو عزام
1 ديسمبر 2008, 4:49 م

تستاهل يا مصعب كل اربعاء نحط عشاء بس هالمره نقول بيجوب ملاس والله يوفق خويك سعود

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: