تصنيفات

اخر ما كتبت

مدونات

مواقع ومنتديات

منوعات

ارشيفي القديم

افضل طريقة للأستمتاع باليوم الوطني على طريقتي

يصادف يوم 23 سبتمبر من كل عام اليوم الوطني :) << جبت شي جديد .. صح ؟!

قبل بضع سنوات كان اليوم الوطني يمر مرور الكرام .. فقط نسمع في الاذاعة او نرى في التلفاز بعض البرامج الوطنية ..

قبل بضع سنوات ايضاً .. اقرت الدولة اجازة اليوم الوطني وهي يوم واحد فقط ان صادف ذلك اليوم وسط الاسبوع .. او ان كان يوم الخميس فتكون الاجازة الاربعاء وان كان الجمعة فتكون الاجازة السبت للقطاع الحكومي والقطاع الخاص ..

بدأت احتفالات اليوم الوطني تقريباً قبل 4 سنوات على الطريقة المؤسفة والمزعجة اللي نراها كل عام ..

ياصبر الارض عليكم بس ..

قبل اليوم الوطني بـ 3 ايام وبعدة بيوم يجي لبعض الشباب السعودي ظاهرة اسفهلال واستدلاخ عجيبة .. فمن التفحيط ! والترقيم والرقص المجنون اللي مالة اي قاعدة .. بس شغل اي اغنية او طق او ربابة عاادي يرقصون عليها ..

ليت الامر كذلك فقد تعدى الموضوع الى ممتلكات الغير .. شاهدتم ماحصل العام الماضي في واجة الخبر البحرية ..! اغلب المحلات اللي على واجة الخبر البحرية سلبت وكسرت وعبث فيها !!

عبث فيها وسرقت وكسرت في يوم الوطن بإسم الوطن !!

في يوم الوطن اللي المفروض نحمد الله فية على نعمة توحيد ارجاء البلاد ونعمة المن والامان , مع الاسف نشوف شي مايمت للأمن والامان بصلة .. نشوف تروع الامنين ! نشوف التكسير والتخريب ! نشوف انهاك الاعراض !!

اقولك وش المؤسف حقاً .. وش المضحك المبكي ..

ان طلعو حريم مامعهم  رجال للسوق (مع السواق مثلاً ) ذاك اليوم خاصة في اسواق شمال الرياض او القريبة من التحلية وموسى بن نصير والعليا .. اقرا عليهم السلام .. بيجون افواج من الزومبي المخربين بيحاصرون السيارة .. اذا الباب غير مؤمن سهلت المهمة .. انواع التحرش اللي بيصير ..

ليتة مع السواق .. خل الحريم يطلعون مع رجال كبير في السن .. ياللعار .. حتى هالرجال الكبير في السن ماراح يقدر يدافع عن اهلة وعن عرضة امام هالزومبي اللي شايفية ضعيف وغير قادر على الدفاع عن نفسة فضلاً عن غيرة ..

اذا كنت شاب فيك العافية طالع مع اهلك ذاك اليوم .. انت وحظك ان سلمت من المحاصرة ومن التحرش .. ماراح تسلم من النظرات الجائعة ..

اجنبي ,  صاحب تاكسي , عامل في الشارع ,  .. مشكلتك انك جاي وراص نفسك في شي ما يخصك .. اليوم الوطني موب لك في السعودية مع الاسف ويمكن يكون اسوء يوم في حياتك اذا قابلت زومبي متوحشين ..

نفس الكلام لأصحاب المحلات خاصة بالمنطقة الشرقية , الله يعينكم بما ان المنطقة التجارية المعروفة بالرياض بين طريق العاليا وطريق الملك فهد والتحلية وموسى بن نصير تغلق في هذا اليوم .. فيتحول الزومبي مباشرة الى الواجهات البحرية بالخبر والدمام ..وحدث ولا حرج عن التكسير والتخريب والاعتداء ..

كيف تستمع بقضاء اجازة اليوم الوطني ؟

الطريقة الاولى :

– وانت طالع من الدوام (آخر دوام قبل اجازة اليوم الوطني) رح اشتر كافة احتياجات البيت

– دخل سيارتك البيت

– الشطرطون حق ايام حرب الخليج لزقة على كل القزاز في بيتكم >> تحسباً للزومبي وافعالهم الامتوقعة .

– واحلى نومة نومة يابطل ولا تصحى الا اذا قالو دوام ..

– يمكنك استبدال مشروع النوم بمشروح سينما منزلية وكمل المسلسل اللي ماشفتة ولا الفلم اللي محملة وماشفتة ولا اطبخ في بيتكم مع اهلك ولا اشوي اي حاجة :)

اهم اهم اهم شي .. لا تطلع من بيتكم .. مافية الا الخراب وقلة الادب ورقص مدري كيف جاي واشكال تسد النفس ..

الطريقة الثانية بعد هذا السؤال ..

كيف يستمتع مصعب بقضاء اجازة اليوم الوطني ..؟

من حسن حظني ان اليوم الوطي كان الخميس فكانت اجازتة الاربعاء ..

مايحتاج تفكير ..

دوامك ينتهي الثلاثاء … ابد شنطة اغراضك جاهزة بالسيارة وملابسك وكل شي وجواز سفرك وفلوسك على طووول مريت خويي بالشفا وعلى طووول على مواقف اسكان الخبر .. تبديل السيارات .. اكتمال الاشخاص .. منفذ دولة الامارات العربية المتحدة ..

مرحباً بكم في الامارات العربية المتحدة .,

مرحباً بكم في دبي .. دار الحي ..

اقول كم وش سويت هناك ..

دورنا سكن وماشاء الله لقينا شقق فندقية كبيييرة ورخيصة نوعاً ما وجديدة ونظيفة وراقية ..

اول يوم قضيناة في مول دبي .. اكبر مول خشيتة في حياتي للحين .. كبييير من جد في كل الماركات العالمية اللي تخطر في بالك .. فية صالات تزلج .. في اكوارديوم >> يارب اسمة صح << اللي هو عبارة عن حوض سمك زجاجي كبير وفي وسطة نفق والماء من حولك و فية انواع كثيرة من السمك واسماك القرش بأنواعها شي خيالي كأنك في قاع البحر .. والانشطة متنوعة تبي تشوف شووف .. تبي تأكل ذولي السمك وتسبح معاهل اكلهم واسبح معاهم .. تبي تروح الحديقة المائية وتشوف انواع نادرة من الاسماك والسلاحف وبعض المخلوقات المهدة بالانقراض رح شفها .. تخيلو اني شفت بطريق !! O_0 << تراة فيس !!

اية والله بطريق .. فية منة نوعين .. اللي يعيش بالقارة المتجمدة الجنوبية وفية نوع ثاني يعيش في شمال كندا وكم دولة ثانية .. بس صراحة .. مخلوقات رهيبة وظريفة ومرحة وكثيرة الحركة .. حتى اشكالها حلوة … ابي بطريق :)

طبعاً غير قاعات السينما في السوق 3D وانواع المطاعم … وكل انواع الفرحة للأطفال في هالسوق .. العاب ومراجيح وكل شي :)

برا السوق فية تحفة دبي … نافورة دبي الراقصة ..

نافورة عجيبة .. كنا نتغدا في احد المطاعم بجوار المول وبجوار برج خليفة الاطول في العالم بإرتفاع اكثر من 800 متر .. كنا نتغدا وفجأة اشتغلت اغنية رائعة وتشوف كيف النافورة ترقص ,, الموية من النافورة توصل لإرتفاع 50 متر .. تشوف كيف روعة الماء والاضواء … شي خيالي لما يجيك رذاذ الموية ..

بعد الغدا رحنا بنطلع قمة العالم من صنع الانسان … قمة برج خليفة ..

وحنا بنحجز التذاكر قلت لهم ماتلاحظون ان الشمس غربت ؟؟

قالو اجل نخلي الطلعة لقمة البرج يوم الجمعة الساعة 5:30 اخر العصر ونشوف دبي في النهار ونشوف غروب الشمس .. ونشوف دبي في الليل .. فكرة جداً منطقية واجمل من ان نطلع البرج في الليل ..

انتهى اليوم الاول تقريباً .. رجعنا والمخدات ترسل كول مي اقسم بالله تعب خاصة لسعد قائد المركبة بسيارتة وسلطان كانوا مواصلين من يوم السفر وواصلين بعد الفجر ودورنا الفندق نمت انا وصالح وهم اللي راح للصيدلية وسنتر بوينت وضيعوا لأن فية جزء حساس من شواع دبي تحت الانشاء .. رجعوا ناموا اقل من ٣ ساعات وصحينا حسب الخطة المتفق عليها حتى لا يقولون ضاعت الرحلة نوووم وكسل ..

اليوم الثاني يوم احد عجائب الدنيا السبع .. يوم اتلانتس .. حطينا الاحداثيات في القارمن ،، لحظة على طاري اتلانتس .. الفندق معروف انة في جزيرة النخلة .. لكن اول ما وصلنا دبي لقينا على طريق الشيخ زايد مبنى ضخم ماخذ نسبة ٧٠٪ من نفس تصميم فندق اتلانتس ..! صالح يقول هو والثاني يقول الا هو اتلانتس .. اقول لهم ياعيال روقوا وش جاب اتلانتس هنا .. اخبرة مطل على البحر من على شارع الشيخ زايد !! المهم … انتهت سالفة هالفندق التلفيق ..

وصلنا بالسيارة الى اتلانتس الحقيقي .. مهما شفتة في الصور .. لازم تشوفة على الطبيعة .. شي روعة فخم وبناء عظيم يستحق ان يقال عنة اعجوبة .. كانت الخطة اننا نروح اكوافنشر  وهي القرية المائية الخاصة بالفندق .. مدري وش اوصف وش اخلي .. عبارة عن نهر كبيييير ياخذ لفة على اكوافنشر كلها وفية زي المخارج << مسوين دائري الرياض مثلا ؟؟ :) كل مخرج يوديك على لعبة معينة .. ماراح اطول واتكلم .. لازم تجربونها بأنفسكم ،، وخاصة قفزة الشجعان والقفزة الخاطفة << بطني عورني !!

بعد ذلك اظن رحنا لمنطة معروفة اسمها الممشى في دبي .. منطقة راقية مليئة بالمطاعم والمقاهي يقال لهم يقلدون الشانزلزية << على قولة صالح .. تعشينا فيها وهي النومة في الفندق استعداداً لليوم التالي والاخير .نمنا الين ماقلنا آمين .. ٢ طلعو يصلون الجمعة .. ٢ آخرين نايمين لأن المسافر تسقط عنة الجمعة ويصليها ظهر :)

جابو الغدا معهم .. وحنا رتبنا اغراضنا .. تغدينا ثم رتبوا اغراضهم .. حطيناها في السيارة والسيارة عند محطة الكرامة رقم ٢٠  وهي احد محطات المترو ،،

ركبنا المتروا متوجهين للمحطة رقم ٢٥ اللي هي اقرب محطة لمول دبي وبرج خليفة .. شي روعة .. شي فاخر صراحة .. متروا راقي بمعنى الكلمة .. دعكم مماشاهدتوة من الصور والزحمة الصارت من الهنود في اول يوم من افتتاحة << كالعادة اول يوم في اي شي ينفتح لايعسكس الصورة الحقيقية الكاملة لذلك الشيئ ..

وصلنا المحطة المطلوبة .. ثم ركبنا الباص متجهين الى مول دبي .. وصلنا مول دبي ..

فجأة يجي سؤال // وبعدة اسرع قرار ..

سعد قال : طيب وين تذاكر برج خليفة ؟؟

كل واحد يناظر الثاني ..! التذاكر في السيارة في احد الاكياس على بعد ٧ كيلو عند محطة الكرامة .. اسرع قرار .. ركوب التاكسي الى تلك المحطة والعودة بالسيارة لمول دبي .. ههههه اطلق شي بالموضوع انة صار بسررررعة مررررة ..وصلنا المول بالسيارة .. على طول على برج دبي .. صفينا بالطابور .. والتفتيش ثم ممرات رائعة طويلة حتى تصل الى المصعد .. في هاللمرات موسيقى هادئة وحماسية وصور للإنجازات والتصميم والبرج في مراحل مختلفة ومعلومات كثير غريبة عجيبة عنة ..

وصلنا المصعد .. انطلقنا بسرعة ١٠ امتار في الثانية .. الى الطابق ١٢٤ حيث الاطلالة على العالم ،، اظن مايحتاج اوصف اكثر عن روعة المكان ..  فية عندهم شي حلو .. شاشة ومنظار للرؤية .. الشاشة بالملس وفيها خيارات كثيرة ، المنطقة من الاعلى في النهار ، في الليل ، في هذة اللحظة ، رؤية تاريخية .. الاخيرة تشوف فيها المنطقة قبل عشرات السنين وكيف كانت صحراء قاحة وتشوف شارع الشيخ زايد وفية طعوس رمال واول المباني اللي بنيت فية .. فجأة من خارج المطل .. اشتغل النافورة (نافورة دبي الراقصة ) في الاسفل ،، كنة بزر معة لي موية :) المنظر رائعة من الاعلى ولا تسمع صوت الاغنية اللتي اشتغلت عليها النافورة ،،، لكن تسمع صوت انفجارات الموية اذا وصلت ارتفاع ٥٠ متر ..

بقينا هناك حتى بعد غروب الشمس على امل ان يكون هناك مصلى بالاعلى لكنة مغلق ..

نزلنا من القمة الى القاع :)الى السنما وكانت مصادة انة نزل فيلم Piranha 3D فلم حلو صح انة بدون قصة لكنة مثير ويشد الانتباة .. خلص الفلم .. تمشينا شوي وتعشينا .. والعودة الى الوطن ..

وصلنا السعودية .. بعد الفجر  بساعتين تقريباً .. وساعة اخرى للغاراض وتوصيل سلطان الى بيتة وسعد الى منزل وشيل اغراضنا ..

خلصنا .. رجعت سيارتي انا وصلح .. الساعة الان تشير الى السابعة او الثامنة صباحاً << لا اذكر .. وش نسوي وش نسوي وش نسوي .. فطور ؟ بحرين …!

اصلاً في المنطقة الشرقية لو تقول بحرين على طول الشيطان والكفرات والسيارة والشنط كلها تقووول قداااام ..

الى البحرين .. الى محطة البنزين .. الى سيتي سنتر .. الى السينما .. نسيت اسم الفلم بس اللي مثلو فية كل ابطال هوليود .. بعد الفلم سنتر بوينت .. بعد ذلك بترو سحاب .. بعد ذلك ارامكس الرياض shop&ship لأستلام بمبر الايفون4 .. بعد ذلك الى بيتنا ..

خلاصة هذة الرحلة ..

كانت الافضل من ناحية الترتيب ,, 3 ايام اخترنا فيها 4 اماكن فقظ لزيارتها كلها قريبة من بعض والقارمن ماقصر ..

توفقنا جداً في السكن الكبييير والرخيص نوعاً ما بالمسبح والجاكوزي اللي ما جربناهم :)

على الرغم من انها كانت جيدة وممتعة في الظاهر وكما يبدو لكم ..الا انني بذهابي خسرت شيئاً عظيماً سأكتب عنة لاحقاً ..

ليتني حسبت لبعض الامور الف حساب .. لكن .. نمشي على كف القدر ولا ندري بالمكتوب ..

– هل لديك شيئاً لتضيفة عن اليوم الوطني من مجتمع الاعلام الجديد ؟؟

تظنون لوهلة انني انظر للسلبيات فقط .. او انظر لجانب واحد , اقرأو واحكمو مما كتب من مجتمع تويتر ..

* ايش افضل مدينه تفوقت بالرقص هالسنه؟ اتوقع المنافسه كانت حاميه مثل كل سنه ههههه

* اليوم الوطني ،، تظهر فيه سخافات الشعب السعودي

* مشكلة اللي فآهمين اليوم الوطني غلط ! المفروض يسمونه اليوم الهمجي والله !!

*  الوطن عند أرباب الاسر الله يسترلا يدق البنك ولا الأقساط ولا يرفع صاحب العمارة الايجار الوطن عند العاطلين متى اليوم الوطني علشان نرقص

* .. أقترح عليك يا وطني العزيز .. أن تستحدث وظائف للشباب العاطلين بمسمى ” راقص إحتفالات ” ،،

* أي حب لا يُعبر عنه الا بالفساد والإفساد وتخويف العباد،أين الأمن في يوم إعلان حبك ياوطن.. احبك ولا احب يومك الذي يعبثون به فيك ياوطني

* اليوم الوطني : فصل مفقود في منهج الوطنية ! / فليتهم علمونا .. كيف نحتفي بـ “وطن أبيض” دمرته أياد سوداء !

* تباً لحكومة تشتري أسلحة بـ60 مليارا بدل استثمارها في عقول شباب يعبّرون عن حبّهم لوطنهم بالتحرش الجنسي بفتيات وطنهم في الأسواق..!

* للأسف النفاق الاعلامي و الوطنية الزائفة هي ما يفسد جمال مثل هذه المناسبات.. الوصاية و الحجب حيلة عاجز و للشعب القدرة على الفهم

* بالعدل بين المواطنين والشفافية في اتخاذ القرارات تتحقق الوطنية الحقيقة وليس ما شاهدناه اليوم من هياط فاضح ونفاق

* لم نكن بحاجة ليوم وطني بقدر ما كنا نحتاج اشياء كثيرة هي من اساسيات الحياة المهمة

* لمن نكن بحاجه ليوم وطني بقدر ما نحتاج وطن للفقراء والمحتاجين وعمل للعاطلين

* لماذا بالذات، يكون يومنا الوطني فرصة للتعبير عن الهمجية؟

* احتفالاً بالوطنية أحب أهني الشاب السعودي الوسيم «( ماجد المهندس )» باليوم الوطني بحكم انه سعودي جديد وأول عيد وطني له … هههههههه

* الوطن ليس بحاجه ان نثبت حبنا له بالرقص في وسط الشوارع .الوطن بحاجه لابناء يفكرون في هذا اليوم على الأقل كيف يمكن انقاذه من المفسدين

* أي أحتفال الذي يتحدثون عنه ؟ تلك التهنئه الي تعُرض في التلفاز ؟ أم ذاك الصراخ والمشاحناتّ والسباب في الأماكن العامه ؟

* سأعتزل الأحتفال وأبقى في المنزلّ ، ف منزلي هو وطنيّ -_-

*اليوم الوطني..لا يعني شيء لمريض سرطان لم يجد مشفى في وطنه يستقبل حالته أوتتكفل بعلاجه في الخارج في حال عدم توفره بالداخل إلابالواسطة

*متحسر جداً ،، لإن الوطن اختزل في ست ساعات بعد صلاة العشاء .. يكون الوطن فيها في أدنى قيمة له .. ” تكسير ، تخريب ، فوضى ، عربجة

* اليوم الوطني.. لايعني شيئاً لمواطناً.. فقيراً بوطنه

ختاماً يا وطني

# بحقك ياوطن بحق رجالك بحق الدماء والدموع الشهيدة على بناءك وحدتك صمودك، لك في اعناقنا الحب والولاء، ولك في ايدينا المستقبل الذي تنتظر
# السلام عليكم أيها الآباء والأجداد، السلام على أرواحكم الطاهرة، لتناموا بسلام وطمأنينة، فعهدنا لكم ان هذا الوطن أمانة ليوم يبعثون
# ليس لدي شك في احد ان يريد بك سوء ياوطن، وليس لدي شك بك ان تريد بأحد من ابناءك سوء، في اخر الطريق نحن لك وانت لنا
# ان اجتمعنا ياوطن فهو لأجلك، وان ابتعدنا كذلك، ان سعدنا وغضبنا وصابنا حزن، كل شيء لأجلك انت، هكذا باقون نحن، وانت باق لنا
# صباح الثمانون عاما ياوطن ونحن نحمل لك في نفوسنا الأمل والطموح، صباح الثمانون عاما ياوطن ورجالك وابناءك واحفادك لك مخلصون


Be Sociable, Share!

التعليقات


اسم المعلق: جمال – lambo
13 أكتوبر 2010, 12:02 م

لو أتكلم من هنا الى باكر .. مامعكم يوم وطني ابد .. مسخره لابعد الحدود..!!
الحمد لله قضبت ارضي وجلست بالبيت ولعبت اكس بوكس وسوني وشفت انمي و افلام
واستانست وبزوووود .. وسيرت ع الشباب وفرفشنا وتقهوينا وانبسطنا .. وبس .. :-o
من أجمل ما قرأت .. ماشاء الله .. هنيئا لك على هذا القلم الرائع .. والعقليه النيره
وسلمت يداك .. :)


اسم المعلق: ياسر الشمراني
17 أكتوبر 2010, 6:30 ص

الله يعطيك العافيه يا مصعب
فعلاً انت استفدت من وقتك بما يرد عليك بالفائده
تعرفت على اماكن جديده ، على عادات جديده على طبيعه جديده على مفاجآت جديده على قرارات جديده :)

الحياه تحتاج ان نفهمها اكثر واكثر ، وانت حددت مسارك بشكل صحيح في ذلك اليوم الوطني كما يزعمون .. !

وفقك الله
أبو عمار


اسم المعلق: خالد الشبوي
13 ديسمبر 2010, 1:08 م

بصراحه وانت الصادق يوم وطني قال .. قسم بالله يجيك مغص لما تطلع في ذاك اليوم ..
بلاستشين وفللة ووسع صدرك ولا جوازك واستمتع بيومك الوطني ..


اسم المعلق: علي النهدي (كلاس وولد ناس)
13 ديسمبر 2010, 2:41 م

السلام عليكم و رحمة الله وبركاته
كيفك يا مصعب عساك بخير
بصراحة بقولك شي ترا انا المجاملات ممسوحة من قاموسي بس احسك انك انسان فاهم الدنيا صح و تعرف تستفيد من وقتك و انسان عملي في حياتك زي البريطانيين بالضبط اهنيك على عقلك اللي يسوا بلد وشخصيتك القوية عارف اني شطحت بعيد بس هذا اللي في خاطري وابي اقوله لك
اما على دبي بصراحة كل اللي انت سويته سوت مثله بالضبط ما عدا برج خليفة ما لحقت عليه لأنه كان تحت الانشاء بس وش شعورك لمن شفت اتلانتس وحوض السمك ومول دبي و الفلة اللي هناك تحس انك عايش حياتك صح مو عندنا الله بالخير عالعموم اتمنى اوقاتك كلها تكون ممتعة زي دا الوقت و الفرحة ماتفارق قلبك و دمت في امان الله وحفظه

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: