تصنيفات

اخر ما كتبت

مدونات

مواقع ومنتديات

منوعات

ارشيفي القديم

في عالمنا لحظاتـ // نبتكرها ، نعيشها ، نفرح بها

في عالمنا لحظات // لازم نعيشها عشان نعرف قيمتها ..

الرحالة سندباد .. وقريباً الرحالة مصعب

استمراراً لمسلسل الطفش اللعين .. ومحاولة استغلال ما يسمى بالويكند ..

قررت اني اجرب شي جديد في حياتي ..


خلال الاربع سنوات الماضية .. معظم اصدقائي اللي عرفتهم في تلك الفترة ( انيوجوليين ) :) يعني غير عاديين ..

تعرف عليهم جميعاً من خلال الانترنت .. جلهم من منتدى نادي محبي هوندا .. اجتمعنا معاً .. سافرنا معاً ، عشنا واكلنا وشربنا معاً .. تشاركنا في كل شيئ تقريباً ..

معرفتي بهم ربما من لايعرف اي شيئ عنا ، يقول ان هؤلاء اخوة .. وليسو اصدقاء ..

حتى لا اشطح بعيداً :)

في نهاية ٢٠٠٩ وبداية ٢٠١٠ .. تعرف على موقع تويتر .. وهو الشبكة الاجتماعية الاروع اللتي عرفتها حتى الان .. حتى في وجهة نظري انة افضل من الفيسبوك ..

كل شيئ فية بسيط وواضح ووبساطة .. وتأثيرة قوي جداً ..

تعرفت فية على اشخاص كثيرون .. تستطيع من تجاربك في الحياة ومن خلال تتويتاتهم ان ترسم صورة واضحة حقيقة بنسبة ٨٠٪ عنهم .. فتعرف ان احدم جل اهتمامة القضايا الانسانية ، والاخر حزين وحياتة حزن ، والاخر جل اهتمامة قضية فلسطين ، والاخر مشابهة تماماً لتفكيرك واسلوب حياتك ، والاخر ترتاح لة من من اول تتويتة ، والاخر ورقة بلوت الانسان المحشش الكبير ، والاخر ذلك الشخص السامج ….. الخ ..

قابلت مجموعة من مستخدمي تويتر والمهتمين بالماك وبالتصوير بداية ٢٠١٠ وكان لقاءاً ممتعاً ومفيداً في احد محلات القهوة .. واللقاء الاخر في اكتوبر ٢٠١٠ وهو اللقاء الشهري  المستمر من سنة وكان الحضور قليلا مايقارب ٥ اشخاص .. لكن يعدلون  ٥٠ شخص من اسلوب تفكيرهم  وحياتهم واهتماماتهم .. وكان من بين الحضور احد الموظفين الكبار في السفارة البريطانية في الرياض ..

ولازلت اشطح وماخشيت في الموضوع ..

المهم .. من بين الاشخاص اللي تعرفت عليهم قبل كم شهر .. واكتشفت انة فية تشابه كبير بيننا .. قررنا فجأة ان نلتقي لقاءاً من نوع اخر ..

في بداية الاسبوع الماضي اتفقنا ان نلتقي في نهاية الاسبوع في قهوة ونطلع نتمشى .. تبادلنا ارقام هواتفنا //

الاربعاء قبل امس الساعة ٤ ونص العسر .. رقم غريب يدق علي ، الا هو عبد المجيد :) يقول هااااة .. كيف وضع بكرة ؟؟ انت جاد نطلع الشرقية نقابل الرجال ..!

خل ارجع يومين قبل // يوم الاثنين الماضي اضافني واحد كيوووت في تويتر .. عادي ،، يضيفني .. لكن انا ما اتابع احد الا بعد ما اسوي مسح شامل عنة ، وعن تويتاتة وابحث عنة .. لقيتة موجود في الفيس البوك واشوف صورة ومعلوماتة وقررت اتابعة في الفيس بوك ،، قال .. انا ما اعرفك / من انت ؟؟  قلت انت تابعتني في تويتر وانا قررت اتابعك في الفيس بوك ..! قال يا اهلا  وسهلاً .. كلها ٢٥ ساعة واتابعة في تويتر بعد :) .. الشخص هذا اسمة يوسف .. وايضاً يعرف عبد المجيد بنفس الطريقة ..  عبو تويتر فقط ولم يرا اي احد منا الاخر بعد .. وكان من بين السواليف معة شرايك نمرك الشرقية انا وعبد المجيد .. كلها مزحة ..

ارجع لأتصال عبد المجيد .. هاا مصعب .. انت جاد نطلع الشرقية نقابل يوسف ..! (طلعت مجرد تتويتة مني .. واذا بها تنقلب جد ) قلت والله انا ماعندي اي مشكلة .. انت بيها طلعة يوم واحد ولا طلعة يومين خميس وجمعة .. قال اللي يريك ..

سألني // طيب انت تعرف يوسف ؟ قد قابلتة ؟؟ قلت لا والله ما اعرفة ولا قد قابلتة .. ! عبد المجيد في هاللحظة انلحس مخة ..! كيف اطلع وياة وهذا او لقاء لنا وقررنا نسافر فية ونقابل واحد ما نعرفة واحنا اصلا ما نعرف بعض لا من مدرسة ولا حارة ولا طفولة ولا اي شي .. وعلمتة وضعي من ٤ سنوات وان اغلب اصدقائي بهذة الطريقة .. المهم .. في النهاية .. اتفقنا ان نطلع بكرة الساعة ١٠ الصباح (الخميس) ونرجع في آخر الليل بعد ما نقابل يوسف ونشوي ع البحر << فكرتي  .. ونرجع ..

جا بكرة الصباح ،، الساعة ٩:٢٠ يدق على عبد المجيد .. واذا بة عند دوامي زي ماوصفت لة امس بس انة جاي بدرررري .. مديري البريطاني قدام وجهي .. مايمديني اسحب كذا .. نزلت قابلت عبد المجيد وقلت عندي شغلة وازرعة لين الساعة ٩:٥٥ دقيقة وانحشت من الدوام وارسلت رسالة تسليك لمديري بالعنجليزي طبعاً :)

مسكنا الخط .. وصلنا الشرقية ..

تغدينا في مطعم ماضينا ..

اتصالات بسيطة وقررت اقابل اول اصدقائي الانترنتين منذ ٤ سنوات من الشرقية .. قابلت سعد وصديقة سلطان واخوة محمد في الهاف مون .. لكنهم تأخروا وكسبنا الوقت في نص ساعة دبابات على الطعس بجوار البحر ومنظر الغروب الخالع :)

وصلو الشباب .. واحلى قهوة وشاي تشكر عليها يا سلطان ..

طبعاً عبد المجيد متحمس يشوف مبارة النصف النهائي كأس خليجي ٢٠ عدن // وهذي سالفة بلحالها … عبد المجيد يحسبها الساعة ٤ العصر ،، وانا حسبتها ٥ العصر .. وفي النهاية طلعت الساعة ٨ الليل .. (ما انتبها للتوقيت الموجود في موقع كورة انة توقيت جرنتش)

رحنا مجمع الراشد يقولون فية كم كفي هناك فيها تلفزيونات .. لكن جتهم اوامر كويسة بعدم تشغيل المبارة داخل السوق .. لأن ببساطة ان فازت السعودية فية شعب غبي مايعرف يفرح بيقلب المكان هيصة ..

فـ رحنا كفي شوب في الخبر كويس لابأس فية وتابعنا المباراة هناكـ وكويس ،، قالبنا الشخص الكويس سعيد الغامدي ،، المحشش الخالع :) وفاز المنتخب ،، والان الى الخطوة الاخيرة ..  ( لحط يطلب من العامل في هالكفي اذا كان زحمة .. لأنة بكل بساطة دلخ ،، مسوي انة يحفظ الطلبات وعطيناة عشرين طلب ونسى طلبي اللي اكدت علية ٢٠ مرة وكنت اقول لة جب ورقة واكتب )

العشاء (شوي ) على كورنيش الخبر .. الجو بررررررررد ..  وشبيت الفحم واحتري سعد يجي وتأخر عشان بيجيب اللي بناكلة ونشوية معة لكن عندة خطة ب و ج وهي انة جاب واحد من اخوياة .. وانا بعد كلمت واحد من اخوياي قديم وجا ..

طبعاً للحين ما تم الهدف من رحلتنا وهو اننا نقابل يوسف ..! جينا وكان مشغول .. وقت غداة ماحبينا نشغلة لأنة مع اخوياة .. ماله في المباريات فكان لقاءنا المتفق علية في الليل ..

في اللحظات الاخيرة من الشوي وصل يوسف .. وقابلنا .. شخص كيوت وهادي جداً ،، بسيطة لأنة سعودي بس موب عايش في السعودية .. معظم حياتة من طفولتة عايش برا السعودية من بريطانا – نويزلندا – استراليا ،، والحين مستقر للدراسة في امريكا وعندة شهرين اجازة … يعني خلال السبع سنوات الماضية كل سنة يجي السعودية يقعد فيها شهر لا اكثر ..

طبعاً ما تعشى معنا لانة غير متوحش .. الاخ طلع نباتي فقط ..!

اجل نشوفك على خير .. تعيشنا ويوسف مشى ..

بعد العشا قعدنا سواليف … الساعة ٢ قررنا نحرك للرياض .. عشان بكرة جمعة ولعنا نستمتع يوم في الرياض ..

حركنا .. ماكملنا ٧٠ كيلو الا حنا صافطين في محطة في ظل تريلا وراقدين في السيارة من التعب .. اقسم بالله برررررررررررد .. عبد المجيد معة فروة .. وانا ماعندي .. متعود انام في البرد في البيت .. لكن موب برد خط الشرقية .. جت الساعة ٦ تقريباً قمت من النوم لأني كنت على الهزاز من البرد ،، وصحيت عبد المجيد وشافني بردااااان على طول رمى فروتة علي وشغل السيارة وكمل الخط … ان كالعادة ،،، بودان وجاك شي يدفيك ،، قلتة لة عن اذنك غفوة .. قال بالله ارتاح وخذ راحتك :)  صحيت قبل الرياض بـ ٣٠ كيلو :)


وهكذا انتهت احدى مغامراتي الجيدة :)



Be Sociable, Share!

التعليقات


اسم المعلق: محمد بن عبدالعزيز
4 ديسمبر 2010, 2:07 م

اجل قبل الرياض ب ٣٠ كيلو حركتهم باااااايخه

وش حليفه اذا ركبت معي تاخذ غفوه ١٠ دقائق وتصحى

المهم فيه طلعه للأحساء ينفع الاثنين والا الخميس صد رد :twisted:


اسم المعلق: MoSaB
4 ديسمبر 2010, 2:56 م

ينفع ليش ما ينفع ،،، بس بتصير شغلة عبيطة كالعادة … يمكن نروح سيارتين ..!


اسم المعلق: يامطنش
5 ديسمبر 2010, 3:12 م

وفجاه تقوم من النوم في وسط تغريزه


اسم المعلق: تويتي
5 ديسمبر 2010, 10:23 م

عاداتك يامصعب ماتخليها تعزم بالرجال وتسحب نومه حبتين عليك بس

بس اهنيك على الشجاعه اللي فيك اللي خلتك تتعرف على ناس كويسه


اسم المعلق: MoSaB
5 ديسمبر 2010, 11:58 م

^^ وانت مسوي اعرفك في مدرسة ..! ^^

كل اللي يشاركون في هالمدونة تعرفنا على بعضنا بهالطريقة ..

لا نقول الا //

اللهم انك اعطيتنا خير خلقك دون ان نسألك .. فلا تحرمنا لقياهم في الجنة ونحن نسألك ..

مطنش // تقوم وسط تغريزة ازين من ماتقوم 8-O


اسم المعلق: Akram
7 ديسمبر 2010, 4:18 ص

أموت و اعرف هذول النباتيين كيف عايشين :-?
مغامرة جيدة قبل نهاية السنة :lol:


اسم المعلق: سُكينة
8 ديسمبر 2010, 1:46 م

أسلوب حلو للتعارف والتغيير.. عليكم بالعافية =)


اسم المعلق: عبدالمجيد الباتلي
9 ديسمبر 2010, 12:51 ص

اووووه .. حركتات .. :mrgreen:
ليش ماعلمتني أنك كتبت عن الطلعه بالصدفة قريتها ^^

والله تشرفت بمعرفتك يامصعب وكانت طلعة سريعة وحلوه ^^
أن شاء الله الجايات أكثر وتكون طلعة منظمة ومخططه مثل ماتحب :)

:lol: <<< هالفيس خطييييير ههههههههههههههههههههه


اسم المعلق: ابو ريان ناصر جعفري
9 ديسمبر 2010, 10:38 ص

السلام عليكم تقريرك قوي بس ودي اعرف الصوره اللي. فوق لك ؟؟؟؟

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: