تصنيفات

اخر ما كتبت

مدونات

مواقع ومنتديات

منوعات

ارشيفي القديم

عن عــ١٤٣١ــام جميل جداً ..

ان لم اكتب الان .. لن اكتب ابداً ..

اخترت هذا العنوان لأنة فجأة .. طرأ على عقلي ..

لأنني كنت محتاراً ماذا اكتب عن هذا العام ، وكيف سيكون العنوان ..

اخترت ان كل جمله تطرأ على عقلي الان اكتبها مباشرة في مدونتي ..


كنت سأختار عنواناً سابقاً عام الفرقى .. لأني فارقت فية اشياء كثيرة جداً .. بداية من تفرق قروب هوندا ،، الى اختلاف وتفرق الشباب القدامى اللي موعدنا كان ولايزال كل اربعاء في الاستراحة .. ووفاة القلطة الاسبوعية لهم .. ونهاية بفراق محمد البيشي ..

في بداية هذا العام كنت ادرس ،، وتوني عرفت ان الدراسة نعمة .. بعد مافقدتها تخرجت من معهد الادارة بالرياض ..

كانت ايام حلوة .. مافية شي يكدر خاطرك .. كانت مكافأة المعهد تكفيك طول الشهر ١٠٠٠ ريال فقط ..

في راسك شي ؟ سوية .. محد ماسكك .. في راسك رحلة اليوم الواحد الى سينما البحرين في وسط الاسبوع في وسط الاختبارات .. سوية .. محد يقول لا ..

كل الفلة ايام الدراسة ،،انت خصيم نفسك .. تبي تنجح بمعدل ؟ تبي تنجح وبس ؟ تبي تعيد الترم .. براحتك .. وكلن عقلة براسة ويعرف خلاصة .. وسويت افضل خطة ايام الدراسة ،،

بعد تخرجي من معهد الادراة :) ههههه تخرجي الاول // لاني عايش الحفلة والدور صح .. التخرج الاول هو بعد ما تخلص كل الاختبارات ،، وتطلع النتايج .. الحمد لله مصعب ناجح ،، لكن باقي نص ترم تدريب ميداني ، تروح تطبق في احد المؤسسات او اي مكان يحدد لنا ..

تم اختياري للتطبيق في صندوق المؤية .. الحائز على عدة جوائز في افضل بيئة عمل في السعودية للمنشئات اللي فيها اقل من ٥٠ موظف ..

كل شي فيها يفتح النفس .. من المصلى .. للديكورات ، للتكييف ، للناس الموجودة من نخبة المجتمع ، فيهم اول مدون سعودي ، فيهم محترفي التصوير ، فيهم مديري ابو محمد ، فيهم زملاء عمل غير مدخنين ، فيهم روح الشباب حيث اعمار الموظفين تتراوح بين ٢٥ و ٣٩ عاماً .. افكارهم دوماً ايجابية ..

كان اطلق شي في الدوام .. انة مافية توقيع الدخول والخروج .. الكل يجي خلال ربع او ثلث ساعة من بداية الدوام الرسمي ،، شي يحسسك انك حر ..منت جاي لسجن ورقابة .. وبالمقابل .. الانتاجية عالية ،، ما تجي الساعة ٢ الا كل الاشغال مخلصة احياناً ،، الا اخر الشهر حيث تبدأ الحسابات ،،

سواليف حلوة صارت .. اغلبها كتبت عنها في المدونة .. مثل سالفة المطر اللي جا على الريا ض .. اللى احتفل بالعالم .. وكنت وقتها بصندوق المؤية ..

تابعوة في موضوع // البرودكاست ، والمطر ، والشعب الفلة -١-٢

من الاشياء الحلوة في الدوام ،، كل الشعب اللي فية يستخدومون الايفون :) << رابطة محبي الايفون .. وثلاث ارباع الشعب معهم ايفون وبلاك بيري .. طبعاً البلاك بيري استخدام سعودي مع الاسف <<< خاصة الدبشة رائد الزهراني ،، كل دقيقة ٦٠٠ برودكاست ..!

افضل اجازة خذيتها بحياتي ،، يوم كنت بصندوق المؤية .. طبعاً مديري العزيز ابو محمد كنت اعتبرة اخوي الكبير ..

الشباب معي في الدوام اذا بيكتبون لة ايميل .. لازم يصير ايميل رسمي يعني في مقدمة وتحية ولغة عربية واضحة بالطلب المحدد مع المرفقات ثم الخاتمة ،،

اما انا لا .. ان جيت ابرسل لة شي .. كأني قاعد مع واحد من عيال الاستراحة في بيتهم وبسألة بتجي الاستراحة ولا لا ..! كان اسلوبي معة اسلوب عادي جداً بعيداً عن النفاق الاجتماعي والنفاق العملي .. فلذلك كانت كل طلباتي مجابة عندة ،، ودائماً ارى الابتسامة في وجهة :) بس الله لا يوريكم .. مرة جانا اسبوع كامل قافلة اخلاقة من شي صار خارج الدوام .. ولا ندري وش هو ..

كانت اطلق اجازة لما ارسلت لة هالرسالة تقريباً كانت كذا ،،

/// السلام عليكم ، تخيل لو جاك عرض من مؤسسة او نادي او تنظيم تطوعي تعمل فية وقت وفراغك ، وقالو بنعطيك ٤٥ الف ريال بس خذ اجازة من صندوق المؤية لمدة شهر وبنوديك مكان سياحة على كيفك ، بتوافق ولا بتقعد في هالحر والقيود واللي بغى مصعب يجيب فيها العيد ؟؟ ///

والله كذا كان نص الرسالة تقريباً .. طبعاً جرت العادة اني اذا برسل شي زي كذا ارسلة وانحاش اطلع للسيارة ولا اصلح شاي وارجع للمكتب ، رجعت المكتب الا حسين << زميلي في المكتب يقول بسرعة بسرعة ابو محمد يبيك ..! انا استحي اذا جيت اقابلة مدري لية .. المهم تظل للمدير هيبتة ، اخش عندة والقاة ابتسامتة شاقة وجهة .. واعطية السالفة كاملة اني بطلع امركيا لمدة شهر تقريباً مع جمعية الكشافة العربية السعودية في برنامج الزائر الدولي وهذي المرة الثالثة يصير في المملكة وكل البرنامج والمصاريف على حساب وزارة الخارجية الامريكية .. استانس ابو محمد يعجيك .. يفرح لفرح غيرة .. على الرغم من انة كان بحاجة جميع فريق العمل لأننا كنا في فترة الاقفال كل ٣ شهور ..

لحظة .. انا ودي اتكلم عن سالفة امريكا بشكل مفصل .. عن سالفتي مع الكشافة مرة اخرى بعد انقطاع طويل ..

سالفة امريكا من يوم مابدأت اول خطوة فيها حتى قبل السفر بأسبوعين ماكان يدري عنها احد ابداً ابداً .. حتى ابوي وامي واخواني واقرب اصدقائي ،، لأني كنت ابي اروح .. لأني لاحظت اي شي انوعد فية او قالو انة بيصير لي .. ثم ابدا الحديث عنة .. انحرم منة .. ففضلت ان ( اقضي حوائجي بالكتمان ) ..

بداية امور الرحلة كانت مع بداية ٢٠١٠ ، قبل ٦ اشهر من الرحلة ،، وكنت ادري ان فية كم رحلة دولية للكشافة للبرازيل وكينيا وكلها مخيمات دولية معروفة عند الكشافة .. وكل كشاف يتمنى يحضرها .. المهم ان كان فية اسئلة كثير عن معلومات عن حياتك .. وسكلنك واهلك ووالديك وتعليمك .. اقسم بالله تطفش وانت تعبيها .. كأنها سيرة ذاتية عن حياتك .. وما كان مكتوب فيها اي شي .. يعني ماتدري من يطلب ذا المعلومات .. بعد فترة شهر صار اول اجتماع حقيقي للمفاجأة .. ان الطلعة كانت لأمريكا وليس لأي دولة اخرى .. ان الطلعة مع برنامج الزائر الدولي وليس طلعات الكشافة المعروفة ..كنا تقريباً ١٧ شخص .. ليتم اخيار ١٠ اشخاص فقط .. تشوفون كيف الغبنة ..! لاصرنا كل الـ ١٧ نبي نروح ثم يتم اختيار ١٠ فقط ..

والقهر .. يوم سجلنا اسمائنا في الورقة .. وكان القائد الكشفي حق فرقتنا موجود ، والمفوض العام موجود حيث طلب هذا الاخير من القائد الكشفي لفرقتنا اختيار اشخاص من هالـ ١٧ اختيار مجموعة للأحتياط .. وكأني اشوفة مأشر على اسمي في الورقة لأني عارف وين كتبت اسمي وصرت في الاحتياط لأني كنت توني راجع للكشافة ومايدرون وش مصعب من لحية ..

مرت الايام الصعبة .. اسمع اخبار ان كم شخص موب رايحين .. لظروفهم الخاصة .. تقلص العدد الى ١٢ تقريباً .. يعني ٢ احتياط ،، ومع الايام ومع الوقات ومع الدعوات الصادقات ،، طبعاً كانو ماخذين صور جوازاتنا وكل شي عننا وارقامنا .. كنت في البحرين واتصل على المفوض بنفسة ،، هاا مصعب ما جاك ايميل من السفارة ولا شي اتصال ولا شي .. قلت لا ما جاني شي .. الحين بدا فيني الامل ان فية احتمال كبير اروح ..

يوم من الايام في الدوام .. جاني اتصال من رقم غريب .. وارد علية .. الا تطلع وحدة من السفارة الامريكية .. وتطلب مني اجيب جواز السفر في اليوم الفلاني في الوقت الفلاني وبيقابلكم الشخص الفلاني .. العادة ان جيت اكلم في الدوام اطلع من مكتبي … رجعت المكتب عبارة عن ابتسامة .. عبارة عن وجة احمر .. حمود ، محمد ، حسين .. مصعب وش فيك .. فرحنا معك الف مبروك .. شافو الفرحة في وجهي .. قلت لحمود ومحمد كل شي في وقتة حلو .. لأنهم في الكتبين اللي قدامي وبينهم وبيني باب .. مافية الاحسين وعلمتة السالفة وفرح لفرحتي ..

رحت السفارة في الوقت المحدد ، سلمت جوازي لهم عرفنا وش المطلوب .. الصور بمقاس محدد ، تعبي ابلكيشن يطفش يطفش يطفش .. مدري الخطوة متى كانت بالضبط قبل تسليم الجواز ولا بعدة .. واتوقع انها قبلة .. لكن .. للمعلومية فقط :) بعد الخطوة هذي كثر دعواتك :)

يوم الفرحة العالمي // يوم قالو ان فية اجتماع في الكشافة مع المرشحين النهائيين .. الصراحة انا للحين ماكنت ادري وش وضعي .. اوكي سويت كل شي وجوازي بالسفارة .. لكن من المرشح ومن اللي ما ترشح ..

مصعب بالزي الكشفي الرسمي << حق محمد بن عبد العزيز :) .. الكل موجود .. المفوض العالم موجود ،نائب رئيس جمعية الكشافة ايضاً موجود ، وصل الملحق الثقافي الامريكي .. ومعة مترجمة من جنسية عربية ..الكل متشوق لمابعدة ..

نبذة عن برنامج الزائر الدولي ،، اين ستذهبون هناك ، ما ذا سنفعل هناك ، ما سنتوقع من المشاكل في الطائرة وبداية دخول امريكا والاجراءات الامنية وكيف ان معنا ( وااااسطة ) .. وش تجيب معك .. وش تحط بشنطتك ،، كل شي ..

جائت اللحظة الحاسمة .. توزيع المظاريف .. مظاريف رحلة العمر .. اللي بداخلها تذكرتك .. وجوازك .. والفيزا الامريكية .. وكل شي عن الرحلة .. وكل شي يفيدك بذا الطلعة ،،

بدأ توزيع المظاريف .. جاء اسمي اخيراً ولله الحمد .. الحين // آن لمصعب ان يمد قدمية :)

اخذنا الصور التذكارية .. اخذنا المظاريف رحلة العمر معنا .. كل وفرحتة معة لبيتة ..

اول شي سويتة رحت لأمي // يمة الظرف هذا فية ٤٥ الف ريال عشاني :) وطبعاً وجهي متشقق من الفرحة .. ٤٥ الف ريال عشان اذا سويت اللي فية .. واذا ماسويتة لي منها حول ١٠ الاف …

وتقول وش السالفة ،، واقول لها اني مخطط من كم شهر على هالسالفة وطبعاً ( انا رايح ) مافيها مجال للنقاش .. :)

طبعاً امي الله يحفظها حبيبة .. مايمديها تقول شي :(

باقي ابوي .. اطلق ميزة فية ان ايام شبابة ولازال شاب .. انة كان مسجل في بيوت الشباب .. وكانت رحلاتة الداخلية والدولية شغالة .. وكنت مثلة قبل ٦ سنوات تقريباً ،، اذكر في احدى السنوات رحت كل طلعات بيوت الشباب الداخلية ( المدينة – ابها – حائل – نجران ) .. كل رحلة ٤ ايام .. وكانت كلها تحت شعار ( اعرف بلدك واكرم ضيفك ) ايام حلوة .. وكلها كانت في نفس السنة .. ولي صور وذكريات حلوة .. ايام الكاميرا اللي بالتحميض ..

جيت ابوي ذات مساء وكان تاكي قدام التلفزيون ،، قلت لة انت كنت مشترك في بيوت الشباب وكان فية رحلات داخلية صح .. قال اية .. قلت طيب عندي طلعة مثلك حقت ابو شهر … وييين ؟ قلت امريكا .. ايوووة .. كيف وشلون ؟؟ قلت مع الكشافة .. على حساب وزارة الخارجية الامريكية ويعطوني ٣٥ الف مصروف جيب .. قال رح .. ٦٠ داهية لاترجع :) هع هع

تمت الموافقة ..

خلال هالشهر شريت اغراض للطلعة بحدود ٢٥٠٠ ريال .. اول مرة اهتم بكل التفاصيل .. شنطتين ،، احجام معينة .. حاط ورقة في كل شنطة وش فيها .. وحاط نوتة بالجوال بكل شي .. واعلم اهلي لحد يسوي بطل ويحط اي شي بالشنطة وانا مدري وفجأة تفتيش في احد المطارات الامريكية ويقولون وش ذا ؟ اقول مدري وفجأة جوانتانانو …!

المهم .. قبل الطلعة بأيام قليلة جداً علمت محمد البيشي وعبدالله الحبيب ، الاخير زواجة كان في منتصف وقت طلعتي لأمريكا .. والتخطيط للرحلة كان من قبل ما يخطب ،، فتعذرت منة وهكذا تجري الحياة .. حضرت ولا ما حضرت الزواج قائم والحياة مستمرة .. اللهم ماراح اخذ صورة معك .. في يوم العمر .. وفي نفسك الوقت .. سأكون في رحلة العمر ..

قبل الرحلة بـ ٣ دقائق ،، وانا في احدى طائرات اسطول لوفتهانزا الالمانية ،، ارسلت رسالة للعزيزين على قلبي فقط حوالي ٢٥ شخص .. وفي مفاجأة لهم // نستودعكم الله الذي لاتضيع ودائعة .. حللونا وابيحونا .. بعد قليل تقلع  رحلتي بإتجاة المانيا ثم امريكا .. لمعرفة اخباري لحظة بلحظة : www.twitter.com/iMosab ولمتابعة تقاريري بشكل اسبوعي زوروا مدونتي www.mosab.me محبكم مصعب الزيادي . //

وقفلت الجوال .. ولا شغلتة الا في المانيا .. احلى شي في الحياة اني شفت اتصال من ابراهيم العمري .. الله يذكرة بالخير .. ولقيت كم تنبية باتصالات من اصدقائي ورسائل اخرى ،، طبعاً ابو مصعب وابو ريم وابو هزاع وكم واحد من كبار اخوياي .. هههه ما ردوا ولا اتصلو .. لأنها كانت صدمة لهم ..

قبل الطلعة بيومين .. عزمت قروب الاستراحة .. قروب هوندا انا ومحمد على عشوة حلوة وعلمناهم الخبر ..

قبل الطلعة بيوم .. طلعت مع مهدي .. كانت طلعة حلوة وكانت وداعية له لكني ما قلت لة .. جتة صدمة يوم درا اني رحت بعد ساعات قليلة من لقائي معة ولا قلت لة اي شي .. شفت ايميلاتة .. وقلت لة ،، من بين ٤٠٠ شخص في جوالي اعرفهم .. الرسالة جت لـ ٢٥ فقط تقريباً .. وما طلعت الا مع واحد فقط وهو انت فقط يامهدي :)

قبل ما اطلع من البيت ودعت امي ادري ان فية دمعة بعينها .. سلمت عليها وصدت عشان لا اشوف دمعتها ،، الله يحفظها ويرعاها ..

ابوي وصلني المطار .. كنت شايل هم النصائح المعروفة حقت لاصار عمرك ١٣ .. لكن الحمد لله ماطرا ولاشي .. ودعتة ..

في تويتر كنت المح انة باقي كم يوم .. وكم يوم .. واللحظات الاخيرة ..

مصعب في المانيا .. مصعب في امريكا لـ ٢٨ يوم ..

مصعب رجع من امريكا ،،

كيف الاختصار بس :)

سالفة امريكا ان شاء الله اخصص لها تدوينة خاصة ..

رجعت من امريكا وكان يوم احد ..

الاثنين المواطن الصالح مصعب مداوم في صندوق المؤية :) رحت اسلم على ياسر المسفر اللي كان كاتب في تويتر ( ابي قهوة ابي اجازة ابي برد ابي مطر ) ورديت علية حياك الله عندنا واعطية الموقع في شيكاغو عند البحيرة العظمى واعطية الوصف ان الجو خالع وفية امطار والبحيرة عذبة اعذب من اي موية صحة تشربها ومويتها ابرد من اي موية تروشت فيها .. انقهر وقال استمتع بوقتك .. قلت لة كلها يومين وجايك واقول مثلك ابي برد ابي مطر ابي قهوة :)

رجعت // الا اهلي كلهم في جدة .. مافية الا ابوي واخوي بالرياض ..! طبعاً مثل ما قلت الاثنين داومت .. وفاجأت الشباب بالدوام بوقت عودتي الغير متوقع .. وفاجأت ابو محمد .. وسلام وسواليف والايباد مع ابو محمد يشوف الصور .. وقلت لة .. ترا اهلي في جدة بروح اجيبهم .. قال اصلا لية تجي يوم الاثنين ..! لا اشوفك الا السبت :) كم انت رهيب يا مديري :)

رحت لجدة // وكلي شوق الى خواتي وامي .. .. خالي فيصل متعود على سفرياتي .. دام التصريفة المعتادة لأي سفرة اقول لهم مع التحفيظ ولا مع بيوت الشباب .. الا هالمرة قال لي ، والله شطحت بعيد يا مصعب .. امريكا مرة وحدة خخخخ لا تكون مع التحفيظ بعد ..! اي تحفيظ ياخالي .. هذي مع الكشافة ..

رجعت للدوام بعد جدة .. واخواي اللي بالرياض اغلبهم للحين محد درا اني جيت .. كان الوقت نهاية الصيفية تقريباً وقبل رمضان بـ ١٢ يوم .. في هالوقت وكما جرت العادة .. اجتمع مع اصدقاء الصبا <<< ونطلع ابها لمدة اسبوع .. هكذا منذ ١٣ سنة .. اللي يحضر الله يحية .. اللي مايحضر عذرة معة .. قلوب طيبة طاهرة مافيها مجال لأتهام احد او الدخول في النيات .. طيب الحين ابي اروح ومستحيل آخذ اجازة ثانية مدة اسبوع .. ابو محمد بيحتفل فيني ،، امريكا ماقلنا شي .. جدة عشان اهلك ماقلنا شي ،، لكن ابها مع اخوياك .. لا تفلها واجد ..

الاجتماع الاخير قبل انطلاقة الرحلة الى ابها كان في بيت ابو ريم .. طبعاً كل اجتماع توصل رسالة للجميع .. خاصة للمشاركين والمدعين والمتميزين السابقين في الرحلات السابقة ..

قبل ما يبدا الاجتماع .. الا مصعب مداهمهم .. الكل فرح بعودتي المفاجأة لأن روحتي كانت مفاجأة .. بعد السلام والاخبار والعلوم .. هااا مصعب بتخاوينا .. قلت والله مدري .. مديري يالحبايب ماظنتي بعطين اجازة غير اللي خذيت .. ويقولون حاول وحاول وتراك بتمسك الاجتماعي كالمعتاد .. واوعدهم خير :)

الرسالة التالية لمديري //

عزيزي ابو محمد ، تعودت كل سنة في مثل هالوقت من كل هام ومنذ ١٣ عاماً اني اطلع مع اخوياي القدامى الى ابها .. ادري ان فليتها واجد في السفريات الماضية .. لكن اتمنى ان توافق على هالاسبوع واما مايمديك اتمنى توافق بعد :)

مصعب وينة .. واجية المكتب .. كالعادة الابتسامة .. لكنها ناقصة .. مصعب الغل والكرف الحين و … و… بس لازم تطلع يعني ؟ .. اية والله يبو محمد ١٣ سنة نطلع ودام انا الاجتماعي يعني اكلهم وشربهم عندي .. :) … طيب يامصعب انا ماودي تروح .. لكن براحتك … :)

براحتك ؟؟؟ الحين ابو محمد يخيرني اروح ولا اقد … اكيد برووووح :)

مصعب وينة .. مصعب في ابها :)

مصعب وينة .. مصعب رجع من ابها :)

كل شي الحين تمام .. بدا رمضان ..

في بداية رمضان صار موقف بايخ .. ما ادري بدا رمضان ولا بيبدا وبعد شوي ولا بيبدا بعد شويتين :)

الشباب قالو الوعد في الاستراحة بعد صلاة العشاء ..

حركت قبل اذا العشاء وكنت مشغل الراديو .. الا اسمع المذيع يقول ان رمضان دخل // يعني الحين فية صلاة عشاء وتراويح ..

انا انسان ما احب اصلي في اي مسجد ورا غراب ولا ورى آدمي ،، لا صار صوت الادمي غراب مايحتاج اصلي التراويح وراة .. لانة ببساطة مافية خشوع ولا انسجام مع الصلاة .. فتروح تخلص اغراضك وشغلك اصرف ..

الحين محتارح وقفل جوي لأن اقرب مسجد كويس بعيد .. والعيال مدري راحوا الاستراحة ولا لا ؟ ( الاستراحة كانت مهمة لان فيها عرض كامل لرحلة ابها + التكريم للأعضاء الفعالين فيها ) واذا هم بالاستراحة وين بيصلون ؟؟

في هذة اللحظات الحاسمة اذا بوجهي وسيارتي يقلب لونها ابيض على فضي وكنت ابي احترق ..! ملعون الوالين ساهر حاطية في شارع مافية لوحات تحدد السرعة .. صادني ساهر الحقير وانا ما ادري كم السرعة في الشارع .. دريت يوم جتني sms على جوالي بعد اسبوع فيها ان المخالفة ٣٠٠ وانا كنت ماشي ٨٠ والسرعة اكتشفت انها ٧٠ …

هذاك الوقت من جد قفل جوي مرررررة … ورحت الاستراحة .. في ديراب … وقعدت ساعة ادور وين اللفة حقت الاستراحة ؟؟؟ اثر اني معديها وبغيت اوصل مكة ..! من القهر .. واديور واصلي بأقرب مسجد والاقي الاستراحة بعد ما دقيت على حمد ..

كالعادة في رمضان .. آخذ عمرة … مع نفس الشباب ، هالمرة ولأول مرة في تاريخ العمرة احلق شعري مووووووووس ، ما قد جاة الموس الا قبل ٩ سنوات ايام الحجة الاولى ..

كالعادة في رمضان الطلعة مع قروب هوندا لأي ديرة في رمضان ..

السنة الماضية كانت الشرقية

السنة اللي قبلها كانت ينبع

السنة هذي ينبع .. وكانت طلعة كويسة ..  جا ماهر وسعد من الشرقية .. خذوني ونايف من الرياض .. فطرنا عند عبدالله بالقصيم .. وخذيناة معنا لينبع ..

حللنا ضويفاً كالعادة عند اخونا الكبير محمد البيشي ، عشنا بينبع يومين او ٣ ايام .. بدأنها بالافطار في فندق الموفنبيك .. بوفية مفتوح فية كل مالذ وطاب .. يوم خشينا الفندق عبد الله الحبيب يناظر في الفندق ويقول // ايام حلوووة <<< بعض ايام شهر العسل كان في هالفندق :) وهو ثاني شخص يتزوج من قروب هوندا بعد سلطان .. والبقية تأتي :)

كالعادة .. طبغ ، نفخ ، عض ، صلاة ، صوم ، قسم قوارض وقسم اوادم ..

فجأة تجي مكالمة او اتصال لنايف انة يجب ان يحضر في الرياض لمقابلة  شخصية ،،

عندنا للرياض ،، اكملنا ما تبقى من رمضان في الرياض ..

اهلي .. كالعادة يبعيدون في مكة وجدة .. معكم سائق تحقيق الطلبات مصعب :)

آخر يوم في رمضان نشبت النشبة الاليمة لمحمد اني اقابلة آخذ الايفون ٤ بتاعي .. مالها داعي اعيد بسوني اريكسون :)

رجعت مكة .. قضيت آخر لحظات الشهر الفضيل في الحرم .. فطرت في الحرم .. بعد صلاة المغرب تعيش اجواء رائعة مع صوت مدافع العيد .. <<< لي ذكريات حلوة زماااان قبل ماشتري السيارة .. يوم سمعتها اول مرة بحياتي << كنت اراسل الاستاذ يحيى الزهراني (مدرسي في ثاني ثانوي ) اقولة كل عام وانت بخير من الحرم وانا اسمع مدافع العيد :)

العيد .. كالعادة .. راح طعمة .. صليت العيد  بمكة .. شويتين … او قبل العصر .. رحت جدة للعزيمة المعتادة الكبيرة .. في استراحة خالي ،،

في يوم العيد سرق بيت جدي في جدة .. لأن ببساطة ما يصير بيتة وبيت خالي فاضين الا في هاليوم … السرقة تمت بإحترافية ومعرفة مسبقة بكل تفاصيل المنزل ،، ولا كيف يخش السارق ويعرف مكان الخزنة والغرفة اللي فيها الفلوس والعيديات وكل شي ؟؟؟ الله يعوضة خير ..

باقي مايقارب شهر على سفر محمد للدراسة في امريكا .. كنا نخطط ايام رمضان نطلع مصر ولا اي ديرة ثانية نحتفل ..  بالتأكيد تم كنسلة مصر … جا محمد للشرقية .. حسب آخر المراسلة انة تم الاتفاق على انها تكون للأمارات ،، قروب قليل كالعادة حق سيارة وحدة هو اللي جاهز وكنت انا ومحمد منهم ..

كالعادة .. مايمديني افصح عن خطة مستقبلية لي الا تتكنسل .. علمت كم واحدن من اخوياي اني بطلع الامارات …

الا فجأة يجيني خبر ان محمد موب طالع الامارات .. اجل .. مالها داعي نطلع دام اصلا الطلعة عشان نحتفل معة بالامارات .. دقيت علية وش السالفة .. قال ابوي قال اركد دام انك قدمت استقالة من ارامكو جمع قروشك تسفيد منها في امريكا .. دقيت على صالح اللي علمني الخبر .. قلت لة ياعزيزي خلاص ماني طالع .. الرحلة بتكون بلا هدف قال الا بنطلع حتى انا انقهرت ان محمد موب طالع – صالح يتحدث – لكن لازم اطلع ماعندي بريك زي هذا الا بهد كم شهر ومن زمان ماطلعت الامارات وانا وصالح اخذ وعطا في الكلام وافقت على الطلعة بعد ماكان جميع من في تلك السيارة جاهز ..

نحن بمن حضر .. مقولة ابو مصعب الشهيرة .. ان الحياة لا تتوقف عند احد .. كما ان طلعة ينبع للسنة هذي كانت ناقصة بدون من كانو معنا آخر مرة محمد بن عبد العزيز وسلطان .. رحنا هالسنة بدونهم .. شلون يعني .. واحد انشغل نكنسل كل شي ؟ واحد مات خلاص مانجتمع ولا نشوف بعض ؟ .. الغايب عذرة معة وضع لأخيك المسلم ٧٠ عذر فإن لم تجد فإتهم نفسك .. معذروين يا جماعة والخطة ماشية ، حضوركم فعلاً سيزيد فرحتنا وغيابكم سيقلل الالوان واللحظات الممتعة .. لكن ،، الخطة ماشية .. زي ما انا احب الفرحة لأخوي احب اشوف اخوي يبادلني الفرحة ..

رحنا للأمارات .. رحلة بلا الوان .. لغياب محمد .. لكن الغايب عذرة معة .. محمد كان من المخططين للرحلة .. جاة عذرة .. عذرك معك ومعذور .. لكن الخطة ماشية دامها بدأت خاصة وان وقتها كان اكوس من الكويس وكتبت عنها في تدوينة سابقة بعنوان اليوم الوطني  ..

كانت رحلة موفقة في كل الاحوال   .. من السكن للأماكن اللي رحناها لكن صدري كان ضايق ،، والحمد لله على كل حال .. ، مهما كنت منت رايق الا ان الالوان ستعود لحياتك في دبي .. دبي دار الحي ..

محمد في هذة اللحظات مر على القصيم وودع القصمان .. مر على الرياض .. وبقى فيها طوال الايام اللي كنت فيها في الامارات .. كنت ابي ارجع في اسرع وقت وكنت مطفش اللي معي يبون يخشون العاب وانا ساحب عليهم مالي خلق ،، دقيت على محد في آخر ايامي في الامارات ومارد .. ابي اشوف وين موقعة بالضبط .. مارد .. كنا بطريق العودة في كل الاحوال .. اكتشفت في تويتر انة غادر الرياض .. وانا لازلت بالطريق ،،، وصلت الشرقية .. كلن وصل بيتة .. في هذة الاثناء بما ان محمد رجع ولا يمديني اقابلة .. اكملت طريقي للبحرين .. وعدت في نفس اليوم للرياض … واللي بعدة للدوام …. اية صح … ارسلت رسالة لأبو محمد مديري السابق  قلت لة يوم السبت ماني مداااوم :)

لا تكسر ابدا كل الجسور مع من تحب...
فربما شاء ت الاقدار لكما يوما لقاء..آخر يعيد الماضي , و يصل ما انقطع ..
((( فاذا كان العمر الجميل قد رحل فمن يدري ربما انتظرك عمر اجمل)))

من الاحداث اللتي قد تستحق الذكر في هذة السنة .. انة يوم بوم ١٠ / ١٠ / ٢٠١٠ م .. اخترت اترك ذكرى للتاريخ ، في هذا التاريخ المميز ..

الحدث الالكتروني وهو اني افتتحت حساباً في كتاب الوجة ( الفيس بوكـ ) :) بعد معارضة طويلة مع نفسي .. مدري لية ماكنت احبة من كثر ما اسمع عنة ،، كانت عندي مدونتي ومرتاح فيها ،، وكان ولايزال تويتر موجود .. اللي وصلت لة .. ان الجاهل عدو نفسة .. الفيس بوك تقريباً حلقة الوصل الباقية بين اصدقائي القدامى ايام الدراسة وايام نادي الهلال وامريكا والامارات والكشافة ومعهد الادارة واقربائي البعيدين .. /// الفيس بوكـ لأصدقائنا اللذين اصبحوا غرباء ،، وتويتر للغرباء الذين اصبحوا اصدقائنا :) ///

ايضاً في هذا اليوم .. بما اني احب الاعمال التشكيلية .. اللي تشتري طين صناعي من اقرب مكتبة وتشكلة زي ماتبي وتتركة لين ينشف ويجف ثم اذا حبيت تلونة ،، لونة .. آخر عمل سويتة كان في بداية سنة ٢٠٠١ عبارة مباني مستوحاة من مكة المكرمه العشوائية فوق الجبال وفوقهم مسجد .. وفية كم عمل قبلة .. والبداية كانت قبل اكثر من ١٥ سنة لما كنا نروح مع الوالد بطون الاودية والسدود وناخذ من الطين الصافي الجاف عند السدود ونشكلة في البيت على اشكال صحون او اي شيئ آخر بعد اضافة الماء علي الطين ..

اللي سويتة في ١٠-١٠-١٠ بعد حيرة كبيرة .. امي تقول سو مجسم ابراج البيت (اللي قدام الحرم اللي فية الساعة بالذات ) حاولت لكن شغلتة طلعت لعينة يبيلة رسم واختراع ساعة … فـ جت اختى وقالت سو مجسم ويلس تاور (اعلى ناطحة سحاب في  شيكاغو ) اممم الفكرة كويسة لأني عندي مجسم تركيب بلاستك شارية لأختى الصغيرة ..  ونبدا الشغل بين الاذان والاقامة والركعة الاولى ،، واعلم اختى الطريقة قبل نهاية الركعة الاولى واقولها يلة عيدي كل الشغل عشان ابي المقاسات مضبوطة ،، وارجع من الصلاة واضبط الشغلة والقاعدة وخلصنا وحفرنا التاريخ للأبد ١٠/١٠/١٠ على القاعدة واسمي واسم اختى ،،، واتركة لين ينشف ،،،

بعد يومين الاقي ناطحة السحاب حقتنا فية تشققات :) <<< كلة من اختى ،، :) هع هع .. وتضبطة بصلصال ،، وبعد كم يوم لونتة اسود والقاعدة صفرا ،، ،وتبقى ذكرى للأبد ..

اظن بتاريخ ١٣ – ١٠ – ٢٠١٠ كان آخر يوم عمل لي صندوق المؤية … ثم بعدها رحت لشركة عالمية المانية .. دوامهم طووووويل ويطفش … ومديري بريطاني .. الله يصبرنا علية :) ويوم الخميس دوام .. وانا السعودي الوحيد في فرع الرياض :(

جاء موسم الحج ونهاية العام .. كانت لي رغبة جامحة في الحج هذة السنة ١٤٣١ .. لكن قبل الحج بكم شهر اختفت هذة الرغبة ..! لكن .. ان لم اكن حاجاً فسأكون داجاً … والداج هو الشخص اللي يكون في خدمة وارشاد الحجيج .. كنت ابي اروح مع الكشافة  … لكنهم يروحون مع بداية شهر ذي الحجة .. يعني يبيلي اخذ اجازة اسبوع ..!

لايمكن ان اذهب مع الكشافة … فجأة سعود هزاع يعرض على اني اصير مشرف باص ،،! مايمديني ياعزيزي ،، اتحمل مسؤلية ٣٠ عقل مختلفين في التفكير لية ؟؟ مرررة مايمدي ..

آخر ربوع قبل الاجازة الرسمية حقت الحج .. دق ناصر جعفري وقال نبيك بدال ما تصير مشرف باص تصير مشرف اجتماعي … قدااااااااااام هذي شغلتي اللي احبها اصلا .. الاشراف في مجال التغذية .. اشيك وش اللي ناقص ، اروح اجيبة ( اتكلم عن كمية تكفي ٦٠٠ حاج ) من اللي اكل من اللي ما اكل ؟ – كم شي ناقص،  وين باقي الحجاج ، توزيع الصحون ، غرف الاكل …. الخ …

قدااام ،..،..، يلة انا بسبقكم بكرة لمكة .. رحنا بسيارتين ،،! انا وسيارتي لحالي مع جهاز الكوبرا وجهاز لا سلكي ،،، وصدقي محمد بن عبد العزيز قائد كشفي في فرقة السواعد بالكشافة اللي كنت بروح معهم .. لكن ما يمديني .. وكان هو تعبان ويبي احد يخاوية وكل العالم سابقينة مابقى الا هو يروح بسيارتة .. طيب لية ما رحنا بسيارة وحدة ؟؟

لأن هناك كل واحد يحناج سيارة .. كل واحد في مكان .. مابي اربطة ولا يربطني ،،،

رحنا سيارتين وسواليف مع بعض بالاسلكي …

في الطائف قررت اقابل سميي مصعب المالكي صديق جديد عبر تويتر ،، اتابعة ويتابعني وفية كم حاجة نتشابه فيها ،، قابلنا وغدانا في البيك .. ووداعية للشغل في مكة ..

الامور طيبة وجرت الامور على مايرام .. فجأة كل المشرفين بيحجون .. مالها حل جدد النية وحج معهم ،، الحمد لله الحج كان ميسر جداً .. الجمرات جداً كويسة ومريحة والرمي ولا اسهل ،، آخر مرة حجيت قبل ٩ سنوات لما كان الحجاج يلفظون انفاسهم الاخيرة عند الجمرات .. الحين الحمد لله ٥ ادوار ومكيفة عند الجمرات ودور تحت الارض للملوك عشان مايسوون زحمة .. آخر يوم ١٢ للمستعجلين جا مطر … سوا حفلة في رجلي .. لأني كنت لابس جزمة -وانتو بكرامة – رياضية ،، والوضع كلة مشي لمسافات طويلة من قبل نفق المعيصم للجمرات وخشت الموية مع الشراب والجزمة وانا امشي ،، المهم صار فية زي الانتفاخات اللي فيها موية في رجلي .. وانواع الالم ..

بعد رمي الجمرات .. بقى الطواف اللي مالة حل .. الزحمة …

آخر يوم عشان اطوف طواف الوداع وطواف الحج ( طواف بنيتين ) وبعدة سعي الحج ..

السكن حقنا عند جبل النور ،،،! يالله … سويت شي ما توقعت اني بسوية ..

مشينا من جبل النور الى الحرم .. بنفس الالم في رجلي وخذيت زنوبة حقت خويي اصغر من مقاسي ،، المسافة اكثر من ١٥ كيلو بالراحة ..! ليش مشينا طيب ؟؟ لأن الزحمة من عند جبل النور الى الحرم كلة باصات .. يعني ارقد في الباص ولا اوصل الا بكرة او اروح مشي واصل خلال ساعات قليلة … اللي كان مخيشنا صدق اننا نشوف ابراج البيت ونقول قريبة قريييييبة .. اي قريبة ياعمي ،،،!

في الطريق .. والتعب .. والالم ،، فجأة مجموعة من متطوعي مكة يوزعون شاي وبسكوت وموية باردة … قبل ما نشوفهم انا وناصر كنت ابي اشتري موية ويقولون بـ ٣ ريال وهي اصلاً بنص ريال وحارة …! قلت طز فيك وفي الموية حقتك … ثم بعدها سبحان الله شفنا ذا المتطوعين ،،

والله ان الشاي بالحليب علية طعم خااالع والبسكوت رهيييب .. اقسم بالله جاني شعور اني ودي احب راسة قبل حتى ما اذوق الشاي ولا البسكوت … شعور المساعدة رهيب لكل الطرفين ،، المتطوع يشعر بالرضى والفرحة … والمقدمة الية المساعدة وقد يكون في امس الحاجة اليها تخنقة العبرة وعينة ودة تدمع وهو يدعي للمتطوع بالتوفيق .. رغم اني اقدر اشتري بقالة كاملة وما احتاج خدمة من احد .. الا اني والله حسيت بعبرة تخنقني مدري لية .. الله يجزاهم خير ويوفقهم ويرزقهم ويكثر من امثالهم ..

وصلنا الحرم .. والطواف ،،، الله يعين كل من بيحج على الطواف … هو سهل بس فية عالم همج .. الناس كلها تدور حول الكعبة ويجيك واحد ولا ٤ عاكسين الاتجاة يبون يطلعون .. ياصبر الارض عليكم ،، الواحد يجمع حسنات في ايام الحج ويجي يوزعها عليكم مثلا ؟؟

خلصنا الطواف وقلت لناصر الوعد السطح عشان السعي … فاضي والجو عليل .. وتاخذ راحتك في الدعاء … اصلا انا خلصت الطواف ورجلي خارج الخدمة .. في السعي بعد كل شوط توقف عند الصفا او المروة للدعاء ،، هذي فرصتي الوحيدة امد فيها رجلي وارتاح فيها ..

خلصنا السعي وخلصنا جميع مشاعر الحج ولله الحمد والمنة .. الحين باقي العودة للسكن .. والله ما ارجع مشي :)

اقرب دباب ولو قال بـ ٥٠٠ بعطية … اشوا اني ركبت انا وناصر في الدباب الواحد بـ ٧٥ ريال …

وصلنا السكن .. وكانت الخطة الانطلاق للرياض ،،!

ياعالم ياهوة ريحوا شوي طيب ..! الراحة في الرياض ياعزيزي .. باقي سويعات على اذان فجر الجمعة وهو آخر يوم في اجازتي .. :( يعني في كل الاحوال لازم ارجع ..

الجو كان لطيب وشبة بارد في الليل .. ركبت سيارتي وانا ميت ٬ مديت رجلي على قزاز السيارة اللي قدام وسدحت المرتبة .. وضعية الراحة .. اقسم بالله ان القزاز بارد كنك حاط عنة بطاطس مسلوقة … رجلي حااااااااااااااااااااااارة … اشوف القزاز صار علية زي البخار ..!

لسة باقي اسوق ٨٠٠ كيلو للرياض ،،!

٢٠٠ كيلو عزيزي ،، وصلنا عند رضوان .. قبل الفجر بساعة قلت انا انسان مايمديني ،، وصارناصر معزز لي لأنة صاحب السيارة الثانية … والمخلوق اللي كان راكب جنبي من يوم ماركب وهو راااااااقد …! وقفنا .. شوية خمدة .. قوموا صلو الفجر … صلينا الفجر .. النايم اللي معي راح ساق السيارة الثانية .. واحمد السويري ساق سيارتي … مصعب وينة ؟؟؟ مصعب راقد جنب احمد  خخخخخ الين قبل الرياض بـ ٢٠٠ كيلو .. وكنا على سوعة تقريباً ١٧٠ -١٨٠ وناصر طفشان في السيارة الثانية .. مصعب يستلم دفة القيادة ورجلة رايحة فيها .. استانس ناصر .. مصعب ٢٠٠ – ٢١٠ وصلنا بدري قبل صلاة الجمعة ..

تقريباً كانت هذي قصة عام كويس .. على الرغم من انها ناقصة ،،

ماذكرت سواليف التخرج من معهد الادارة ولا ذاك اليوم الكويس ..

ولا تفاصيل وصور رحلة امريكا لكن .. نحط لها موضوع منفصل ..

ولا تفاصيل الامارات والصور والفيديو ..

لكن ،،، الحمد لله … اني اكتب افضل من اني ما اكتب .. احياناً ارجع للي كتبتة قبل سنتين ،، واحمد الله اني قاعد اكتب ،، لسة في ذكريات .. في اشياء حلوة اعيش لأجلها بعدين ،،

Be Sociable, Share!

التعليقات


اسم المعلق: A.A.J
16 ديسمبر 2010, 9:36 م

والله أهنيك .. ماشاء الله عليك راوي
Do not stop “;”the Memories”;” ?! Please,,, continue…..,


اسم المعلق: تويتي
19 ديسمبر 2010, 3:24 ص

ماشاء الله عليك مصمص
اهنيك على الروح اللي فيك
بس يامخيس لازم نعيد ايام القروب مثل اول هذا اكثر شي تحسفت عليه ماعاد صار لنا تجمعات مثل اول
وسالفه ابو فيصل كلام ثاني الله يرجعه لنا بالسلامه

ويعطيك الف عافيه حبيب قلبي مصمص


اسم المعلق: N E X T
21 ديسمبر 2010, 9:43 م

التدوينه جميله جداًًُ ..
و فعلاً كان عام 1431 هـ
من اجمل سنين حياتي لحد الآن ..
( عام مليء بالتغيير )
– اغلب منتجات ابل اجتمعت في بيتنا في هاذي السنه :-D
– شغالة جدي الي كانت موجوده عندهم 17 سنه (قبل لا اولد :) )
سفروها آخر يوم في السنه بعد المصيبه الي سوتها :(
– اتذكر ليالي امريكا و اتابع اخبارك كل يوم على تويتر ..
و كانت ايام جميله عشت جزء منها في الصور ..
بعدين صارت الأيام ثقيله و [ طالت الغربه ] ..
كنت احسب متى بيرجع اخوي :(
سألت امي متى يرجع مصعب ؟
سمعتني جدتي قالت ليش وحشك اخوك :mrgreen:
< هاه 8-O لا لا بس كذا اسأل …!
و بعد شهر من الغربه ..
بعد شهر من الفقد ..
شفت أخوي أخيراً :)
و مسكت الايباد للمره الأولى :)
مليء بصور امريكا .. مليء بذكريات امريكا ..

شكرا لك ..
( اخيراً لقيت شي عني في المدونه :) )


بينغ اسم المعلق: mosab.me » » عن عـ ١٤٣٢ــام حزين ..
31 ديسمبر 2011, 6:26 م

[…] الله .. السنة الماضية كتبت ( عن عـ ١٤٢١ـام جميل جداً ) […]

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: