تصنيفات

اخر ما كتبت

مدونات

مواقع ومنتديات

منوعات

ارشيفي القديم

شكراً للتقنية .. سهلت حياتنا ولكن ..!

من ٤٤٣ اسم في جوالي .. عفواً ،، في آيفوني … لم يعد هناك تواصلاً اجتماعياً حقيقياً ..


العالم الافتراضي يفرض نفسة ..

دعوني اخبركم شيئاً ..

كنت في المآضي السحيق .. قبل ما اطلع الجوال كنت اتواصل مع عيال خالي غسان ، واياد ، وعماد ، امممم اظن هاشم بعد .. كنت اتصل عليهم من تلفون بيتنا لتلفون بيتهم .. الحين وانا اكتب اتذكر رقم بيت خالي فهد ..!

بعدها صرت اراسلهم بالبريد …! اي والله كنت استخدم البريد السعودي ..! واستخدم شفرات معينة عشان خوالي لا يشوفون وش نكتب .. (الله يخلي مجلة ماجد اللي علمتنا الشفرات ) عطيت غسان الرموز في احد السفرات .. والباقي يلة .. اقعد فك الشفرات مع كل رسالة تجيك ، الله اكبر .. وش كنا نكتب ،،!

( اهلين غسان ، امل ان توصلك رسالتي وانت في صحة وسلامة <<< ومن هالكلام ..! ) كنت ارسل لهم صور .. << ايام كاميرا ابو تحميض وتخلص بعد ٣ ايام ..! ، ،،،

جا بعدها اطلق عصر في العالم .. يوم اني طلعت اول جوال بالتاريخ … اريكسون T28s ( هذة الاشياء عجيبة .. انها تتحدث ) وصورة مخلوقين فضائيين في دعايتة ..

كنت على ذيك الايام ابوي مسجلني في بيوت الشباب .. كل صيفية ٣ طلعات داخل المملكة تحت عنوان ( اعرف بلدك واكرم ضيفك ) ،،،

وتسآلوني لية احب اسفر .. ومن شابة آباة فما ظلم ..

يوم طلعت الجوال قررت ذيك الايام انة يكون ( عائلي ) … تصدقون اني اخترت الثمانية اشخاص ٧ منهم من بيوت الشباب اللي طلعت معهم ..! والثامن رقم البيت ، لكن الحمد لله … طلعت جوال عام وافتكيت .. << شطحت بعيد عن العنوان الرئيسي ..

ثم جا وقت عيال خالي .. واحد واحد يطلعون جوال .. الظاهر فية فاتورة قديمة صفحتين منهم انا وغسان ندق ونقفل على بعض ونشوف من يقفط الثاني ، صفحتين كاملة مدة المكالمة ثانية وحدة ،،،! نفس الرقم …! :)

وتمر الايام .. والاتصالات مستمرة .. بين خوالي <<< والله اذكر كنت ع الاقل ادق عليهم واحد واحد .. بيت بيت دار دار ،، جوال جوال :)

جا بعدها العصر الطويل امتد لأكر من ٣ سنوات بالرسائل بدال الاتصال ..

الظاهر هالسنة مافية رسائل ولا اتصال ..! ٢٠١١ !

والسبب ..

الشبكات الاجتماعية اللعينة ..

لها من اسمها نصيب ،، شبكات اجتماعية ..

الفيس بوك اللي ما كنت هاضمة من سنين .. سجلت فية في يوم ١٠ شهر ١٠ سنة ٢٠١٠

اللي عجبني فية اني لقيت اخوياي القديمين جداً جداً ايام الدراسة .. واغلب اخوياي الحاليين ،،

تويتر العظيم .. اعرفة من زمان من ٢٠٠٨ لكن سجلت في اواخر سنة ٢٠٠٩ وكانت سنة ٢٠١٠ هي السنة الذهبية لتويتر ..

(( تويتر للفرباء اللذين اصبحوا اصدقائنا ،،، الفيسبوك .. لأصدقائنا الذين اصبحوا غرباء ))

جا بعدهم برامج كثير ومن ضمنهم برنامج WhatsApp .. ابقول لكم سالفة ..

قروب معهد الادارة (٢ بيض ) – حسن واحمد – اللي دايم اطلع معهم واذاكر معهم .. ما تنصل على بعض الا نادراً ،، اول من طلع ايفون منهم ،، معروف طبعاً ، ثاني واحد حسن ، احمد طلعة قبل كم شهر .. يوم نزل هالبرنامج على طول ذبيت علية كالعادة ، وبعدة سوينا قروب ( ٢ بيض ) اتفقنا ذاك اليوم عبر البرنامج اننا نطلع كافي ونستانس .. ويوم طلعنا الا احمد يقول سالفة ،،، يقول امس لعت والدي والدي والدي اللي اخترع هالبرنامج WhatsApp يعني يوم نزل هالبرنامج صرنا نسولف ونطلع وقلبها يااااااله ندق على بعض ويالله نتفق …! :)

الا حسن يقول والله هالبرنامج خلاني اتواصل مع عمي اللي ما اكلمة ولا اقابلة ولا ادق علية من الاساس …!

قبل امس … طبعاً يومياً افتح هالبرنامج << الا ٢٤ ساعة انا علية ، لكن يومياً لازم اشوف القائمة الجديدة من اللي شروا ايفون وركبوا البرنامج ، (لأن البرنامج يعتمد على قائمة الاسماء لديك وليس لة رقم معين او اي شيء آخر .. ) ، كل يوم الاقي ناس جدد من اخوياي ركبوا البرنامج ..حتى مديري الله يذكرة بالخير حق صندوق المؤية ، ياجمااااعة حتى طارق هادي عندة البرنامج …!!! :)

تفاجأت امس اني لقيت اني صديق قدييييم جداً ايام الدراسة مركب البرنامج .. واسولف معة ..! مع ان كان يمديني اتصل فية ولا رسائل … لكن مدري … وش اللي يمنعنا ،،! .. وفعلاً سويت زي احمد .. قعدت العن والدي والدي والدي اللي اخترع هالبرنامج .. ارقام اصدقاي القدامى موجودة بجولات بعضنا وما نتواصل،، يوم جا WhatsApp تواصنا عبرة ..!

المختصر المفيد … التقنية على كثر ما انها ربطتنا الكترونياً .. وصرنا نعرف اخبار بعض من لبعيد … وصرنا نحس بالامان – فلان الحمد لله طيب وفلان بخير ..

الا انها ومع الاسف دقت المسار الاخير في نعش التواصل الحقيقي .. يازين ايام اول يوم كرت الزواج يوصلك لين باب بيتك تحس فية طعم ..

يوم الزيارات بين الجيران لسة فية طعم .. كل شي كان لة طعم لأنة حقيقي وملموس ،،

الحين مجرد ارقام ارقام ١٠٠٠١١٠٠١٠٠١٠١١٠٠١٠٠١٠١٠١٠٠١٠١٠٠١٠٠١١١١٠٠١٠١٠٠  تتحول للحروف .. والمشاعر  والتواصل الحقيقي ومد الايادي في وادي ثاني ،،

في الاستراحة كنت من اواخر اللي شروا بلاك بيري .. العالم يجتمعون ويروحون ويجون وانا مدري ،، مسكين مامعي بلاك بيري ،، وش دراني ،،  يوم شريت البلاك بيري عرفت كل شي ..

الحين كل شعب الاستراحة معهم ايفون الا ٢ .. خنا نطلع ونروح ونجي وهم مايدرون الا اذا اتصلو ..!

خوالي وعماني وخلاتي وعماتي ،، ماعندهم لا ايفون ولا بلاك بيري ولا فيس بوك ولا بطيخ .. وش دراني عنهم ووش يدريهم عني ؟؟ ماتوا اللي يستخدمون تلفون البيت ..!


الحياة صارت مثل خاصية الاشعارات – Notification

ان جتنا رسالة من ابو مصعب ـ اليوم زواج فلان – فلات مات عمة – فلان جتة مولودة – القلطة عند فلان – اليوم بنجتمع في المكان الفلاني – الاستراحة ولا تنسون القطة – اليوم نزول الرواتب ولا تنسون الصندوق –

كذا صارت الحياة .. ندري عنكم … اذا انتم خبرتونا عن طريق اي وسيلة للتواصل الاجتماعي الرقمي .. وانا بعد تدرون عني اذا كتب اي شي بتويتر <<< عاد اني ٢٤ ساعة علية ..!


والله يرحم زمان اول اللي تحول .. وهكذا عجلة التقنية .. اذا ما تمشي معها … تدعسك وتمشي <<< وياكثر الناس اللي اندعسوا … مصعب وش فيك تغيرت؟ وش فيك ماعاد صرت تتصل ؟ وينك عن المسنجر << من ٢٠٠٩ ما استخدمة ، وين ايميلاتك اليي كنت ترسلها << من بداية ٢٠١٠ بطلتها ، ..


ويقولون مصعب تغير .. لا .. مصعب باقي ماتغير … الزمان اللي تغير ، وسائل التواصل هي اللي تغيرت ..

باقي انت تجاري وتمشي مع نفس الزمان وتقنياتة …

Be Sociable, Share!

التعليقات


اسم المعلق: MoSaB
30 يونيو 2011, 4:51 م

اذا قال لك احدهم … “لقد تغيرت علينا” ..!

انت لم تتغير ،، انت فقط توقفت عن العيش بطريقتهم ..!

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: