تصنيفات

اخر ما كتبت

مدونات

مواقع ومنتديات

منوعات

ارشيفي القديم

لعيون Uncharted 3

اليوم اكتب عن اول تجربة لي في حياتي في تنسيق غرفتي وتغيير ديكورها بالكامل …!

السالفة بدأت ويمكن يحقدون علي بعض الناس ..

ادري من اكثر من ٦ شهور ان موعد نزول لعبة Uncharted 3 للأسواق حيكون في بداية نوفمبر ٢٠١١ يعني ١١.١.١١

قررت التالي : اول شي سويتة شريت تلفزيون << نحن عائلة نعيش بتلفاز واحد فقط ،،!

ولا نشاهدة ابداً الا وقت الحج او وقت حدث عالمي عظيم ..!

نحن عائلة استبدلت التلفاز بالانترنت منذ زمن بعيد ولله الحمد ..

يعني التلفزيون الوحيد موجود بالمجلس والمجلس دايم حار لانة للضيوف ومن كثرهم عاد ..!

قررت اشتري تلفزيون جديد .. وطاحت عيني على تلفزيون الانترنت من Sony واخر التقنيات 3D و LED ومعة هدية جوال سوني اريكسون اكسبيريا بلاي و ٣ نظارات و٣ افلام ولعبة كلهم يدعمون الـ 3D

معي ايفون ..! ليش اشيل جوال بنظام اندرويد والايفون مكفيني ! يعت الجوال الهدية بـ ١٣٠٠ ريال ..

قلت في نفسي وانا اناظر جدران غرفتي البيضاء الكئيبة والغرفة المعوقة اصلاً في تصميمها الطووويل .. والاضاءة العادية جداً .. وفية كم بقعة غبية في الجدران .. والفرشة اللي وظيفتها في الحياة انها تجمع الوصخ ولا المجلس العربي اللي مامنة اي فايدة الا اني انشر ملابسي لاجيت من النادي علية ..! تصدقون اني ماقد جلست على هالمجلس العربي ابد..! غير لونة المشجر البايخ .. وفراشي لبا قلبة ع الارض مصدر السعادة والدفئ << عزوبي خخخخ

الا فية واحد يسأل وش هالغرفة اللي عايش فيها انت اذا توصفها كذا ..!

الاجابة : اغلب حياتي برا البيت ..! دوام – نادي – طلعة شوي ولا اكل في مطعم على مدار الاسبوع مع اخوياي .. ولا سفر لأي حتة .. غرفتي ما اجيها الا وقت النوم فلذلك ما كنت اهتم فيها واجد ومن كثر القربعة اللي فيها اني احيان افضل النوم بالاستراحة ..!

مالكم والطويلة .. بعت الجوال الهدية اللي مع الشاشة وصار معي ١٣٠٠ … جاني ابليس الظاهر وانا اصلي وقال دام بديت بتلفزيون جديد .. غير بوية الغرفة كلها مرة وحدة والاثاث عشان تحس انك آدمي ،،،!

ومن نفس اليوم رحت محلات البوية وانا لسة ما في بالي اي لون ولا اي تصميم ولا اي حاجة ..! شفت الاسعار كيف وعرفنا شغل يدهم وخذيت رقم عامل ومدري وش فيهم متحمسين اكثر مني ..! << والله من البطالة اللي عندهم ..

رجعت البيت وعلى طول iMessage مع اختي الصغيرة واشاورها في الالوان ، وابحث في النت ولقيت كم موضوع عن الالوان وتأثيرها ع الانسان واشاور كم شخص << ما اعرفهم عبر الهوزهير !!

اخترت في النهاية لونين ،، البرتقالي والاخضر لأن حسب الموضوع ان تأثيرهم ايجابي جداً ع الانسان وتحمست … اقرأ هذا الموضوع

كان وقت دوامات وانا انسان تركت وظيفتي الاخيرة << في ايكيا ، وفي فترة الاستعداد للوظيفة الاخرى ،، رحت من الليل جهزت البوية وخلطها في محل ، وكلمت العامل قلت لة من ٧ الصباح تكون عندي و ١٢ لا اشوف وجهك << يعني بالعربي ابوي برا البيت << بدون لية :)

صفطنا الفرشة القديمة وشلت كل الاغراض والدالوب وكل شي يخصني .. ماجت ١٢ الا كل شي مخلص .. طبعاً فكيت اللمبات القديمة ،،

صارت الغرفة بدون كهرب .. ولسة ما اخترت الشكل اللي ابية للثريات الجديدة ، واروح ايكيا واصور وارسل لأختي وطبعاً الشكل اللي ابية وخذيت الاشكل اللي ابي .. ١٢ باليل كل شي راكب ..

صراحة احباط جاني ..! من بعد ابيض في ابيض ونور ابيض احس غرفتي شمس .. الحين مع النور الاصفر .. والجدار الاخضر والبرتقالي احس النور ضعيف ،،!

كلها كم يوم وتعودت ع الوضع الجديد ..

الحين باقي الفرش وحيرة اللون وش آخذ ،، قلت ابي لون فاتح ع الاقل يعكس الاضاءة وينشرها ..

اخترت بعد المشاورات لون رصاصي فاتح ،،

اليكم الصور ..

اول شي : تصميم الغرفة :

رسمة ببرنامج في الايباد بابين متقابلين باب الغرفة ومقابلة باب الحمام وانتو بكرامة

ما طرا في بالي ان اسوي تقرير ، مافية صور للغرفة قبل ، لكن في صورة اثناء الشغل بعد ما طلعت كل شي من الغرفة ..

مدخل الغرفة

منظر الغرفة و باب الحمام وانتو بكرامة

بداية الشغل

جهة مدخل الغرفة

خلصنا شغل البوية ..

طبعاً فكيت كل اللمبات القديمة التقليدية جداً ..

جا الليل وانا متوهق ولسا ما اخترت الثريات او اللمبات الجديد ،،

رحت ايكيا وشفت ان لمباتهم اغلبها زينة اكثر من انها تعطي اضاءة كويسة ،،

رحت قبل ايكيا لمحلات الانارة .. كلة صيني ابو كلب مايسوى عليكـ .. رجعت ايكيا وشريت اللي شريت

اول لمبة تركب .. واللون الاخضر شفط كل النور :(

وهذي الثريا بالوسط وماركب كل اوراقها ، لأن جبت لمبة ضعيفة ٢٥ واط والنور ميت ، ولاحظو المكيف ورا لسة بدون اطار

صورة والاضاءة من نور الشمس من الشبابيك ..

الاثاث اللي شريتة من ايكيا هالكتلوجات تلخصة لكم ،،

الصوفا  والمكتبة والطاولة اللي شريتها من ايكيا

منظر عام للغرفة .. طبعاً احس ان ترتيبي يبيلة ترتيب :)

الغرفة شبه مكتملة

الصوفا تتحول لسرير بكل سهولة .. وهكذا تستغل المساحات


السرير الصوفا :)


وحدة ارفف صغيرة



الخلاصة واهم شي ..


مو مهم الغرفة او الملحق او البيت يكون كبير .. المهم يكون ذكي :)

Be Sociable, Share!

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: