تصنيفات

اخر ما كتبت

مدونات

مواقع ومنتديات

منوعات

ارشيفي القديم

عن عام سيرحل بلا رجعة ، عن عمري عن جزء مني سيرحل ولن يعود ..

 

وهكذا الحياة .. 

اعتدت كل عام في تاريخ ١٥ – ١٢ وعند اكتمال البدر ،، ان اكتب عن عامي اللذي سيرحل بلارجعة ، عن عمري عن جزء مني رحل ولن يعود ،، 

ميزة هذة الليلة اللي اكتب فيها ،، انة وبعد شهر كامل عندما سأراة مرة اخرى سأكون في عامي الجديد <<< باللهي ؟ اقصد انه بيكون بينهم عيد ميلادي :)

كالعادة ،، 

الذكريات اللي ترسخ بذهني اكتبها كما كنت افعل بدفتري ،،

بداية بطلعة الامارات ،، وسكي دبي ،، وعض اسامة << موب اخوي .. واحدن بالامارات ،، وكانت طلعتنا بالمصادفة في عيد ميلادة :)

اذكر بعد ولا تزال عالقة في ذهني طلعة ينبع من قروب هوندا والفلة والوناسة ،، طلعنا مكة ثم الخطة كانت المدينة وتغيرت الخطة الى جولة سياحية الى ينبع والفقرة << ديرة قرب المدينة جوها مثل ابها  ،، انواع الفلة والوناسة وانواع الاكل من ابو العيال B Unique قاعدين في البيت ٢٠ ساعة ع النت !! والباقي صلاة واكل نوم !! عليكم رمضان كويييس ،،

ولا الدبشة محمد العجلان ولد جد محمد بن عبد العزيز اللي فصل ٦ من موظفي موبايلي ابلش ام امهم بالاتصالات يقول ما فعلتو خدمة النت والمشكلة من جوالة ،،

اخبر بعد كان فية طقاق بين اثنين طواااال وتويتي بينهم مالة دخل مع انة السبب اتوقع !!

اذكر سيرفر ٢٦ كان توة فاتح وكلنا سجلنا فية على امل نكون في تحالف واحد ،،، الحين كل واحد في تحالف !!

اذكر احد اللحظات الجميلة اني سويت مقلب في البثر ،، احلى مقلب سويتة في حياتي وما اعتقد اني بسوي مقلب افضل منة على الاطلاق ،،

طبعاً الذكريات غير مرتبة ،، 

اذكر بعد صيفية الهجولة والسفريات ،،، سافرت في الصيفية اكثر من اللي سافرتة (مسافة) في الخمس سنوات اللي قبل ،، 

خل اقول لكم احد هالسفريات ،،

كنت في ينبع مع محمد ،، طلعنا للرياض عشان زواج سلطان بن عبد العزيز <<< موب الامير ، واحدن ثاني ،، الزواج يوم الثلاثاء محمد يقول انة ماخد اجازة وانا ابصم ع العشرة انة ساحب ،، طيب باقي ٣ ايام وش نسوي ؟؟ اهلي في جدة ومحمد فاضي ،، وجت الطبخة بسرعة اننا نطلع قطر ،، دقينا ع القصيمي عبد الله وغسيل مخ ووافق ولما وصل الرياض ،، الحبيب محمد ناسي جواز سفرة في ينبع ! كيف الفلة بس ،، المهم صرفناها في الشرقية يومين ورجعنا ينبع ،،، والاسبوع اللي بعدة عنااااد طلعنا من ينبع للقصيم لقطر !! كيف المشاوير بس !!

اذكر زواج اخوي وائل الله يوفقة ،، صح انة خرب علي ما كنت ادري متى زواجة << شرايكم فيني ،، وكنت مخطط مع قروب هوندا لتجمع ٣ ايام بأستراحة ،، وفجأة طيط طيط رسالة جوال ان زواج اخوي في نفس اليوم اللي فية التجمع ،، اول يوم العالم مجتمعين وانا ماسك خط الجنوب ،، ثاني يوم العالم مجتمين وانا بالزواج ،، ثالث يوم العالم مجتمعين وانا ماسك خط بايخ وحجار تطيح من جبل ورايح مكة ،،  يللله ،، حصل خير . 

من اهم احداث هذا العام انة ودعت شركة ميكروزفت السقيمة للأبد وودعت معها system error وودعت Shift+Delete للأبد وانتقلت الى العالم المتميز الراقي عالم Apple Macintosh

تكون جالس في امان الله ،، طيط طيط ،، رسالة جوال ،، (انتقل الى رحمة الله جدي علي الصالح والصلاة علية بجامع الراجحي ) طبعاً هذا جد واحد من اخوياي ،، اللي كان تشوفون توقيعة على الريال .. الله يغفر لة ويرحمة ، طيب خلصت الدوام وبروح الحق صلاة الظهر ثم الصلاة علية ،، يا عيال يا اني نشبت في طريق خريص ذا اليوم نشبة الله لا يوريكم ، والله صدقت اللي يقول ان سور الصين والاهرامات وزحمة خريص تستطيع رؤيتها من القمر ، صدقتة من اللي شفت ذاك اليوم ، انا توني بالخدمة ابي اطلع على خريص ماقدرت !! واحاول بشتى الطرق ولا قدرت ،، واسمع بأذنون للصلاة ،، واقامت الصلاة وقلت في نفسي (………) ما ابي اقولة ،، وديورت ورجعت البيت وكلي قهر على طريق خريص ،،

بعد اسبوع ،، ادق علي واحد من اخوياي متحمس الووو وش اخبارك عساك طيب كيف الدنيا معك << ويجاوب كل شي تمام واسئل وش اخبار جدك << ادري انة كان بالمستشفى يعالج ،، نرجع للسؤال وش اخبار جدك ؟ ويرد : توفى ! <<< ودي احط العلامة اكبر من كذا بس ما اعرف ،،، بكل بساطة وبكل برود قال لي توفى ،، الصمت سيد الموقف ،، وش تقول ؟ توفى ،، كيف وش لون ،، توفى ،، الله يرحمة ،، 

من ذكرياتي بعد ،،

اوة صح ،، السنة هذي ودعت سيارتي الاكورد اثر حادث، وشريت يخت عفواً قصدي فورد وبعتة ورجعت للحبيبة اكورد ..

اذكر موقف حليو صار ،، 

كان راكب معي البثر ،، وشاف ٣ حبوب كبار في سيارتي ،، خاف وانفجع ووجه صار اصفر واشوفة حاط يدة ع الباب يبي ينزل ينحاش! مصعب وش هذا < لماذا ؟ كيف ؟ لكن ؟ but المهم انة انخرش هع هع 

قلت لة لحظة وكان فية قارورة موية جنبي فتحت الغطا وحطيت فية موية وحطيت حبة فيها وكبرت ذا الحبة وشفطت كل الموية ! وازيد الموية وزادت هالحبة لين كبرت مررة ،، ثم فكيتها وصارت منديل :) هع هع الـ٣ حبوب كانت مجرد مناديل مضغووووطة جداً تحطها في قليل من الماء ثم تكبر وتصير منعشة ،، بس انها ما تدعو للخرشة يا بثر :)

من اهم احداث هالسنة ما حصل من الثالث من رمضان ،، جتني رسالة في الليل ،، ( عاجل خروج شيخنا وهو الان في بيتة بحمد الله وفضلة ) <<< هو الشيخ محمد بن هادي السلامي امام جامع بجوارنا وشيخ فاضل ماعلية شبهة او غبار ، شيخ محبوب وفاضل ، لكن الاحداث اللي مرت بالمملكة بدلت الظروف والاحوال فأصبحت الامور على الشكل الخارجي فقط ، المهم انة سجن قبل سنتين بلا اي تهمة ،، وخرج بحمد الله وفضلة ، من يوم ماقريت الرسالة والدموع دموع الفرح بعيني ، صليت الفجر بمسجدهم ، الامام ماقدر يقرا سورة الفاتحة ، بكى فيها لأنة من طلاب الشيخ ، بكى فيها وابكى المصلين ،، بعد الصلاة ،، كل المصلين بالجامع قامو وسلمو علية الا انا اقدرت دموعي تمنعني ،، خلاص مابقى الا انا وكم واحد سلمت علية وكلنا دموع ، كل المسجد يحبة كل الحارة تحبة وتشهد لة بالخير والصلاح ،، الحمد لله تكينا بعدها في بيتة شوي ، ثم كلن راح بيتة ،، 

من الاحداث من الاشياء الجميلة في هالوقت كل سنة ،، 

في الدفتر اكتب عن اهم اصدقاء السنة الجدد اللي تعرفت عليهم ،، 

هالسنة اضيف اصدقاء جدد ،، محمد بن خالد السياري مصمم موقعي السابق واكثر واحد زرفني في حياتي <<< لا تنسى حقت ساكو ، بس تدرون ،، هذا اذا صرت طفشان ابدق علية وابطلع معة اي مكان يبتبثر عليك في السيارة يعدل جوك ان كان كئيب ، صدقني ماراح انسى طلعتي معك ايام المقلب حق معرض السيارات ، والايام اللي بعدة يوم رحنا نشوف الجاز والكورفيت ،، اقسم بالله ليت معي كاميرا فيديو ذاك اليوم والله ان يجون من اليابان يسون بحث عليك !!

(( في هذة اللحظات طب علي البثر في المسنجر )) وذكرني بسلاحفي الله يذكرهم بالخير اول ما تعرفت ع البثر طريت سلاحفي وقال ابيهم ،، قلت هم لك ،، 

الصديق الثاني سعود مهنا الدوسري ،، غلطة حياتك ياسعود انك عطيتني هدية مبكرة جداً جداً ، عادي انا متوقع هدية من اي واحد على الاقل عايش معي من سنين ،، لكن انت يا سعود عطيتني هدية ومجوع مكالماتي لك ما تعدت ٥ دقايق ، والرسائل وقتها ما تعدت ١٠ رسائل وكلها بزنس ومدة شوفتي لك ما تعدت اكثر ٦ دقايق وفجأة باليت اي هدية .. الا جتني منك هدية ع الكيف وعلى الذوق وكنك عارف وش احب ووش ما احب ،، (( وهذا سعود وجتني منة رسالة الحين ))

فية بعد صديقي اسامة بالامارات ،، صح اني نسيت اكتبة مع كتابة هالمدونة ،، لكنة في بالي ما انساة ،، صح انة عايش بالامارات بس حضرتي خربتة وعلمتة الخراب والصواريخ خخخخخ والعض بعض :)

من اهم الاحدات ايضاً افتتاح المدونة <<< باللهي !!

حدث ايضاً يستحق التسجيل ،،

الخميس ١٨-١٢-٢٠٠٨ محمد البيشي جاي الرياض من الاربعاء وتعشينا مع بعض وكان معنا مهدي  ،، الخميس من الصبح فرفرة معة وشغلة سيارتة ، من الورشة للوكالة ناخد قطع ومرينا على مركز المبيعات وقررت انة خلال ٦٠٠ يوم لازم تكون معي سيارة جديدة الله لايعوق بشر ، العصر والجوع ثالثنا ويفكر معنا ونبي مطعم ، ورحنا مطعم توني آند روماس << يارب اسمة صح ، << كان من اختياري ،، والحمد لله واخيراً اسجل هاليوم في التاريخ  المطعم عجب محمد ولا قال اي شي في الاكل ، طلبنا وجبتين ستيك انماااا ايييييية وشوربة بصل << عليها ريحة خايسة واكتشفت مصدر الريحة انهم حاطين عليها جبنة اسميها جبنة الفار .. رية بايخة بس طعم اوووكيييية وهي حارة ، وسلطة سيزر وعصير من اختيار محمد طعمه مثل السن توب :) بس صراحة المطعم ١٠٠٪ 

بعد المغرب رحنا نبي محل محل جيور دانو وبدأت المشكلة ، الرياض السقيمة كلها مولات للعوائل فقط ! واغلب هالمحلات الحلوة داخل هالاسواٍق ،، الحمد لله اول سوق خشيناة كان كلب الحراسة << على قولة محمد كان مفهي ، وخشينا بس محمد مالقى الذوق اللي يعجبة ، السوق الثاني كلب الحراسة مالة دخل في الحياة وقفنا وش عندكم ؟ بنغير ملابس. وين الفاتورة؟ خذ الفاتورة بالانجلش وشكلة اصلا مايعرف يقرا عربي . طيب تاريخ الفاتورة من ٣ ايام؟ <<< طيب انا بستبدل ملابس وش دخلك؟ لا تدخلون الحين عوائل ،، واسمع محمد يقول لي اسحب علية ونش والقافلة تسير والكلاب تنبح ،،، خلصنا الأغراض وطلعنا على الورشة اخذنا سيارة محمد وعلى الاستراحة ،،

الاستراحة هذي تسجل في التاريخ جت بدون ذاك الترتيب لكنها روعة بمن حضر ، وصلت ومحمد وكان فية مفاجأة لة ، القصيمي كان موجود << كنت ادري بس قال محمد لا يدري :) وحضر موسى ونايف ودحوم ومحمد بن عبد العزيز ومعاذ ومعاذ الثاني وعطر الحكي و مومو و البثر ادق علية اقولة تعال قعد يصرف ،، المهم في الاخير انة جا ومن حضر بعد ،،، صالح الفلة ،  وجا سلطان بن عبد العزيز وغريبة هالمرة ماقلب كلام واجد ، الظاهر لأن صوتة كان مخللللص وعذراً اني ماذكرت جميع اللي حضروا ،،

اذكر بعد موقف في رمضان بعد ما طلع شيخنا ، رحنا مكة ولا جا معنا ،، في الفندق بعد العمرة سحبنا على صلاة الظهر ، وصليناها انا وحمد رفدة بعد ماراح وشاف اتجاة القبلة وكانت لزقة محطوطة ورا باب !! المهم بعد يومين واحنا في الطريق للرياض وقفنا نصلي الظهر والعصر وبعدة نشوف اغراض البقالة الا حمد بقول لي مصعب بسرعة الحقني المسجد !! عسا ما شر ،، واروح المسجد يقول خل نصلي الظهر حقت ذاك اليوم !! سلامات وش فية ؟؟ الا يقول ذا اليوم الباب مفتو يوم اني اشوف اتجاة القبلة والمفروض القبلة الصح لما يكون الباب مقفول !! هع هع وتأكدت انة بنقالي اللي حط اتجاة القبلة ،، كيف يحطة على باب ؟ ولا على دولاب ؟ المفروض تنحط على شي ثابت ، يالجدار ولا السقف ،،

في نهاية العام ،،

كلمة اخيرة ،،

اللهم انك اكرمتنا بمعرفة خير الناس دون ان نسألك ،، فلا تحرمنا لقياهم في الجنة ونحن نسألك ،،

هذا اللي في بالي اذكرة لحد اليوم ،، وان حصل جديد بيتحدث الموضوع ،،

Be Sociable, Share!

التعليقات


اسم المعلق: true.love
21 ديسمبر 2008, 11:57 ص

اول واحد ..
قسمن بالله .. ايام كلما تذكرناها تبكينا العيوووووون
..
وين ايامنا وين وين .. قضيناها .. راحت بغمضت علين .. يامحلى ذكراها ..
ابكي على الاحباب(راح اهل ينبع-اهل الشرقيه-اهل الجنوب) .. ودمعي على الخدين .. والله ياحباب .. ايامكم مانساها
..
الحمد الله هالسنه تعرفنا على اصدقاء نفتخر بهم .. من (شايبنا ابو ريان .. الى ولدنا البثر ابوسياري)
..
ولا ننسى بالدعاء لحبيب الكل (محمد بن صالح المحيش) متيم بالهنادي 2002
الله يرحمه ويغفر له .. كل يوم يمر واتمنى يكون معنا ..
والله يرحم موتانى وموتى المسلمين ..
..

والله يجمعنا وياكم تحت ضله..


اسم المعلق: سعود
21 ديسمبر 2008, 2:31 م

اللهم اجعل السنة القادمة سنة مليئة بالغفران وطاعة رب العالمين …. واللهم امحي ذنوبنا التي فعلناها في هذه السنة انك انت الغفوور الرحيم ….

بجد كانة سنة من احلى السنوات الصراحة … تعرفنا على ناس كان ودنا نتعرف عليهم من سنين ..!!! … وفيها الميت يموت وتهل الدموع …. وفيها الشخص يبشر بقدوم له مولود جديد … وفيها الفرحان يفرح … وفيها الطفشان يزهق …؟؟ ….. وفيها الشاب فرحان بزواجه ….. وفيه ناااس تتمنى الزواج …. اللهم وفقنا واخلص لنا نيتنا في حسن عبادتك في هذه السنة القادمة ….


اسم المعلق: MOMO
21 ديسمبر 2008, 10:53 م

الله يوفق الجميع

ودايم احرص توثق الايام بالصور بتتذكرها بعدين

الله يوفقك ان شاء الله واحس ان بركب الشاشه بعد ماتشتري

السياره بيومين هههههه

ايام حلوه كانت ايااااااام >>>>>>سقها بس

الله يجمعنا بجنات النعيم ان شاء الله والله يرحم محمد المحيش ادعو

له يا شباب


اسم المعلق: ACCORD i-VTEC – ابو داحم
22 ديسمبر 2008, 1:59 م

ماهي الا أيام قليلة وسنقف على مشارف نهاية هذا العام الهجري

تتوالى السنين الواحدة تلوى الأخرى الكثير منا يتعجب كيف بدأت

هذه السنة

ومعظمنا يستغرب كيف انتهت؟؟ سؤال محير .. نقف مذهولين أمام سرعة

مرور اللحظات والثواني والدقائق والأيام والشهور والسنين والزمان بأكمله,

سرعة عجيبة لدرجة أننا نردد عبارة

(( عيش يومك ولاتفكر في بكرة))

ونكتشف أن غدآ هو اليوم وأن الأمس ماض بعيد ذهب بأحزاننا ,

أفراحنا , أحلامنا , وحتى مستقبلنا.

لنجعل من العام 1430هـ بداية حقيقية لقلوب حقيقية مفعمة بالطاعه والخير والجد والعطاء.

وأسأل الله العلي العظيم أن يغفر لأخينا محمد (( متيم بالهنادي ))

ويجمعنا به في جناة نعيم

.:. كفارة المجلس .:.

سبحانك اللهم و بحمدك أشهد أن لا إله إلا أنت أستغفرك و أتوب إليك.


اسم المعلق: الأنس
23 ديسمبر 2008, 12:54 ص

ماشاء الله عليك يامصعب .. فعلاً استثمرت المدونه بشكل صحيح
اهنيك على علاقاتك الرائعه واسلوبك الكتابي الجيد ..
وكفو والله لكل الشباب اخوياك والله يوفقهم كلهم اولهم اخي محمد البيشي (الله يوفقه) له عندي معروف لن انساه ماحييت :)
وبصراحه حمستني انا و محمد البيشي اننا نفعل مدوناتنا ونبدأ في التدوين … اما أنا والله مالقيت وقت :) لكن بحاول اشد حيلي :)
اكرر تمنياتي لك بالتوفيق ياقمر .. اخوك (ياسر الشمراني) .


اسم المعلق: Black Accord 2008
26 ديسمبر 2008, 1:47 م

السلام عليكم ..

والله انت واحد كويس ..
ذكريات اهنيك عليها الصراحه ..

وكل عام وانت وكل الي مروا بألف خير ..


اسم المعلق: عبقرينو
29 ديسمبر 2008, 6:43 م

الله أوفقك
قسم بالله تمنيت أن أكون ولد أشان أشوف ذكرياتي معاك
ولد فللة—–بس لاتصدق


اسم المعلق: Onaizah Boy
9 يناير 2009, 10:49 ص

====================================
تكون جالس في امان الله ،، طيط طيط ،، رسالة جوال ،، (انتقل الى رحمة الله جدي علي الصالح والصلاة علية بجامع الراجحي ) طبعاً هذا جد واحد من اخوياي ،، اللي كان تشوفون توقيعة على الريال .. الله يغفر لة ويرحمة ، طيب خلصت الدوام وبروح الحق صلاة الظهر ثم الصلاة علية ،، يا عيال يا اني نشبت في طريق خريص ذا اليوم نشبة الله لا يوريكم ، والله صدقت اللي يقول ان سور الصين والاهرامات وزحمة خريص تستطيع رؤيتها من القمر ، صدقتة من اللي شفت ذاك اليوم ، انا توني بالخدمة ابي اطلع على خريص ماقدرت !! واحاول بشتى الطرق ولا قدرت ،، واسمع بأذنون للصلاة ،، واقامت الصلاة وقلت في نفسي (………) ما ابي اقولة ،، وديورت ورجعت البيت وكلي قهر على طريق خريص ،،
====================================
الله يغفرله ويرحمه ويسكنه فسيح جناته ..

بصراحه مواقفك مره حلوه خصوصا لما تكون منفعل 222

طبعا ادري ان ردي متأخر بس يقولون ( ان تصل متأخرا خير من ان لا تصل ) >> ادري مالها دخل هذي المفروض تقال لواحد من الشباب يغير كفراته كل 6 شوهور من السرعه .. ماشاء الله ..

اوو نسيت انبهك على الخطأ المطبعي ((كل المصلين بالجامع قامو وسلمو علية الا انا اقدرت دموعي تمنعني )) >> مستحيل يفوت شي

تمنياتي لك بحياة سعيده


اسم المعلق: كلاس وولد ناس
23 أكتوبر 2009, 10:03 م

ياهي علاقتك فلة بالذات سواليفك انت ومحمد البيشي
الله يحفظك ويسعد أيامك

اكتب تعليق:





:wink: :-| :-x :twisted: :) 8-O :( :roll: :-P :oops: :-o :mrgreen: :lol: :idea: :-D :evil: :cry: 8) :arrow: :-? :?: :!: